O alumnado participante no club de lectura de 1º ESO quedou o pasado 21 de febreiro para continuar co proxecto que os ocupa. E como é un segredo... non quedou rexistro en imaxes! Agardamos ter noticias axiña para poder adiantar o que artellan

Bos días:

Hoxe visitounos no centro Victoria, médica encargado das charlas que se imparten en 1º da ESO. Esta actividade forma parte do Plan Proxecta clases sen fume.

O obxectivo da charla é concienciar ao alumnado dos danos que provoca o tabaco; explicarlles as estratexias da industria tabaqueira para captalos como clientes e darlles as ferramentas necesarias para que eviten caer nesa adicción.

Dende o Departamento de Orientación organizouse unha formación para o alumnado de 1º ESO  a cargo do colectivo Alborada. Ao longo de dúas sesións, alumnos e alumnas tiveron a ocasión de comprender pormenorizadamente os cambios físicos propios da adolescencia que están a experimentar. Relacionado con isto, aprenderon sobre a hixiene menstrual, tanto nenos coma nenas. Os distintos tipos de relacións tamén foron tratadas, promovendo unha actitude aberta e de respecto.

Alumnado de 1º ESO A durante o obradoiro de María, do colectivo Alborada.

O alumnado de 1º ESO comezou a rexistrar os datos da estación meteorolóxica que temos na escola (temperatura máxima  e mínima e precipitacións). Ditos datos poden ser consultados na páxina web de meteogalicia.

Alumnado de 1º ESO A

O pasado luns 13 de decembro, reunímonos para falar sobre o libro Cartas de inverno, en versión novela gráfica, de Antonio Seijas. Esta primeira reunión co grupo de 1º da ESO deu para moito xa que, ademais de intercambiar opinións sobre un libro que "hai que ler de día" pola sensación de medo que transmite, foi o xermolo dun proxecto a maior escala do que vos manteremos informados!

Estela, Lucía, Bruno, Aitor, Adri, Lía, Xiana, Uxía e Ainoa, acompañados de dúas profesoras.

O alumnado de 1ºESO participará por tercer ano no proxecto Inspira STEAM. Trátase dun proxecto pioneiro en Euskadi e promovido pola Universidade de vigo para o fomento das vocacións científico-tecnolóxicas entras as rapazas a través de accións de sensibilización e orientación que impartirán mulleres e homes profesionais do mundo da investigación, da ciencia e da tecnoloxía.

O CPI Cova Terreña ven participando dende a súa implantación na comunidade Galega dende fai 4 anos. Contaremos este curso con 3 mentoras e 3 mentores procedentes de diferentes ámbitos como a Universidade de Vigo e empresas privadas como Gradiant Technologies y Optare Solutions.

O proxecto realizarase dentro do horario lectivo e conta cun total de 6 sesións que comezarán mañá 15 de decembro e finalizarán o 7 de febreiro.

O alumnado participante deberá cubrir o seguinte cuestionario antes da primeira sesión:

https://forms.gle/hh7p4NEZ5QSz3bedA

Para máis información, visita a páxina web do proxecto.

Na materia de Xeografía e Historia,
como parte do proxecto de Meteoescolas, durante este primeiro
trimestre o alumnado de 1º ESO estivo consultando en MeteoGalicia
os datos de temperaturas, precipitacións e refacho máximo de varias estacións
meteorolóxicas repartidas por toda Galicia. A finalidade deste proxecto era que
o alumnado fose capaz de explicar cal é a relación que existe entre a presenza
das borrascas e os anticiclóns e as variacións dos datos meteorolóxicos.

Nos arquivos adxuntos pódese consultar a guía con
todos os pasos que o alumnado tivo que realizar para desenvolver este proxecto,
así como os mellores traballos resultantes do mesmo.

O 4 e 5 de novembro, o alumnado de 1º da ESO visitou, en colaboración co Departamento de Educación Física, o Esteiro da Foz e a praia da Ladeira para observar as aves que nos visitan na súa migración invernal. Esta viaxe, tan longa, ten que ser feita con paradas estratéxicas que lles permitan ás aves recuperar as enerxías perdidas. E por sorte para nós, un dos lugares escollidos é o Esteiro da Foz.

Alumnado de 1º ESO C

Deste xeito, puidemos observar, e debuxar, biluricos, mazaricos, gavitas ou garzotas brancas. Todo coas explicacións do ornitólogo Manuel.

Mazarico real

Garzota branca

Este martes 23 de novembro o alumnado de 1º da ESO visitou a Biblioteca Municipal de Baiona, actividade organizada polos Departamentos de Lingua castelá, Lingua galega e a Biblioteca do centro.

A rapazada coñeceu as dependencias da man de Cristina Vilar, a quen lle agradecemos moito as súas instrutivas explicacións, e até algunhas rapazas se animaron a recrear unha pequena función de monicreques.

Parte do alumnado de 1ºA (Leo, Aitor, Lucía, Carolina, Antón, Lucas, Iago e Benjamín) con Cristina.

Grupo de 1ºC (David, Lucía Sarmiento, Raquel, Alejandra, Aitana, Lola, Leyre, Lucía Alonso, Catalina, Sarai, Sara, Adriana, Sindo e Uxía) con Ana Zamorano.

 Parte do grupo de 1ºA: espectadores (Ángel, Daniel, David, Mateo e Mario) e actrices (Rosana, Inés, Laura e Ciara).

 Parte do grupo de 1ºB (Uxía, Xiana e Lía) representando o conto do Coelliño Branco.

Bos días:

Tras 10 minutos de recollida selectiva de lixo por parte do alumnado de 1º da ESO, este é o resultado:

Máis de 500 cabichas recollidas en diferentes zonas: praia, parque, aceras...

Tras un xesto tan habitual como tirar un cigarro, ocúltase un residuo altamente prexudicial para a nosa contorna. Estes restos coas súas máis de 4000 substancias tóxicas contaminan as nosas augas e poden permanecer ata 12 anos na natureza. Ademais o seu destino final sempre é o mesmo: o mar.

Esta actividade forma parte do Clases sen fume.

Na última reunión do curso coa rapazada de 1º da ESO falamos de Cartas de inverno, de Agustín Fernández Paz. Este clásico da literatura galega fai unha aproximación á literatura de misterio e medo, homenaxeando aos libros de H.P. Lovecraft.

A técnica epistolar, con distintos narradores, chamou a atención entre o alumnado, permitindo un interesante intercambio de pareceres. Por  outra banda, as sensacións de desacougo que transmite o autor nesta inquietante obra produciron opinións encontradas entre os lectores.

A mansión de Doroña, a súa historia na vida real e as lendas de mouros, tan presentes na nosa cultura, foron analizadas polos rapaces e rapazas. Tivemos a ocasión tamén de poñernos no papel dos personaxes principais e especular sobre a nosa actuación: abandonariamos ao noso amigo ou iriamos ao seu rescate? Houbo ideas para todos os gustos...

Esta reunión constituíu un punto e seguido nas andanzas do club. Esperamos continuar o próximo curso!

Bos días:

O alumnado de 1º da ESO puido visitar unha das xoias da nosa comarca: os petróglifos de Outeiro dos Lameiros. Este conxunto de arte lítico atópase na serra da Groba. Constitúe unha das pegadas dos asentamentos humanos que habitaban nestes paraxes fai miles de anos.

A actividade forma parte do programa de promoción da actividade física no horario lectivo. Ademais de facer exercicio, realizando un percorrido a pé duns 10 quilómetros, tamén aproveitaron para:

• Recoñecer a fauna e a flora do lugar
• Dominar o vocabulario en lingua galega dos diferentes organismos
• Coñecer a nosa contorna e poñela en valor
• Mellorar a capacidade de orientación co uso do mapa e o compás
• Planificar os materias que temos que levar nunha saída (auga, comida, roupa, calzado, crema solar...)
• Coñecer a toponimia do lugar
• Coñecer o noso patrimonio arqueolóxico

No desenvolvemento desta iniciativa traballaron conxuntamente os departamentos de Lingua Galega, Bioloxía e Xeoloxía, Promoción de Estilos de vida saudables, Xeografía e Historia e Educación Física.

Agradecemos a dedicación do IEM (Instituto de estudos miñoráns) pola charla oferecida e ao  profesorado acompañante: Rocío, Iria, Antonio, Luisa e Óscar.

A segunda lectura do club de 1º da ESO  foi Contos para nenos peculiares, de Ransom Riggs.

Nun mundo ficticio, de imaxinación desbordante, atopamos historias como as que aquí se escriben. Contos nos que podemos facer dúas ou tres lecturas e atopar sempre pormenores fascinantes e imprevistos.
Entre os relatos que máis gustaron, podemos destacar os Caníbales espléndidos, onde xa o título nos deixa entrever as extravagancias que se contan. Máis aló do disparatado que pode ser que unhas persoas coman as outras ou que estas rexeneren os seus membros, atopamos aquí unha vívida metáfora do mundo capitalista en que nos movemos, trampas incluídas.
O tema que trata a historia de A princesa que tiña a lingua bífida, enfócase en como os prexuízos e as intolerancias sobre o diferente poden afastar de nós ás persoas que nos rodean. Aínda así, hai xente que é quen de sobrepoñerse a estas situacións sen caer en malos modos coa súa contorna nin tomar accións de vinganza.
En conclusión, esta obra fornécenos duns coñecementos e valores moi necesarios no noso xeito de interactuar socialmente que nos afastan do egoísmo e o individualismo imperante.

A adolescencia é un período cheo de cambios físicos, entre os cales sen inclúe a menstruación. Na sociedade existen numerosos tabús ó respecto, polo que é necesario dotar dos coñecementos necesarios ó noso alumnado, tanto nenos coma nenas. Deste xeito, contribuímos a eliminar as barreiras que as mulleres teñen por causa do seu xénero.

Para chegar a tal fin, os estudantes de 1º da ESO recibiron un obradoiro afectivo sexual centrado na menstruación.

Dentro do Plan, na titoría de 1º ESO B fixemos unha serie de actividades dirixidas a comprender a publicidade.

En primeiro lugar, valoramos produtos superfluos partindo do seguinte texto do Principiño, de A. De Saint-Exupêry:

- Bos días – dixo o principiño.

- Bos días – dixo o comerciante

Era un comerciante de pílulas perfeccionadas que quitan a sede. Engúlense unha por semana e vanse as ganas de beber.

- Por que vender iso? – preguntou o principiño.

- Porque con isto afórrase moito tempo. Os expertos fixeron cálculos e aforran cincuenta e tres minutos á semana.

- E que se fai con eses cincuenta e tres minutos?

- Cada un fai deles o que quere...

            Eu - pensou o principiño – se tivera cincuenta e tres minutos, camiñaría paseniñamente cara a unha fonte.

       Así, puidemos reflexionar sobre a necesidade de mercar todo o que se anuncia na televisión.

A continuación, tamén analizamos as distintas estratexias da publicidade, onde nos poden crear o desexo de comprar a través da opinión de expertos, rememorando outros tempos ou amosando unha situación divertida.

O alumnado de 1ºESO acaba de finalizar esta semana a súa participación no proxecto Inspira STEAM despois de 6 sesións que comezaron o día 18 de marzo baixo a coordinación do departamento de Tecnoloxía

Inspira STEAM é un proxecto promovido pola Universidade de Deusto que conta coa colaboración hoxe en día de 9 universidades españolas, entre elas a Universidade de Vigo dende a súa 3ª edición. Este proxecto é pioneiro no fomento da vocación científico-tecnolóxica entre a rapazada, baseado nas accións de sensibilización e orientación, que imparten mulleres profesionais do mundo da investigación, ciencia e tecnoloxía a través do mentoring grupal. Os seus obxectivos principais son o fomento das STEAM (Science, Technology, Engineering, Arts and Maths) entre estudantes, a visualización da muller, pór en valor a igualdade de capacidades entre homes e mulleres, a identificación dos estereotipos de xéneros, entre outros, coa finalidade de contribuir ao empoderamento das mulleres. 

Este curso 2020/21, o alumnado do CPI Cova Terreña contou coa disposición de catro mentoras e dous mentores procedentes de diferentes empresas e organismos da contorna relacionados co ámbito tecnolóxico. Grazas a súa implicación e entusiasmo o alumnado puido desfrutar destas experiencias de forma satisfactoria á que cada ano únense máis centros ao longo do país.

Esta actividade sumase ás desenvolvidas dentro do Plan Proxecta Rapazas emprendedoras nas TIC.

6ª muller – día 17 de marzo

A muller que procurabamos o día 16 de marzo era Sonia Villapol Salgado.

Vida

Nada en Bretoña o 8 de maio de 1977.

Estudou Bioloxía na Universidade de Santiago de Compostela, especializándose en Bioloxía molecular e Biotecnoloxía en 2003. Completou os seus estudos cun máster en Neurociencia e iniciou os estudos de doutoramento na Universidade Autònoma de Barcelona nos campos da Bioloxía celular, a Fisioloxía e a Inmunoloxía, que finalizou no 2007 coa lectura da súa tese sobre os mecanismos da morte celular no cerebro.

Traballo

Foi investigadora posdoutoral no Centre National de la Recherche Scientifique da Universidade Pierre et Marie Curie en Francia e logo no Instituto Nacional Francés de Investigacións en Saúde e Medicina (INSERM) en París. Posteriormente trasladouse aos Estados Unidos onde exerce como Neurocientífica no Texas Medical Center de Houston, ademais de ser unha das colaboradoras do Instituto Nacional de Saúde (NIH) e do Centro de Neurociencias e Medicina Rexenerativa.

Alén diso, en 2014 iniciou a súa etapa docente como profesora asistente no Departamento de Neurociencia da Universidade de Georgetown e hoxe en día forma parte do Equipo de Investigación Internacional da Covid-19, ocupándose dos estudos sobre o dano que este virus provoca no cerebro e no sistema nervioso.

E quen foi a persoa que máis axiña deu no albo o 17de marzo?

Pois... Emma González Leyenda de 1ºB!!

5ª muller – día 16 de marzo

A muller que procurabamos o día 16 de marzo era Ramona Vaamonde Fernández.

Vida

Ramona Vaamonde Fernández naceu en Santiago de Compostela o 28 de abril de 1907 e morreu na mesma cidade o 8 de agosto de 1997. Era filla do doutor Joaquín Vaamonde Rodríguez, médico compostelán pioneiro da Radioloxía en Galicia.

Licenciouse en Farmacia pola Universidade de Santiago de Compostela en 1930, con Premio Extraordinario de Licenciatura e con 12 sobresalientes e matrículas de honra das 14 materias da carreira. En 1937, durante a Guerra Civil e na súa etapa no Laboratorio de Farmacia Militar de Santiago, obtivo o título de enfermeira. Doutorouse en 1957 cunha tese sobre o metabolismo dos ácidos nucleicos das bacterias.

Traballo

Desde 1967 exerceu como profesora de Microbioloxía e Técnica microbiolóxica; nese mesmo ano tamén foi nomeada profesora agregada de Parasitoloxía. En setembro de 1975, detectou moi axiña en Santiago de Compostela a presenza do virus do cólera evitando así unha pandemia. Xubilouse en 1977.

Repercusión

Entre os recoñecementos que recibiu destaca que recentemente foi rescatada do esquecemento para pasar a formar parte do Álbum de Mulleres do Consello da Cultura Galega.

E quen foi a persoa que máis axiña deu no albo o 16 de marzo?

Pois…Jara Otero Gelpi de 1ºA!!

4ª muller – día 15 de marzo

A muller que procurabamos o día 15 de marzo era Antonia Ferrín Moreiras.

Vida

Antonia Ferrín Moreiras, tamén coñecida como a galega que se namorou das estrelas, naceu en Ourense o 13 de maio de 1914 e finou en Santiago de Compostela o 6 de agosto de 2009.

A súa familia era humilde, pero os seus pais quixeron que as súas catro fillas tiveran estudos superiores, polo que se trasladaron a Santiago de Compostela.

En 1930, Antonia comezou os seus estudos superiores na Facultade de Ciencias da USC; a situación económica da súa familia propiciou que tivese a matrícula gratuíta e que se lle concedesen bolsas, grazas ás que, na época da II República (concretamente, en 1935), Ferrín puido licenciarse en Química e acadar o título de Maestra Nacional.

Traballo

Ao rematar a carreira, Ferrín comezou a traballar como profesora axudante en prácticas das materias de Física e Matemáticas da Facultade de Ciencias e como axudante interina no Departamento de Ciencias do Instituto Arcebispo Xelmírez de Santiago. Ao mesmo tempo, estudaba a carreira de Farmacia. En 1937, despois do estourido da Guerra Civil, sancionárona pola súa ideoloxía política e abríronlle un expediente de depuración por unha denuncia anónima. Por esta razón foi sancionada e apartada da docencia na Universidade, ata que se revisou a súa causa e puido volver exercer. Da man de Ramón María Aller -director e fundador do Observatorio Astronómico da USC- introduciuse no mundo da Astronomía e converteuse na primeira astrónoma galega. En 1950, conseguiu licenciarse en Matemáticas na Universidade Central de Madrid estudando como alumna libre os últimos tres años de carreira. Entre 1954 y 1956 acadou o doutoramento en Astronomía en Madrid. Ferrín foi a primeira muller profesora da Facultade de Ciencias da USC. En 1963 leu a súa tese de doutoramento, a primeira que trataba de Astronomía defendida por unha muller en España. Traballou como profesora adxunta de diferentes cátedras ao longo da súa vida, como a de Estadística ou a de Astronomía da Facultade de Matemáticas. Xubilouse en 1984.

Repercusión

O labor de Antonia Ferrín foi recoñecido con diferentes honores, como a súa inclusión, en 2018, na Táboa Periódica das Científicas ou o seu nomeamento como madriña no 50º aniversario da Facultade de Matemáticas da USC.

E quen foi a persoa que máis axiña deu no albo o 15 de marzo?

Pois…Nadia Rodríguez Piñeiro de 1ºB!!