Blog da biblioteca

O Nadal é tempo de ledicia, de desfrute coa familia e ... cos libros! Por iso o equipo de biblioteca organizou unha exposición con libros que falan desta época da ano. Coma sempre, o obxectivo é o fomento da lectura, poñendo a disposición recursos que dean atención ás distintas necesidades educativas. Así mesmo, hai exemplares destinados a todas as etapas educativas, que poden ser collidos en préstamo.

O alumnado do centro ao completo xuntouse o pasado 23 de novembro para celebrar a primeira lectura compartida do curso. Nela, nenos e nenas de todas as idades se emparellaron para achegarse aos libros escollidos, nesta ocasión, polas madriñas e padriños. A resposta foi, por parte de todos, excepcionalmente positiva.

Con motivo do Día Internacional Contra a Violencia de Xénero, que se celebra o 25 de novembro, o equipo da biblioteca organizou unha exposición co material co que dispoñemos: libros para os máis pequenos, novelas contra a violencia, ensaios sobre o feminismo... O espectro é amplo e responde ás inquedanzas que pode ter a comunidade educativa.

Con esta actividade, ademais do fomento da lectura que procuramos sempre, tamén pretendemos contribuír a acadar unha igualdade real, libre de violencias, para legarlle ás vindeiras xeracións unha sociedade mellor.

A semana do Samaín viviuse de xeito intenso na biblioteca da escola. O voluntariado traballou arreo na organización das distintas actividades.

Para facer máis accesibles as lecturas de medo, montouse unha exposición de libros que podían ser levados en préstamo, con contos de terror, sobre personaxes do Samaín ou con historias máis ou menos pavorosas.

A decoración da biblioteca foi elaborada polo voluntariado e por familias que colaboran habitualmente.

Ademais, as e os axudantes da biblioteca leron contos de medos a todo o alumnado de Ed. Infantil e Primaria o venres 27 de outubro, cunha acollida moi positiva.

Uxía González e Mara Ludeña en 3º A de Ed. Primaria.

As Mochilas Viaxeiras abandonan Lentiña´s House para chegar aos fogares de toda a rapazada de Ed. Infantil e Primaria. Nelas, ademais de libros, podemos atopar miniaturas de animais, películas ou mesmo xogos de mesa! Mais o que non falta é o Caderno Viaxeiro no que poder facer unha recensión, deixar a opinión ou mesmo un debuxo do libro que máis gustou.

As mochilas estarán en cada casa unha semana, xa que, tal e como reflexionaban moitos nenos e nenas o curso pasado, necesítase tempo para poder desfrutar de todo o material!

No seguinte vídeo podemos ver unha pequena mostra das achegas da rapazada do curso 22/23:

Este curso, no que se iniciou o voluntariado da biblioteca, chegou ao seu fin. E como non podía ser doutra maneira, tocou agasallar a todos os que colaboraron nas diferentes actividades propostas: organización de fondos, colaboración na catalogación, exposición do Día das Letras Galegas...

Como non podía ser doutra maneira, despois do éxito dos selos, o regalo consistiu nun selo de autocomposición para que poidan empregalo sempre que queiran.

O ano que vén, comezaremos con máis forzas para incrementar as tarefas e responsabilidades!

Esta semana visitou ao noso alumnado de 2º Ed. Primaria El Hematocrítico, autor de, entre outros libros, Feliz feroz. O lobiño riquiño.

Contounos por que se chama así (en realidade non se chama El Hematocrítico) e de onde sacou a idea de escribir este libro que tanto nos gustou! Entre os lobos dos contos clásicos (que a pouco que busquemos, podemos atopar media ducia de historias diferentes que teñen ao lobo como o malo da historia) e o coiote do Correcamiños, atopamos ao personaxe principal da nosa historia. O humor, coma en todos os libros de Hemato, é unha constante que nos permitiu desfrutar moitísimo do libro.

Por outra banda, tamén nos contou en primicia que está a piques de sacar novo libro, no que o Lobiño coñece a ... Draculiño! Agardamos con verdadeira intriga saber máis desta historia. 

E, ao final de todo, agasallounos asinando toooodos os nosos libros 

A biblioteca da escola sumouse ás distintas iniciativas que se levaron a cabo para celebrar o Día das Letra Galegas, dedicado este ano a Francisco Fernández del Riego, Don Paco, mediante unha exposición.

Este ilustre persoeiro, nado no concello lucense de Lourenzá, contribuíu a manter a afianzar a cultura galega dende que entrou en contacto coa obra de Rosalía de Castro, Curros e Vicente Risco entre outros. De feito, foi un dos impulsores da celebración da festa que este ano se lle adica. Cabe destacar tamén que foi socio fundador da Editorial Galaxia en Vigo, cidade á que permaneceu vencellado ata a súa morte.

Ademais de diferentes obras que falan sobre a vida de Don Paco, coa exposición que celebra as Letras Galegas tamén quixemos recuperar outras figuras homenaxeadas en anos anteriores coa colección dos Bolechas As miñas primeiras letras galegas.

Hoxe, 28 de abril, recibimos a visita de Sabela Fernandez Trelles, autora de O ladrón de soños entre outras obras.

Puidemos escoitar de primeira man o seu conto mentres faciamos actividades moi divertidas relacionadas cos nosos soños e pesadelos! As actividades consistiron en que cada alumno e alumna contara os seus soños máis preciados para poder expoñelos na biblioteca e que o resto do centro puidese coñecelos e engadir os seus. E por outra banda, cos pesadelos aprendemos a expresalos e falar sobre eles, meténdoos nun cofre pechado para que non escapen e que así non lles teñamos medo.

Finalmente firmounos os libros e entregámoslle un pequeno agasallo de parte de todo o alumnado. Grazas Sabela!

Por Marta Cernadas, titora de 1º B Ed. Primaria