O alumnado de Economía e Emprendemento do CPI de Cova Terreña descobre algúns dos motores económicos da vila de Baiona

No pasado mes de marzo, o alumnado de Economía e Emprendemento, xunto con compañeiros e compañeiras doutros cursos, asistiron a unha visita guiada polo interior da lonxa de Baiona. Alí foron recibidos por un dos responsábeis da lonxa, José M. Sotelo, e mais polo concelleiro de Pesca, Joaquín López, e a concelleira de Educación, Nuria Leyenda. Ao carón do alumnado, acudiron os profesores Cristina Madueño, profesora de Proa +, e Anxo X. Rajó, profesor de Economía e Emprendemento.

Na visita explicouse a importancia da pesca extractiva da vila de Baiona, tanto para a praza de abastos da localidade, como para os supermercados e peixerías, onde se vende un produto de excelente calidade e que xera un volume de negocios superior aos tres millóns de euros. Por outra banda, o alumnado tamén puido observar algunhas das especies capturadas ao longo desa xornada, que ían ser postas á venda para particulares e/ou empresas.

A seguir, o alumnado e o profesorado, xunto cos responsábeis políticos do Concello de Baiona, acudiu á praza de abastos. Alí explicóuselles como saen a concurso os diversos postos de venda, así como as condicións que deben reunir os/as interesados/as en vender os seus produtos dentro deste espazo público. O alumnado, deste xeito, puido comprobar que se trata duns espazos amplamente atractivos para o desenvolvemento da actividade económica.

O alumnado de Economía e Emprendemento de 4º de ESO, xunto con outros compañeiros e compañeiras doutras materias, iniciaron as investigacións para descubrir cales son as claves para entendermos a economía da vila de Baiona.

O percorrido iniciouse na Virxe da Rocha e mais nas praias que se localizan ao carón do Parador. Baiona, ademais dos recursos de natureza, posúe un fermoso paseo ao carón do mar, un club de iates de fama recoñecida e mais a reprodución da carabela A Pinta, que regresou de América un 1 de marzo de 1493.

Tras a visita a estes lugares, o alumnado acudiu ao Recuncho Mariñeiro, un dos restaurantes de máis sona de Baiona, onde puido entrevistar ao seu dono, Pedro Villamarín, quen revelou algunhas das claves para comprendermos o mundo da hostalaría baionesa.

Finalmente, a xornada finalizou cun percorrido polo centro histórico de Baiona.

Personificando a Rosalía un 23 de febreiro de 2024

Parte dos actores e actrices do grupo de teatro do CPI de Cova Terreña participaron no recital poético da mañá do 23 de febreiro, lendo o manifesto redactado pola AELG (Asociación de Escritores e Escritoras en Lingua Galega).

Na lectura participaron Anxo Carbó, Trinidad Costas, Simon Hayden, Nara Lago, Elia Penedo e Zayra Villar, quen intercalaron poemas da nosa poeta universal cos textos de homenaxe á súa figura e á súa obra.

O pasado 30 de xaneiro de 2024 celebramos o Día da Paz no CPI de Cova Terreña cunha xincana deportiva organizada polo departamento de Educación Física, cunha actuación do noso Coro e mais cunha performance creada polo Grupo de Teatro do noso centro educativo.

Eis os versos recitados polos actores e actrices participantes:

"Xa non teño quen me escriba, co pulso do amor

agora sotérrome na ferida, que a súa ausencia e a guerra me deixou.

Non son a néboa que hoxe oculta a mar.

Non son a vida que non me quixo dar.

Non son a sombra do que antes fun.

Non son a miraxe que se perde no horizonte. Son a paz!

Cos teus cotenos no horizonte impasíbel

eu petaba unha interrogación: Que nos enfronta?

Un pensamento inconsciente, un pano furado de estrelas,

atravesa o noso atlántico reclamando liberdade...

Atopamos esta madrugada, na gaiola do mar,

unha illa perdida, no medio do océano de sal. Ao lonxe Palestina!

Armaremos de novo a gaiola pois vai saír o sol

improvisado e desorientado, para fundir a neve da Ucraína.

E nós, alumnas e alumnos do Cova Terreña,

xuntaremos paxaros sen xeografía para enviárllelos a todos os que alí sofren.

O mar, coma a paz, é unha illa de auga rodeada de ceo por todas partes!"

O alumnado do CPI de Cova Terreña recibiu a visita da actriz Uxía Blanco, protagonista do filme Sempre Xonxa, dirixido por Chano Piñeiro.

Tras finalizar o coloquio, a actriz dirixiuse aos grupos de 2º de ESO, quen tamén traballaran o filme no pasado curso.

Unha vez realizadas as visitas a estes cursos iniciouse, tamén na Biblioteca do noso centro, outro coloquio, desta volta para alumnado de 4º de ESO, relatorio que foi presentado por Pedro Leyenda, Loren Outerelo e Miguel Vilar.

O grupo de teatro amador do CPI de Cova Terreña, integrado por alumnado de todos os niveis da ESO e dirixido polos profesores Paz Rodríguez e Anxo X. Rajó, iniciou a súa andaina nos escenarios coa posta en escena de dúas obras teatrais nunca antes estreadas.

A primeira delas, titulada "Os defuntos falaban castelao", é unha adaptación teatral baseada no texto orixinal do autor lugués Ánxel Fole, un relato que fora incluído no seu famoso libro Á lus do candil, publicado en 1953.

A segunda das obras presentadas titúlase Unha elección a medida para a princesa Aldara, texto orixinal de Anxo X. Rajó, que mestura a tradición das lendas artúricas, a lírica trobadoresca e outros aspectos das cortes medievais.

As obras formaron parte do Festival de Nadal do CPI de Cova Terreña, que este ano foi presentado de forma espléndida polas actrices Mara e Aida, e mais polo actor David, que tamén dirixiron as badaladas de fin de ano.

Cómpre destacar o elenco de actores e actrices. Segundo a orde de aparición, en Os defuntos falaban castelao:

Narradora (Alba Bouzada), Tristán (Pedro Leyenda), Chofer (Leo), Françoise (Bea), Carme (Elia Penedo), Louise (Loren Outerelo), Vilo (Lucía Blach), Don Ramilo (Adrián Vasconcellos), Mozo (Miguel Vilar) e María (Leti Figueirido).

A respecto de Unha elección a medida para a princesa Aldara, segundo a orde de aparición:

Narradora (Irene Costas), Senescal (Anxo), Carme (Elia Penedo), Conde de Lemos (Pedro Leyenda), Condesa de Lemos (Iris Calero), Conde de Gondomar (Lucía Blach), Condesa de Gondomar, Conde de Camiña (David), Condesa de Camiña (Mara Fernández), Xograr (Miguel Vilar), Menestrel (Ángela Cividanes), Rei D. Afonso X (Leo), Raíña Violante (Trinidad Costas), Princesa Aldara (Nara), O cabaleiro Galván (Sara Cedeira), O cabaleiro Galaaz (Elia Penedo) e O cabaleiro Tristán (Elia Penedo).

O xurado composto polos departamentos de Artes Plásticas e Visuais, Lingua e Literatura Galegas e Portugués, e mais o equipo de Biblioteca e de Dinamización Lingüística, fallaron na tarde do pasado luns 18 de decembro o II Concurso de Postais en Lingua Galega do CPI de Cova Terreña.

Todos os premiados e premiadas foron homenaxeados no Festival de Nadal que tivo lugar nesta quinta feira (xoves). Recibiron coma galardóns libros de lectura en lingua galega, pinturas de cores, bolsas e maletíns e chaveiros conmemorativos do 50 aniversario do CPI de Cova Terreña.

Un ano máis, o xurado quixo resaltar na súa acta a extraordinaria participación do alumnado de todos os niveis, amais da alta creatividade tanto para as composicións poéticas como para os deseños presentados.

Nos ficheiros adxuntos, amais dalgunhas imaxes, axúntase a acta do xurado.

O alumnado de 4º de ESO, que recibe formación en Economía e Emprendemento, participou na xornada do 19 de decembro de 2023 na presentación das súas sociedades cooperativas na Deputación de Pontevedra.

Ademais de presentar o noso centro e a nosa vila, Baiona, os e as representantes das diversas cooperativas explicaron quen eran os compoñentes das mesmas, os principios que as rexen e a ONG á que van doar parte dos seus beneficios.

A Deputación de Pontevedra, de man do seu deputado provincial Javier Tourís, entregou ao noso alumnado os NIF provisionais cos que poderán operar economicamente nos próximos meses.

As sociedades cooperativas Colecuas, Famouz, CIGA e Laant tentarán abrirse camiño no mercado económico cos seus produtos. Nos próximos meses teredes máis noticias!

A alumna Vitória, de 2º de Primaria e de orixe brasileira, foi convidada pola mestra Marta Cernadas para que lese un conto en portugués ao alumnado que cursa esta materia en 1º de ESO. 

Aproveitando a circunstancia, as compañeiras e compañeiros de Vitória tamén acudiron ao salón de actos do noso centro educativo. Tras a lectura todas e todos observamos a gran semellanza que existe entre ambas as linguas, o galego e o portugués, que na Idade Media conformaron unha auténtica koiné literaria, pois non existían as fronteiras para a creación e a cultura, tal e como nos amosa a espléndida tradición da lírica trobadoresca.

O alumnado do noso centro educativo presentou máis dun cento de novas creacións literarias

Aproveitando a antiga festividade celta do Samaín "fin do verán", o Departamento de Lingua Galega e mais o EDLG convocaron un certame en que participaron todos os niveis e ciclos de Educación Infantil, Primaria e Secundaria. 

Os requisitos para estas creacións literarias, na modalidade de microrrelato, eran elaborar textos non superiores ás cen palabras e cun argumento centrado no Samaín e en historias de medo e terror. Por outra banda, no apartado de feitizos e rimas endemoñadas, ademais da creatividade, valorouse a orixinalidade e o bo humor do que fixeron gala moitos e moitas participantes.

Finalmente, o xurado, conformado polos membros do Departamento de Lingua e Literatura Galegas e mais algún dos membros do EDLG tomou a decisión de premiar os seguintes traballos na ESO:

Na modalidade de microrrelato o primeiro premio foi para o texto "A miña avoa", de Trinidad Costas, de 2º ESO B, en que o xurado destaca a súa orixinalidade. O segundo foi poara "O rostro no espello", de Mara Ludeña, de 1º ESO B, do que se salienta a excelente redacción do manuscrito.

Nos feitizos, o primeiro premio recaeu na "Poción para crecer", de Ciara Matilde, Laura González e Daniela Miniño, de 3º ESO B, en que o xurado destaca a relación do feitizo co propio Samaín; o segundo premio foi para o "Feitizo para quitar os partes", de Mario Villamarín, Nano Ruibal, Pablo Fontenla e Brais Misa, do que salienta o carácter divertido e simpático desta poción máxica.

A respecto das rimas endemoñadas, o primeiro premio foi para "Unha noite de Samaín", de Vera Goce, de 1º ESO B, en que se salienta a capacidade creativa da autora, e o segundo para "Lobos salvaxes", de Gerardo Rodríguez, Unai Pombal e Xoel Sanmartín, de 2º ESO B, onde salienta a temática relacionada coa nosa etnografía e a mitoloxía da nosa cultura.

Eis algunhas das ferramentas e recursos dixitais máis útiles en lingua galega (e portuguesa):

Dicionario Digalego

O dicionario máis completo da lingua galega con máis de 65.000 entradas, etimoloxías, traducións a varias linguas e conxugador de verbos [Consellería de Educación].

Dicionario de dicionarios

Dicionario que recolle máis de 390.000 palabras e acepcións dos dicionarios históricos da lingua galega dos séculos XIX e XX [Instituto da Lingua Galega, ILG e Seminario de Lingüística Informática da Universidade de Vigo].

Tradutor Gaio

Tradutor moi eficiente na versión galego-castelán e castelán-galego, menos rendíbel na tradución en portugués [Secretaría Xeral de Política Lingüística].

Enciclopedia Galega Universal (EGU)

Enciclopedia en lingua galega de carácter universal, en proceso de actualización [Consellería de Educación].

Dicionario da Real Academia Galega (RAG)

Dicionario que recolle preto de 60.000 artigos lexicográficos e os seus significados.

Dicionario Priberam (DPLP)

Dicionario do portugués contemporáneo que inclúe máis de 164.000 entradas e que integra as normas portuguesa e brasileira, segundo o Acordo Ortográfico de 1990.

PROXECTO METEOESCOLAS EN 1º ESO

No curso 2022-2023, o alumnado de 1º ESO participou no Proxecto Meteoescolas levando a cabo pequenos proxectos colaborativos para o estudo do clima en diversos concellos galegos. Este proxecto foi avaliábel e formou parte da cualificación final da 1ª avaliación.

O obxectivo principal deste proxecto era o estudo da diversidade do clima galego, realizando comparacións entre a climatoloxía de costa e de interior, de concellos do norte e do sur de Galicia. Concretamente, o alumnado investigou a respecto da temperatura, a pluviosidade, o vento e a presión atmosférica. Acompañando estes datos, cada parella ou pequeno grupo presentaba brevemente o concello obxecto de estudo, xunto con algunhas imaxes representativas dos espazos do patrimonio natural e etnográfico do municipio.

Para a investigación, o alumnado estudou as estacións meteorolóxicas de distintas localidades galegas, inseridas en Meteogalicia, e consultáronse outras páxinas web relativas á climatoloxía, que tiveron que identificar e analizar:

www.meteogalicia.gal

www.windguru.cz

www.eltiempo.es

Aproveitando as sesións finais desta avaliación, o alumnado da ESO fixo unha saída guiada por un tramo do Camiño de Santiago.

Saímos do centro e fixemos varias paradas nos lugares emblemáticos. O alumnado de 1º da ESO encargouse de comentar as particularidades destes espazos: Cruceiro da Santísima Trindade, Fonte do Pombal, Praza Cadaval e Ponte Románica da Ramallosa.

A actividade foi organizada polo Equipo Directivo e os departamentos de Relixión e Lingua Galega.

Esta actividade forma parte do PVAD, EduSaúde, Convive-T, Iguala-T e Inclúe-T.

20 de xuño

Nesta segunda feira, 24 de abril, o alumnado de 1º ESO, acompañado dos compañeiros e compañeiras de 3º ESO da materia de Cultura Clásica e mais de 4º ESO da materia de Latín, acudiu aos restos arqueolóxicos do campamento romano de Aquis Querquennis e mais ao Parque Natural do Xurés, nos concellos de Bande e Lobios, acompañado polos docentes Diana, Tania, Rubén, Carlos, José e Anxo.

Á mañá, desprazámonos ao Centro de Interpretación de Aquis Querquennis, no municipio de Bande, aberto exclusivamente para o noso alumnado. A seguir, todo el, guiado por algunhas compañeiras e compañeiros de 1º ESO e de 4º ESO Latín, coñeceu as principais características dos restos arqueolóxicos do campamento militar e mais da mansio que se sitúa nas inmediacións.

Na interpretación dos diversos elementos do campamento militar participaron: Carla P., Oriana, Vanesa, Sofía e Manuel, dirixidos polo profesor Rubén. Nas explicacións do conxunto monumental do campamento e a mansión romana participou parte do alumnado de 1º ESO:

Ao mediodía, o xantar tivo lugar na desembocadura do río Caldo, ao carón da piscina termal. Unha vez rematado, o alumnado aproveitou a oportunidade de probar as augas termais da piscina e mais das pozas que se forman no propio río.

Á tarde, o alumnado dirixiuse aos restos arqueolóxicos doutra mansio, Aquis Originis, onde tamén recibiu as explicacións dos guías intérpretes de 1º ESO. Seguindo o trazado da vía romana XVIII, que unía as cidades romanas de Bracara Augusta (Braga) e mais Asturica Augusta (Astorga).

Os e as participantes nesta ruta puideron ascender por ela até a chegada a un punto medio no camiño, ao carón dos miliarios que se foran recollendo durante as escavacións e estudos arqueolóxicos realizados na zona. Alí mesmo, o alumnado de 1º ESO realizou a interpretación dos principais valores naturais do Parque Natural do Xurés.

O regreso a Baiona tivo lugar ás 21.30 horas, despois dunha xornada inesquecíbel para o noso alumnado e para o profesorado acompañante.

O alumnado de 3ºESO de Proxecto Competencial visitou o Xeoparque do Courel (Quiroga, Ribas de Sil e O Courel), Castro Caldelas, Pobra de Trives e os canóns do río Sil.

Así pois, nestes días coñecemos distintos enclaves de interese realizando moi diversas actividades, visitando os museos Etnográfico e Mineiro de Quiroga, o Museo do Xeoparque do Courel de Ribas de Sil, e o castelo medieval de Castro Caldelas, onde levamos a cabo unha visita guiada e mais un obradoiro de escrita medieval. Visitamos paraxes naturais marabillosas e tamén puidemos coñecer o dano que o lume causou no Xeoparque e nas súas aldeas, lume e dano que, infelizmente, tampouco é alleo ao noso alumnado de Baiona.

Ademais, tiveron tempo para desfrutar da compañía dos seus compañeirxs e reforzar vínculos.
 

Este 23 de febreiro, o CPI Cova Terreña súmase a todos os centros educativos e ás diversas institucións do país para conmemorar o Día de Rosalía, en lembranza da nosa autora universal, alicerce fundamental do Rexurdimento e peza fundamental da literatura romántica europea.

Amais dos vídeos e doutros contidos educativos impulsados polo Consello da Cultura Galega e a Real Academia Galega, o departamento de Lingua e Literatura Galegas e mais o EDLG do CPI Cova Terreña queren realizar a súa particular contribución cunha lectura de poemas acompañada de música que se irá desenvolvendo polas aulas de Educación Infantil, Primaria e Secundaria.

Dende os bosques de Salcedo, Castelao ollaba a ría e escribía con emoción as liñas que remataba coa proclama "Meu Pontevedra!"

E alí foi o alumnado de 4º de ESO para coñecer un pouco máis a inmensa e insubstituíbel obra gráfica de Castelao, un auténtico xenio da nosa cultura e quen, xunto cos homes do Grupo Nós, axudou a facela universal.

Aproveitando a iniciativa do profesor de Educación Física, David Gayoso, quen animou ao noso alumnado a escalar no rocódromo de Pontevedra, os titores de 4º ESO A e B, María e Anxo, acompañaron en dúas quendas a rapazas e rapaces a coñecer a obra gráfica de Castelao no Museo de Pontevedra.

No Museo puidemos observar os enormes cadros con referencias aos cegos, cos que se sentía especialmente identificado Castelao, que no seu día estiveron expostos nos salóns do famoso Hotel de Mondariz-Balneario, propiedade doutro ilustre galeguista, Enrique Peinador.

Tamén puidemos admirar as máscaras orixinais, creadas polo propio Castelao, da coñecida obra teatral Os vellos non deben de namorarse, así como algúns dos debuxos máis característicos do autor de Rianxo.

Unha xornada completa e de proveito para todas e todos nós, da que só resta agradecer ao Museo de Pontevedra e á propia Deputación a súa amabilidade e a profesionalidade e bo facer das guías.

Adxúntase o documento en que se resolve o Concurso de Postais de Nadal celebrado no pasado mes de decembro de 2022.

O CPI Cova Terreña súmase ao 25N, Día Internacional da Eliminación da Violencia contra as Mulleres

Este venres 25 de novembro, o alumnado de todos os cursos de Educación Secundaria Obrigatoria participou no encontro "Canteira de Mulleres", organizado pola Deputación de Pontevedra e coordinado polo grupo de traballo Iguála-T do noso centro educativo. Durante as dúas sesións que se celebraron á mañá, os e as estudantes debateron abertamente a respecto dos conceptos de feminismo, igualdade e a nova masculinidade, un debate que deixou claro o rexeitamento de todo o noso centro contra calquera tipo de violencia que se exerza contra ninguén, nomeadamente contra as mulleres.

Ao comezo do acto, o alumnado de 3º ESO C representou unha performance de homenaxe a todas as mulleres que levan sufrindo violencia de xénero.

Jorge A., Saray B., Adrián C., Adrián G., Adrián G., Cecilia P. e Nathaldo R. converteron este día nunha xornada inesquecíbel.

O alumnado de 3º de ESO gozou o pasado xoves 3 de novembro dunha visita inesquecíbel á que foi a casa de Rosalía de Castro en Padrón, a Casa da Matanza. O alumnado, acompañado dos profesores María J. Torres (Lingua Castelá), Asun (Bioloxía) e Emilio Cambeiro (Lingua Galega), puido achegarse a un dos espazos máis senlleiros da vida da nosa escritora universal, lugar onde faleceu o 15 de xullo de 1885, e que aínda conserva moitos dos seus elementos persoais e familiares.

A visita, custeada integramente pola Deputación de Pontevedra dentro do programa "Rosalía, a súa casiña, o meu lar" do servizo de Patrimonio Material e Memoria Histórica, serviu tamén para coñecer outros espazos dos arredores, como o Xardín Botánico de Padrón, onde o alumnado tivo a oportunidade de recoñecer algunhas plantas grazas ás fichas elaboradas pola profesora Asun.