O alumnado de 4º Ed. Primaria estudou os distintos aparellos que podemos atopar nunha estación meteorolóxica, como a que temos no centro: pluviómetro, anenómetro, termómetro, veleta... 

Os resultados foron plasmados en cartolinas como as que se amosan a continuación:

Despois deste traballo de investigacións, están feitos uns expertos e expertas!

Con motivo do Día Mundial da Meteoroloxía, convócase a IV Edición do Concurso de Fotografía Meteorolóxica.

O alumnado interesado en participar poderá enviar un máximo de dúas fotografías, con pareado en galego, a meteocova@gmail.com. A data límite de entrega é o 22 de marzo. Consulta as bases completas aquí. 

Última hora!!! Aberta categoría de participación para o persoal do centro.

O alumnado de 1º ESO comezou o ano recollendo datos na estación meterolóxica da escola, rexistrando as temperaturas máximas e mínimas e as precipitacións. Estes datos, de enorme interese, serán subidos á páxina web de meteogalicia.

No 1º trimestre do curso 2023/24, na materia de Xeografía e Historia impartida en 3º ESO, o alumnado estivo traballando de forma conxunta co fin de elaborar un informe o impacto ambiental do cambio climático en diferentes accidentes xeográficos ubicados en distintos continentes.

Nos traballos adxuntos pódese ver:

1. Imaxe satélite do accidente xeográfico.
2. Mapa coa localización do accidente xeográfico.
3. Riscos ambientais: resumo da problemática do cambio climático que está afectando a este accidente xeográfico.
4. Imaxes da apariencia do accidente xeográfico a pé de campo.

Proxecto MeteoEscolas na aula multisensorial

Durante o mes de outubro na aula multisensorial do centro realizamos actividades para coñecer a meteoroloxía do outono, así como dos elementos característicos desta estación.

Para isto, realizamos transvasamentos en auga con follas, landras, pico ou paus, investigando tamén as súas texturas e a súa flotabilidade.

Do mesmo xeito, empregamos a mesa de luz para experimentar co nome desta estación, coñecer as letras que o compoñen e xogar con follas translúcidas.

Tamén puxemos a funcionar os nosos oídos escoitando a chuvia que tanto nos está a acompañar. Para poder facelo só tivemos que abrir a fiestra e tamén nos axudamos dun obxecto que simula o son deste fenómeno. Ademais, rematamos coa reprodución da peza "Outono" de Vivaldi. Pasámolo en grande!

Dentro do Proxecto MeteoEscolas, o alumnado de 2º ESO desenvolveu un proxecto na terceira avaliación que consistiu en analizar dende o punto de vista estatístico os días de chuvia en distintas estacións meteorolóxicas próximas ao centro. 

Para a realización da tarefa o alumnado empregou a folla de cálculo LibreOffice Calc, importando os datos descargados dende a páxina de MeteoGalicia. Cada persoa analizou un ano e realizou un conteo do número de días de chuvia mensuais, calculou a media, a mediana e a moda, e elaborou gráficos estatísticos e a táboa de frecuencias.

Nos documentos adxuntos poden consultarse algúns exemplos das tarefas entregadas.

PROXECTO METEOESCOLAS EN 1º ESO

No curso 2022-2023, o alumnado de 1º ESO participou no Proxecto Meteoescolas levando a cabo pequenos proxectos colaborativos para o estudo do clima en diversos concellos galegos. Este proxecto foi avaliábel e formou parte da cualificación final da 1ª avaliación.

O obxectivo principal deste proxecto era o estudo da diversidade do clima galego, realizando comparacións entre a climatoloxía de costa e de interior, de concellos do norte e do sur de Galicia. Concretamente, o alumnado investigou a respecto da temperatura, a pluviosidade, o vento e a presión atmosférica. Acompañando estes datos, cada parella ou pequeno grupo presentaba brevemente o concello obxecto de estudo, xunto con algunhas imaxes representativas dos espazos do patrimonio natural e etnográfico do municipio.

Para a investigación, o alumnado estudou as estacións meteorolóxicas de distintas localidades galegas, inseridas en Meteogalicia, e consultáronse outras páxinas web relativas á climatoloxía, que tiveron que identificar e analizar:

www.meteogalicia.gal

www.windguru.cz

www.eltiempo.es

O xurado do III Concurso de fotografía meteorolóxica, composto por docentes que participan no Plan Proxecta Meteoescolas, seleccionou aos seguintes gañadores entre todas as participacións:

Na categoría de 1º a 3º de Ed. Primaria:

-1º posto: Carla Docampo

- 2º posto: Sara Cela

- 3º posto: Antón Freire

Gañadores posando co seu agasallo (Carla Docampo, Antón Freire e Sara Cela)

Na categoría de 4º a 6 de Ed. Primaria:

- 1º posto: Lois Giráldez

- 2º posto: Daniela Rial

- 3º posto: Daniela Lucas

Gañadores posando co seu agasallo (Daniela Lucas, Lois Giráldez e Daniela Rial)

Na categoría de 1º e 2º Ed. Secundaria:

- 1º posto: Unai Pombal

- 2º posto: Unai Pombal

- 3º posto: Leo Álvarez

Gañadores posando co seu agasallo (Unai Pombal e Leo Álvarez)

Na categoría de adultos:

- 1º posto: Mª Luísa Aldao

- 2º posto: Carla Iglesias

- 3º posto: Isabel Martínez

Gañadoras posando co seu agasallo (Isabel Martínez, Luísa Aldao e Carla Iglesias)

No ficheiro adxunto pódense admirar todas as fotografías gañadoras. 

Este ano a participación no concurso foi ampla e variada, con alumnado de Ed.Primaria e Secundaria e profesorado e persoal non docente. No seguinte vídeo están recollidas todas as imaxes que foron achegadas. Axiña teremos aos gañadores do concurso!

Dentro do proxecto de Meteoescolas, o alumnado de 2º ESO estivo realizando un traballo de investigación na materia de Xeografía e Historia no que tiveron que buscar imaxes sobre os distintos tipos de paisaxes que existen no territorio español, e relacionalos coas características climatolóxicas asociadas a cada tipo, co fin de amosar a influencia do clima sobre as características paisaxísticas.

Para facer este traballo formaron grupos de 4 persoas, nos que crearon unha presentación seguindo as indicacións da Guía da actividade (ver adxunto).

Os mellores traballos aparecen recollidos na documentación adxunta.

Durante o primeiro trimestre, na materia de Ciencias Sociais realizamos un proxecto na aula de 4ºA de Primaria.

Este proxecto chamouse "A Terra" e cada alumno fíxose experto de contidos específicos. Entre outros, traballamos a atmosfera, o tempo atmosférico, a medición do tempo atmosférico e os diferentes climas.

Resultou moi motivador traballar estos contidos a través de grupos de expertos dentro dun proxecto.

O CPI de Cova Terreña convoca o III Concurso de fotografía meteorolóxica para celebrar o Día Mundial da Meteoroloxía, que se celebra o 23 de marzo.

Todos aqueles que desexen participar deben mandar as súas fotografías e pareados (en galego) a meteocova@gmail.com, indicando o nome e o curso. Establécense diferentes categorías para alumnado e persoal do centro.

A data límite de entrega é o 30 de marzo. Os premios serán entregados á volta de Semana Santa.

Consulta as bases completas aquí

O alumnado de 1º ESO encárgase, outro ano máis, da recollida de datos na estación meteorolóxica da escola.

Por grupos, cada semana toman medida das precipitacións coa axuda do pluviómetro e da temperatura mínima e máxima. Para facer esta medida, este curso contamos cun novo termómetro que veu substituír ao que tantos anos e tan ben nos serviu

Todos os días a primeiriña hora da mañá,  miramos como está o tempo e poñemos a etiqueta no mural da asemblea diaria. Así sabemos si nos temos que abrigar máis ou menos, ou si vai chover, si teremos a oportunidade de ver o arco da vella, ou si teremos que quitar o abrigo porque vai calor

Aproveitamos a sarabia que caeu no patio de recreo para comprobar os distintos estados da auga na natureza, cun experimento moi interesante:

 Miramos como caía a sarabia. Logo manipulámola e xogamos con ela. ¿Que frío nas mans! Podes pinchar no título A SARABIA si queres ver o video

A SARABIA

despois puxemos un pouquiño na calefacción da aula

e un tempiño despois descubrimos que se convertera en auga, por mor da calor

 Foi moi divertido!!!

O traballo desenvolvido dentro do Plan Proxecta MeteoEscolas o curso 21/22 foi avaliado moi positivamente, tanto é así que o noso proxecto foi recoñecido cun diploma de excelencia que así o acredita.

Ademais, como premio recibimos unha manga de vento para completar a nosa estación meteorolóxica, de xeito que agora podemos tomar medidas dos refachos de vento no noso centro. 

Este curso continuaremos traballando entre todas/os para continuar na mesma boa liña. 

Ao longo da 2ª avaliación o alumnado de Ciencias aplicadas de 4º ESO levou a cabo en equipos de 3-4 alumnos/as un EXPERIMENTO PARA ESTUDAR OS EFECTOS DA CHUVIA ÁCIDA NAS PLANTAS empregando un modelo e transmitindo aos seus compañeiros e compañeiras a análise dos seus resultados e as súas CONCLUSIÓNS nunha EXPOSICIÓN coa axuda dunha PRESENTACIÓN DIXITAL.

Estes foron os equipos:

Abraham, Yaiza e Óscar  Iván, Brais e Sergio 

Antía, Zaira e Noa Martínez Noa Vasc., Ana, Alba Rguez, Lara

Alba Vidal, Antón, Diego e Pedro

Os equipos durante as súas exposicións explicáronnos:

A chuvia ácida é calquera precipitación que presente elevadas concentracións de ácidos, en particular ácido sulfúrico e nítrico. Ten a súa orixe nas emisións á atmosfera de gases coma os óxidos de nitróxeno e de xofre que, ao combinarse coas partículas de auga presentes no aire, forman ácidos (ácido nítrico e sulfúrico) que se disolven nas gotiñas de auga das nubes. O vento as propaga, incluso a centos de kilómetros, e finalmente precipitan sobre o solo, a vexetación e os lagos, provocando diversos danos a estes ecosistemas:

Aumento da acidez da auga e do solo que produce o dano e ata a morte directa de plantas e de animais, algas e plantas acuáticas, mobilización de metais tóxicos como o cadmio e o mercurio e incluso dano nos edificios.

Estes gases de nitróxeno e xofre proceden principalmente da queima de combustibles fósiles coma o carbón e os derivados do petróleo. Logo a solución pasa pola redución do emprego deste tipo de combustibles para a obtención da enerxía, fomentar o aforro enerxético e substituir progresivamente esta fonte de enerxía polas enerxías renovables.

Os equipos puxeron exemplos de situacións nas que a chuvia ácida ten provocado danos aos bosques, entre eles, o risco de chuvia ácida que se viviu durante a erupción do volcán na illa da Palma.

No experimento empregaron un modelo baseado na xermolación de sementes en distintas condicións de acidez: sementaron lentellas e as regaron con disolucións de concentracións crecentes de vinagre (este é o ácido que simula a acción dos ácidos da chuvia ácida).

Os resultados non foron os desexados, agás nun dos equipos, no que si que se verificou que as plantas creceron máis canta menos cantidade de ácido contiña a auga de rego.

Para levar a cabo o experimento os equipos seguiron o método científico, apuntando cada día de rego os datos de crecemento das plantas nunha táboa para logo analizalos realizando unha gráfica. Nesta gráfica amósase como inflúe a crecente concentración de ácido na disminución do crecemento medio das plantas.

Este traballo foi exposto nun dos stands da Feria da Ciencia deste curso co seguinte cartel expositor xunto ás plantas en crecemento:

O alumnado de 3º ESO analizou os datos de temperaturas máximas e mínimas rexistradas nas últimas décadas e traballou na folla de cálculo para determinar os cambios ocorridos nese tempo.

Nos arquivos adxuntos poden consultarse algúns dos traballos desenvolvidos.

O alumnado de lingua galega de 1º da ESO estivo a pesquisar nalgúns dos libros que tiñan a man a frecuencia con que aparecían os fenómenos meteorolóxicos entre as súas páxinas. Para a súa sorpresa, practicamente en todos os libros de consulta, escollidos de xeito totalmente aleatorio, contiñan xa nas súas primeiras páxinas varios destes fenómenos que foron recollendo, definindo e anotando os datos da edición literaria para iren elaborando unha presentación que recollese os froitos da súa pesquisa.

Eis os resultados.

O alumnado de 2ºESO que aprobou a materia trala 3ª avaliación desenvolveu actividades de ampliación durante o mes de xuño relacionadas co Plan Proxecta MeteoEscolas, no que o centro participa dende hai varios cursos, e co Proxecto de Innovación en Dinamización Lingüística.

Desta volta, o mes de xuño aproveitouse para analizar distintas características da chuvia recollida na última década nas sete principais cidades galegas (Lugo, Ourense, Pontevedra, Vigo, Santiago de Compostela, A Coruña e Ferrol). O periodo analizado foi do 1 de xaneiro de 2011 ata o 31 de maio de 2022 (con algunha excepción nas cidades nas que non había rexistros tan antigos).

Distribuidos en grupos, debían analizar os datos dispoñibles na páxina de MeteoGalicia dunha das cidades e respostar ás seguintes cuestións:

• Que clima caracteriza a cidade atendendo á precipitación total anual?
• Cales son os meses nos que chove máis?
• Como é a chuvia: poucos días pero intensos ou moitos días pouco intensos?
• Que variación porcentual de chuvia total anual se rexistrou en 2021 con respecto a 2011?
• Como está sendo 2022? Cal é a variación porcentual mensual de chuvia recollida en 2022 con respecto a 2021?

Para a realización da tarefa o alumnado empregou a folla de cálculo LibreOffice Calc, importando os datos descargados dende a páxina de MeteoGalicia. 

Todo o traballo desenvolveuse en galego, de xeito que o alumnado traballou conceptos científico-matemáticos nesta lingua, deixando a un lado o castelán habitual e demostrando que a ciencia e a tecnoloxía non entende de fronteiras idiomáticas.

Nos documentos adxuntos poden consultarse as instrucións proporcionadas ao alumnado e as cuesións plantexadas, así como algúns exemplos das tarefas entregadas.