Novembro 2023

Lectura compartida

Mar, 28/11/2023 - 22:37 — iriachapela

O alumnado do centro ao completo xuntouse o pasado 23 de novembro para celebrar a primeira lectura compartida do curso. Nela, nenos e nenas de todas as idades se emparellaron para achegarse aos libros escollidos, nesta ocasión, polas madriñas e padriños. A resposta foi, por parte de todos, excepcionalmente positiva.

5 adxuntos

Contacontos dende as familias: Daniela Pirata

Mar, 28/11/2023 - 22:30 — iriachapela

O pasado 23 de novembro, o alumnado de Educación Infantil ao completo puido desfrutar da lectura teatralizada de Daniela Pirata, de Susanna Isern. A actividade, encaixada no Programa Lectura e Familias, foi levada a cabo por Geles, nai dunha das propias alumnas de Infantil. Grazas ao seu talento, á caracterización e ao apoio da pizarra dixital, foi quen de mergullar á rapazada neste fantástico mundo de piratas no cal a igualdade é un piar fundamental.

5 adxuntos

Exposición 25 N

Xov, 23/11/2023 - 23:20 — iriachapela

Con motivo do Día Internacional Contra a Violencia de Xénero, que se celebra o 25 de novembro, o equipo da biblioteca organizou unha exposición co material co que dispoñemos: libros para os máis pequenos, novelas contra a violencia, ensaios sobre o feminismo... O espectro é amplo e responde ás inquedanzas que pode ter a comunidade educativa.

Con esta actividade, ademais do fomento da lectura que procuramos sempre, tamén pretendemos contribuír a acadar unha igualdade real, libre de violencias, para legarlle ás vindeiras xeracións unha sociedade mellor.

2 adxuntos

Visita á Biblioteca Pública Municipal

Xov, 23/11/2023 - 23:01 — iriachapela

O alumnado de 1º ESO realizou unha visita á Biblioteca Pública Municipal de Baiona, guiada pola bibliotecaria Cristina. Alí, explicou as orixes do edificio, os cambios realizados e os usos actuais que se lle dan. Fixo especial fincapé dos servizos que poden desfrutar os nosos alumnos e alumnas, para o cal se lle fixo o carné de usuarios/as. Velaquí unha mostra do que foi a visita.

5 adxuntos

O Samaín en Lentiña´s House

Sáb, 04/11/2023 - 17:12 — iriachapela

A semana do Samaín viviuse de xeito intenso na biblioteca da escola. O voluntariado traballou arreo na organización das distintas actividades.

Para facer máis accesibles as lecturas de medo, montouse unha exposición de libros que podían ser levados en préstamo, con contos de terror, sobre personaxes do Samaín ou con historias máis ou menos pavorosas.

A decoración da biblioteca foi elaborada polo voluntariado e por familias que colaboran habitualmente.

Ademais, as e os axudantes da biblioteca leron contos de medos a todo o alumnado de Ed. Infantil e Primaria o venres 27 de outubro, cunha acollida moi positiva.