Biblioteca "Sebastián Buedo Jiménez", ¿seica non é para presumir?
Cando, ao inicio do curso, tivemos a primeira reunión do Club de Lectura de Adultos, varias nais das que alí participan expresaron con sinceridade unha opinión: A primeira vez que entraron na biblioteca "Sebastián Buedo Jiménez" do Instituto deulles sensación de desamparo, de baleiro. "Faltaba vida, faltaba cor, resultaba fría e desanxelada" era o que, máis o menos, viñan a dicir.
Os profes que alí estabamos tratamos de "parapetarnos" en razóns históricas que xustificaban tal situación -malia que, no fondo, compartiamos boa parte das sensacións. Pero tamén amosamos a esperanza de que a recén acadada axuda do Plan de Mellora das Bibliotecas (PLAMBE) axudase a cambiar as cousas.
Pois ben, comezando o segundo trimestre do curso xa empezan a verse os resultados. A primeira fase do plan de remodelación do mobiliario é todo un feito: Novos andeis para dar acubillo a todos os libros do fondo e nova distribución dos mesmos. Creación dun espazo para lectura pracenteira que xa está a ser utilizado e valorado polos usuarios. E moitos proxectos máis que iremos contando. O certo é que agora xa podemos empezar a presumir de "biblio' chula" .
Pero... non é diso do que a comunidade escolar do Aguiar quere presumir.
Presumimos de Equipo de Biblioteca (Francisco, Óscar, Elvira, Carme, José Manuel, Mª José, Lucía...) comprometido e activo. Coa imaxinación sempre en marcha e as mans listas para traballar no que sexa.
Presumimos do alumnado numeroso e creativo que se encargou no pintatiza de Nadal -coa inestimable e incombustible dinamización de José Manuel Rey Bao- de elaborar o estupendo mural de "Rosalía Pop" que ambienta o rincón de lectura.
Presumimos de personal non docente, especialmente Glenn, que colabora ata a extenuación aportando tamén ideas para a organización de espazos que nin se nos pasaran pola cabeza.
Presumimos de profesorado que cada vez saca máis partido á biblioteca, aos seus fondos e ás súas instalacións.
Presumimos de reunir periódicamente a máis de 200 rapaces nos Clubs de Lectura.
Presumimos dun Club de Lectura para nais, pais, profesoras e profesores.
Presumimos, en definitiva, de ir facendo unha biblioteca entre todos e para todos
Biblioteca "Sebastián Buedo Jiménez", ¿ seica non é para presumir?