Complementarias

EXERCICIO FÍSICO DESDE O CSAF PARA ALUMNADO DO LAXEIRO, AMSTERDAM E CERDEÑA. ERASMUS+ STASIETE

10/03/2023 22:22
Europe/Madrid

Dentro do amplo programa de eventos organizados co motivo da visita de alumnado e profesorado de Amsterdam e Cerdeña, correspondente ao proxecto STASIETE - ERASMUS + e centrado no desenvolvemento de hábitos de vida saudabeis, o alumnado de 2º curso do CSAF organizou dúas actividades dirixidas de acondicionamento físico con base musical. Esperamos que tanto o alumnado de 1º de BAC do Laxeiro como os nosos convidados teñan desfrutado e aproveitado a ocasión para fortalecer eses lazos de amizade e aprendizaxe mutua que veñen desenvolvendo con este proxecto educativo.

 

CONFERENCIA NO CSAF SOBRE REGULACIÓN LABORAL NOS SERVIZOS DE SALVAMENTO E SOCORRISMO

08/02/2023 16:38
Europe/Madrid

Este venres 3 o alumnado de 1º e 2º curso do CSAF asistiu a unha charla informativa organizada pola empresa "SALVAR, FORMAR Y SOCORRER, SL" para informar sobre a situación do marco lexislativo actual no ámbito dos servizos de salvamento e socorrismo acuático, tanto en piscinas como en espazos naturais. O noso alumando foi coñecedor das posibilidades que lles presenta este sector ao finalizar o ciclo ou ter algúns dos seus módulos cursados. A empresa organizadora xestiona na actualidade os servizos de salvamento e socorrismo dos concellos de Vigo e Sanxenxo, entre outros, cunha alta demanda de persoal cualificado para os 3 meses de verán, nunhas condicións laborais e uns requeitios de formación que foron explicados na charla. Desde o departamento de EF agradecemos o interese por manter informado ao noso alumnado e presentarlle unha posibilidade de desenvolvemento profesional.   

XOGOS TRADICIONAIS

23/06/2022 09:34
Europe/Madrid

Un ano máis dentro das actividades do ERASMUS+ " "21st Century Skills through Traditional Outdoor Games"   contamos coa colaboración de Luis Iglesias "Luchi" para desenvolver unha xornada de Xogos Tradicionais no IES Laxeiro. 

Deixamos unha pequena mostra gráfica dalgúns dos xogos realizados. 

RUTA POLO "CAMIÑO DE INVERNO

23/06/2022 08:58
Europe/Madrid

O pasado venres 17 o alumnado de 2º de ESO realizou 12 km do "Camiño de inverno" correspondentes a etapa "Rodeiro-Lalín". A actividade organizouse desde o departamento de EF en colaboración con docentes doutras materias e dentro do programa de actividades complementarias do centro e do ERASMUS+ "21st century skills through traditional outdoor games".

Deixamos algunha imaxes da actividade.

 

Proxecto TI© EMPRENDES

Temos Información relativa ao proxecto TI© EMPRENDES da Deputación de Pontevedra, cofinanciado polo Programa Operativo de Emprego Xuvenil do Fondo Social Europeo (axudas EMP-POEJ) e a Deputación de Pontevedra.

A datas previstas para empezar son a partir de setembro de 2020.

Desde o proxecto TI© EMPRENDES ofrécese:

–      11 itinerarios formativos de 125 horas de duración (100h. de formación específica e 25 de emprendemento): Formación específica (eminentemente práctica) en sectores co maior crecemento e demanda nos últimos anos como tecnoloxías da información e comunicación, turismo, lecer, deportes e restauración

–      Formación en autoemprego e/ou creación de empresas

Intercambio co Auguste Viktoria Schule de Itzehoe (Alemaña)

Elbphilarmonía

Un grupo de dezaseis estudantes de 3º de ESO participa no intercambio co Auguste Viktoria Schule (AVS),  situado na localidade alemá de Itzehoe, no estado federado de Schleswig-Holstein. Esta pequena cidade duns 30.000 habitantes atópase a 50 km de Hamburgo e acolle aos estudantes dezaos do 2 ao 9 de marzo. Alí conviven coas familias e asisten a clase no Gymnasium AVS, o equivalente aos nosos institutos pero que só acolle estudantes que optan  á universidade ou outros estudos superiores. A escola conta coa materia de español como optativa e son estes estudantes acollen aos do Laxeiro. Esta experiencia educativa permite a inmersión na cultura e vida diaria das familias alemás pois conviven con elas e asisten ás clases cos seus anfitrións. O programa tamén contempla actividades culturais e deportivas e a visita á cidade de Hamburgo. O alumnado da Auguste Viktoria Schule (AVS) estará no IES Laxeiro do 11 ao 17 de maio.

Excelente actuación do IES Laxeiro na fase zonal do campionato escolar de orientación

Este martes, 18 de febreiro, cincuenta estudantes de 2º de ESO do IES Laxeiro participaron no campionato zonal de orientación, celebrado no Casino Mercantil e Industrial de Pontevedra. Un total de seis centros escolares competiron na modalidade de carreira de orientación, na que o IES Laxeiro acadou un éxito notable. Na categoría máis concorrida (infantil) logramos meritorios postos.
Así, en infantil masculino, Luís Alejandro León Rivas, acadou o 2º posto seguido no 3º por Diego Carral García.
Na categoría infantil feminino Alicia Castro Sesto, Maria Jiménez Crespo e Carme Rivero Montoto coparon os postos 3º, 4º e 5º respectivamente.
Igualmente destacada foi a participación das/os deportistas lalinenses nas categorías cadete masculino e feminino.
A boa actuación de todas/os membros do equipo do IES Laxeiro, fixo que, na clasificación por equipos, quedaramos no 1º posto nas categorías infantil feminina e na suma das categorías infantil masculina e feminina. E nas categorías infantil masculino, cadete feminino e masculino concluímos cun notable terceiro posto por equipos.
A carreira de orientación é unha carreira individual, contra reloxo e en terreo descoñecido, na que o deportista ten que pasar por unha serie de puntos chamados controis, os cales están sinalados con exactitude no seu mapa, e situados no terreo mediante unha baliza. O deportista completará o percorrido máis ou menos rapidamente dependendo da súa habilidade para interpretar o mapa (xunto co apoio do compás) e o seu nivel de condición física.
Parabéns a todas/os participantes por ter gozado desta grata experiencia deportiva en contacto coa natureza e por apostar por un estilo de vida activo e saudable.

 

     orienta     

 

 

 

O IES Laxeiro participa no XOGADE (deporte en idade escolar): campo a través en Silleda

Este mércores 4 celebrouse no recinto ferial da semana verde de Silleda unha nova edición do “Cross escolar”, actividade programada dentro do XOGADE que é o plan de deporte en idade escolar da Xunta de Galicia.
74 alumnos/as do IES Laxeiro de 1º, 2º e 3º da ESO tomaron parte nunha competición na que tiveron que facer un percorrido que rondaba 1 km de lonxitude, nunha mañá fría e solleira que permitiu desfrutar ao alumnado dunha xornada de actividade física ao aire libre. 
Salientar o bo comportamento de todos/as participantes, rematando con esforzo as súas probas e con resultados meritorios, con especial mención a Ihcene Bouchaila, que rematou en 2º posto na categoría infantil feminina e Jacobo Guerreiro que foi terceiro na cadete masculina.
Parabens a todos e un agradecemento especial ao profesorado que colaborou co departamento de EF (Sara e Mónica).

Para ver as fotos debes identificarte coa túa conta @ieslaxeiro.com

120 minutos de actividade física no IES Laxeiro no Día Europeo do Deporte

O pasado venres 27 de setembro sumámonos as propostas para celebrar o Día Europeo do Deporte Escolar (# ESSD2019), alcanzando ese día 120 minutos de actividade física non centro, cunha ampla participación entre o alumnado. Unha xornada para visibilizar a necesidade de estar activos físicamente para gozar de calidade de vida xa que, como ten dito Noel Clarasó, “o corpo, se se trata ben, pode durar toda la vida”.

 

O IES Laxeiro participa na Semana Europea do Deporte

O IES Laxeiro fai un chamamento a todo o mundo, independentemente da súa idade ou dos seus antecedentes, para que se poñan en forma. O noso instituto apoia a campaña europea # BeActive, que promove o deporte e o exercicio para unha vida máis sa.

A inactividade física en Galicia, España e en toda Europa estase  estancando e mesmo diminuíndo nalgúns países, cun impacto negativo na calidade de vida das persoas, así como na economía. Segundo a Comisión Europea, a proporción de persoas que nunca fan exercicio ou practican deporte é  preocupantemente alta: o 35%! As rapazas teñen máis probabilidades que os nenos de facer menos exercicio ou deporte.
Galicia é a raíña do sedentarismo. Segundo os datos do Ministerio de Sanidade a comunidade encabeza todos os rankings de inactividade tanto femininos como masculinos, con máis dun 45 % de persoas maiores de 15 anos que non realizan ningunha actividade física no seu tempo libre. Neste sentido non sorprende que nos situemos entre as comunidades con maior índice de obesidade (superior ao 25 %, sendo só superados por Asturias), especialmente entre a poboación infantil.
Como parte da campaña # BeActive, a Semana Europea do Deporte (23-30 de setembro) organiza eventos numerosas cidades e vilas de España. Os eventos centraranse no deporte en escolas, lugares de traballo, ao aire libre, en clubs deportivos e ximnasios.
Desde o seu lanzamento fai cinco anos, máis de 40 millóns de persoas participaron en 38 países.
"A falta de actividade física no noso estilo de vida moderno provoca importantes problemas de saúde e custa miles de millóns ás nosas economías. Todos podemos ser activos de diferentes maneiras, desde camiñar un pouco ata correr un maratón. Fago un chamamento a todos para que se unan a nós na Semana Europea do Deporte", ten declarado o Comisario europeo responsable de Deportes, Tibor  Navracsics.
Finlandia, que actualmente ostenta a Presidencia da UE, inaugurará oficialmente a Semana o 23 de setembro cunha Cerimonia de Apertura en Espoo.
Non IES Laxeiro sumámonos a esta iniciativa e tamén celebramos o día 27 de setembro, día Europeo do Deporte Escolar (# ESSD2019), alcanzando ese día 120 minutos de actividade física non centro, e como broche final desta Semana Europea do Deporte. Neste período de tempo o alumnado participará nunha serie de actividades que engloban actividade física con música (aerobic, zumba, danza moderna), actividades multideportivas incluíndo xogos populares e recreativos e carreira polo Pontiñas.

Semana Europea del Deporte

European Week of Sport

Distribuir contido