Blog da biblioteca

O 30 de abril visitounos Anxo Fariña par conversar co alumnado de 1º da ESO sobre os Megatoxos, colección que escribiu e ilustrou el mesmo.

Falounos sobre o proceso da escrita e sobre como facer debuxos a partir de elementos sinxelos, como as letras. Desta maneira, a rapazada foi quen de realizar debuxos tal e como fai o mesmo Anxo Fariña!

Esta actividade foi financiada polo Ministerio de Cultura a través do Proxecto Encontros Literarios.

Con motivo do Día do Libro, que se celebra como cada ano o 23 de abril, o noso centro celebrou a terceira lectura compartida do curso. Padriños e madriñas foron os encargados de seleccionar unha lectura para os seus afillados e afilladas. 

Co obxectivo de fomentar a convivencia e a lectura, celébrase este reto intercentros entre o CPI de Cova Terreña (Baiona), CPI Alcalde Xosé Pichel (Coristanco) e CPI Arquitecto Antonio Palacios (Nigrán).

Posto que o lema das Bibliotecas Escolares do curso 23/24 é Unha Biblioteca Escolar en viñetas, o concurso centrarase en dúas coleccións de cómic clásico presentes nos fondos bibliográficos dos centros:

• Astérix

• Mortadelo e Filemón

Neste reto lector, grupos de alumnado realizarán a lectura destes cómics de xeito voluntario e autónomo para finalmente presentarse a un cuestionario en liña sobre eses cómics.

As bases están dispoñibles aquí. 

O pasado 1 de marzo o centro contou coa presenza de docentes do CPI Alcalde Xosé Pichel, de Coristanco, e do CPI Arquitecto Antonio Palacios, de Nigrán, dentro do Programa Observa_Acción.

Ademais de coñecer o Concello, os visitantes puideron achegarse a grandes trazos ao funcionamento do centro, facendo fincapé en tres proxectos en concreto. Un deles é a Biblioteca do centro. Demos a coñecer diferentes dinámicas de animación á lectura que estamos a levar a cabo, como a Cita a cegas, ou a lectura compartida. Tamén intercambiamos información sobre a visita de autores e autoras, así como as diferentes axudas e subvencións dispoñibles.

A raíz deste encontro, xurdiu unha colaboración a curto prazo na realización dun Reto Lector Intercentros, baseado no cómic (lema das Bibliotecas Escolares deste curso). Amais diso, celebraremos unha lectura compartida conxunta con motivo do Día do Libro.

O pasado 27 de febreiro, a ilustradora Titimoki visitou ao alumnado do 1º ciclo de Ed. Primaria para falar do seu libro Pomodoro. Esta actividade foi posible grazas ao Proxecto Faro da Escola.

Antes da visita, o alumnado realizou unha lectura comprensiva e elaborou diferentes traballos de ilustración inspirados na obra de Titimoki.

O propio día, as rapaces de rapaces convertéronse en periodistas. Escoitaron con atención e preguntaron sobre gustos, froita favorita, como é o traballo de edición dun libro, cal será a próxima aventura, ... de todo!

Despois diso, aínda tivo tempo de asinar os libros da biblioteca.

O final da segunda avaliación foron xornadas de gran afluencia en Lentiña´s House, que estivo ateigada ata o punto de practicamente non quedar oco para poñer un pé!

O pasado 19 de febreiro, da man do Proxecto Faro da Escola, o alumnado de 5º B de Ed. Primaria do noso centro recibiu a visita de Anxo Iglesias. 

Amante dos amorodos, dos bambáns e dos caracois, Anxo Iglesias é profesor de Educación Física no IES Auga da Laxe de Gondomar. Membro fundador da asociación Espazo Lectura, coordinou desde 2008 ata 2015 o Club de Lectura Compartida Lendo Contigo. Ademais, é un dos integrantes do grupo de música infantil A Banda dos Cueiros e xogador retirado de pimpón. Unha nova dimensión, Premio Merlín de Literatura Infantil 2022, é a súa primeira obra publicada.

O alumnado compartiu as súas impresións sobre a obra Unha nova dimensión, na que atopamos diferentes creacións  como  pode ser a canción de roda, poema xeométrico, xitanxáfora, trabalinguas, fonemoramas, adiviñas, lipogramas, pictopoemas, etc

Con xogos, compartindo anécdotas do autor  e coas  creacións propias do alumnado pasamos unha xornada interactiva-creativa moi divertida. Ao remate Anxo levou os nosos libros para adicárnolos de xeito personalizado cun caligrama moi especial.

A mediados de febreiro iniciouse o proxecto Cita a cegas, onde o alumnado de Ed. Secundaria se aventurará nunha lectura a cegas.

Os libros foron escollidos e empaquetados polo equipo de biblioteca para que os e as rapazas escolleran un, guiándose unicamente pola temática (amor adolescente, medo, policíaca, mitoloxía, histórica e ciencia ficción). Unha vez aberto, debían decidir se lle daban unha oportunidade en función da portada e sinopse. 

No mes de abril volverémonos xuntar para falar sobre a escolla, coñecendo así o éxito do emparellamento...

O 30 de xaneiro celébrase o Día da Non Violencia e da Paz en homenaxe a Gandhi, considerado o pai do pacifismo. Dende o equipo de biblioteca quixemos facer unha pequena contribución para achegar material bibliográfico relacionado coa temática, cunha exposición de libros ben diversos (tanto nos formatos como nas idades de lectura recomendadas).

Ademais, parte do alumnado de Ed. Infantil, Primaria e Secundaria, guiado polas titorías, plasmaron en paxariñas de papel versos de poemas proclamando a paz de diferentes autores, como García Lorca, Alberti, Machado, Manuel María ou Amauta Castro. O resultado está exposto na propia biblioteca para desfrute de toda a comunidade educativa.