Integración en Canadá

O profesor do Educación Física, Xosé M. García, participou nunha estadía no instituto canadense Bell High School, situado na capital Ottawa. Esta experiencia é unha das modalidades que ofrece o programa PIALE da Consellería de Educación para o profesorado galego. Trátase dun programa de inmersión total, neste caso en inglés, consistente na integración na vida escolar, sen obrigas lectivas, no centro escolar de Canadá.

A experiencia foi moi produtiva, segundo Xosé M. Por un lado, supón un pulo na mellora da competencia lingüística: mellora a confianza en canto á expresión e comprensión oral, a fala e a escoita, en inglés. O feito de ter que enfrontarse a situacións cotiás noutra lingua para resolver algúns problemas, ir ao teatro ou ter conversacións telefónicas, por exemplo, constitúe un reforzo e inflexión na aprendizaxe da lingua. Doutra banda, asistir ás clases da materia que impartes permite coñecer de primeira man o vocabulario específico, as expresións e o seu uso no contexto apropiado.

Por outro lado, a observación da práctica docente, da organización escolar ou tratamento da diversidade permite reflexionar sobre a propia práctica e realidade escolar. É interesante descubrir aspectos do sistema escolar transferibles ou adaptables nas nosas escolas, así como as boas prácticas. Neste sentido destacaría:

  • Organización de horarios e espazos: aulas para cada materia / profesor. Períodos lectivos máis longos e con descansos entre eles. Os alumnos trasládanse e non o profesor, de xeito que se gana en eficiencia.
  • Plan de estudos: reducir os contidos e as materias, adelgazar o currículo, dar prioridade ás tarefas e o traballo autónomos, ofrecer máis opcións para configurar o itinerario académico.
  • Agrupamentos: son máis flexibles e en liña coa alta flexibilidade dos itinerarios académicos de cada estudante. Non se fan sempre por idade ou curso, senón por opción persoal (cada alumno opta polas materias que desexa, cuns mínimos obrigatorios),  destreza ou coñecementos previos.
  • Titoría entre iguais: o alumnado de 12º grao (o equivalente a 2º de bacharelato) son titores dalgúns outros grupos, tamén nos aspectos académicos.

Moitos dos aspectos transferibles dependen de decisións que traspasan o ámbito dunha escola polo que dependen da vontade dos lexisladores e gobernantes. Pero algunhas das prácticas, especialmente no contexto da aula, si se poden implementar. En todo caso, debemos ter en conta que as sociedades sobre as que se asenta a escola non funcionan exactamente igual polo que cómpre reflexionar sobre o que pode encaixar ou non; non vale o copia e pega.

O profesorado de Educación Física da Bell HS impartía varias materias dentro do ámbito do departamento: Healthy Living and Personal and Fitness Activities, Healthy Living and Large-Group Activities, Introductory Kinesiology, Healthy Living and Rhythm and Movement Activities, entre outras. Estas foron o foco de observación durante a estadía e supuxo a parte máis interesante, máis aínda pola posibilidade de participar en actividades ligadas ao deporte nacional como o hóckey sobre xeo, algo bastante alleo á realidade galega. Porque outra das características das escolas é a excelente dotación en equipamento e espazos de que dispoñen; no caso da Bell HS tiña a súa disposición o Bell Arena (con pista de xeo regulamentaria), campo de béisbol, de fútbol, un sala de fitness e outra de spinning, un ximnasio e varios espazos máis para EF. En definitiva, asistir ás clases de Physed (Physical Education), como eles lle chaman, interactuar con alumnado e profesorado supuxo un reto enriquecedor.

O manexo da clase de  Physed é bastante similar ao que se leva a cabo en Galicia  pero a forma de organizar esta materia nas escolas difire polo optatividade das materias, a duración dos períodos lectivos (75 minutos) e o currículo. Con todo calquera estudante ou profesor galego non tardaría en adaptarse a estas clases (mesmo ao sosego e ausencia de ruído que caracterizan o desenvolvemento das clases en xeral)

Ademais, asistiu como observador a outras clases como  ESL (Inglés como Segunda Lingua), grupos onde se podía comprobar o grado de diversidade cultural das escolas canadenses e o tratamento do ensino da lingua. Tamén puido observar o desenvolvemento noutras áreas como Artes.

En definitiva, unha experiencia recomendable para todo docente e que, por outro lado, tamén nos fai ver que aquí, nas escolas galegas, tamén se está a innovar e a desenvolver moi boas prácticas.

 

 

O IES Laxeiro participa no XOGADE (deporte en idade escolar): campo a través en Silleda

Este mércores 4 celebrouse no recinto ferial da semana verde de Silleda unha nova edición do “Cross escolar”, actividade programada dentro do XOGADE que é o plan de deporte en idade escolar da Xunta de Galicia.
74 alumnos/as do IES Laxeiro de 1º, 2º e 3º da ESO tomaron parte nunha competición na que tiveron que facer un percorrido que rondaba 1 km de lonxitude, nunha mañá fría e solleira que permitiu desfrutar ao alumnado dunha xornada de actividade física ao aire libre. 
Salientar o bo comportamento de todos/as participantes, rematando con esforzo as súas probas e con resultados meritorios, con especial mención a Ihcene Bouchaila, que rematou en 2º posto na categoría infantil feminina e Jacobo Guerreiro que foi terceiro na cadete masculina.
Parabens a todos e un agradecemento especial ao profesorado que colaborou co departamento de EF (Sara e Mónica).

Para ver as fotos debes identificarte coa túa conta @ieslaxeiro.com

Educación STEM para o alumnado do Laxeiro.

Un grupo de alumnos e alumnas do IES participaron na semana STEM do 24 ao 30 de novembro. Un campamento de innovación educativa deseñado para espertar o interese na Ciencia, Tecnoloxía, Enxeñaría e Matemáticas, a través de actividades cun enfoque eminentemente Maker (aprender facendo).

Makey Makey, Microbit, Robótica, Xogos Matemáticos, Efecto invernadoiro ou Pegada ecolóxica, son algunhas das actividades realizadas polo noso alumnado e que abrangen as áreas inluídas no acrónimo STEM. Un acercamento interdisciplinar ao aprendizaxe que desenvolve habilidades como a investigación, o pensamento crítico, a solución de problemas, a creatividade, a comunicación e a colaboración.

Convocatoria STEM 2019-2020

Ver mais Fotos - >Fai Click sobre a imaxe...

ou ben en https://drive.google.com/open?id=1w6ql4g-231gkl9VTqdhzO8IGDaRZ2K2I

 

Novembro contra a violencia de xénero

O alumnado de 2º de ESO- A na materia de igualdade escribiu e realizou unha performance para o 25 de novembro, poñendo o acento en que as mozas non deben vestir nin comportarse segundo os estereotipos de xénero que a sociedade impón.


 

O alumnado de 2º de ESO-B da materia de Igualdade realiza unha performance para o 25 de novembro,  a partir dun poema de Ana Cerezuela (do seu libro "Lejos")

 

Máis alá da aula

E o día chegou. Un día cheo de emocións, de bágoas, un día no que Luís Gustavo foi quen de tirarnos aínda agora máis dun sorriso. Luís Gustavo era moito más ca un xefe de estudos. Moito máis ca un profesor de Física e Química. Moito máis ca un compañeiro. Moito máis ca un esposo. Moito máis ca un fillo. Moito máis ca un pai. Todo el era "moito máis".
Si, seino. Cando alguén morre, quen queda limítase a enxalzar todo canto de bo tivo a persoa que vén de falecer. Pero é tan diferente neste caso! Os testemuños aportados polo seu exalumnado, feito motu propio e dende o corazón, son unha proba diso. Pero a maior proba foi a cantidade de xente que onte veu ao noso centro. O noso salón de actos non estaba cheo, estábao máis. O vestíbulo, o patio de fóra... E non só era a cantidade, era o silencio, o respecto, a estima, o amor que se respiraba... e era tamén o orgullo de formar parte dunha comunidade educativa que responde cando hai que facelo, era o orgullo de profesora vendo a ese alumnado implicado, a ese alumnado músico, a ese alumnado silencioso, a ese alumnado axudante... Luís Gustavo estaba alí entre nós, sorrindo, orgulloso de que todo saíse ben. Sentín que ao rematar unha palmada súa me dicía cariñoso, vez máis: ves como non era para tanto? Sempre te pos demasiado nerviosa e sempre sae todo ben...
Seguimos chorándote, Luís Gustavo.

 

 

Na prensa:

https://www.lavozdegalicia.es/noticia/deza/2019/11/17/luis-gustavo-corazon-laxeiro/0003_201911D17C3991.html

https://www.farodevigo.es/portada-deza-tabeiros-montes/2019/11/17/o-ies-laxeiro-lembra-ao/2203775.html

120 minutos de actividade física no IES Laxeiro no Día Europeo do Deporte

O pasado venres 27 de setembro sumámonos as propostas para celebrar o Día Europeo do Deporte Escolar (# ESSD2019), alcanzando ese día 120 minutos de actividade física non centro, cunha ampla participación entre o alumnado. Unha xornada para visibilizar a necesidade de estar activos físicamente para gozar de calidade de vida xa que, como ten dito Noel Clarasó, “o corpo, se se trata ben, pode durar toda la vida”.

 

O IES Laxeiro participa na Semana Europea do Deporte

O IES Laxeiro fai un chamamento a todo o mundo, independentemente da súa idade ou dos seus antecedentes, para que se poñan en forma. O noso instituto apoia a campaña europea # BeActive, que promove o deporte e o exercicio para unha vida máis sa.

A inactividade física en Galicia, España e en toda Europa estase  estancando e mesmo diminuíndo nalgúns países, cun impacto negativo na calidade de vida das persoas, así como na economía. Segundo a Comisión Europea, a proporción de persoas que nunca fan exercicio ou practican deporte é  preocupantemente alta: o 35%! As rapazas teñen máis probabilidades que os nenos de facer menos exercicio ou deporte.
Galicia é a raíña do sedentarismo. Segundo os datos do Ministerio de Sanidade a comunidade encabeza todos os rankings de inactividade tanto femininos como masculinos, con máis dun 45 % de persoas maiores de 15 anos que non realizan ningunha actividade física no seu tempo libre. Neste sentido non sorprende que nos situemos entre as comunidades con maior índice de obesidade (superior ao 25 %, sendo só superados por Asturias), especialmente entre a poboación infantil.
Como parte da campaña # BeActive, a Semana Europea do Deporte (23-30 de setembro) organiza eventos numerosas cidades e vilas de España. Os eventos centraranse no deporte en escolas, lugares de traballo, ao aire libre, en clubs deportivos e ximnasios.
Desde o seu lanzamento fai cinco anos, máis de 40 millóns de persoas participaron en 38 países.
"A falta de actividade física no noso estilo de vida moderno provoca importantes problemas de saúde e custa miles de millóns ás nosas economías. Todos podemos ser activos de diferentes maneiras, desde camiñar un pouco ata correr un maratón. Fago un chamamento a todos para que se unan a nós na Semana Europea do Deporte", ten declarado o Comisario europeo responsable de Deportes, Tibor  Navracsics.
Finlandia, que actualmente ostenta a Presidencia da UE, inaugurará oficialmente a Semana o 23 de setembro cunha Cerimonia de Apertura en Espoo.
Non IES Laxeiro sumámonos a esta iniciativa e tamén celebramos o día 27 de setembro, día Europeo do Deporte Escolar (# ESSD2019), alcanzando ese día 120 minutos de actividade física non centro, e como broche final desta Semana Europea do Deporte. Neste período de tempo o alumnado participará nunha serie de actividades que engloban actividade física con música (aerobic, zumba, danza moderna), actividades multideportivas incluíndo xogos populares e recreativos e carreira polo Pontiñas.

Semana Europea del Deporte

European Week of Sport

Calendario de exames de setembro 2019

Publícanse nos seguintes arquivos os calendarios de exames de setembro do curso 2018-2019 no IES Laxeiro

 

Calendario de exames da ESO e FP Básica

 

Calendario de exames de Bacharelato e adultos

 

Caderno do proxecto Tunnel of Time

No caderno do proxecto podemos ollar o resultado das tarefas realizadas polos estudantes dos catro países socios. A versión impresa do caderno está dispoñible nos centros escolares da comarca, biblioteca así como nas institucións colaboradoras.

booklet_cover

Distribuir contido