Excelente actuación do IES Laxeiro na fase zonal do campionato escolar de orientación

Este martes, 18 de febreiro, cincuenta estudantes de 2º de ESO do IES Laxeiro participaron no campionato zonal de orientación, celebrado no Casino Mercantil e Industrial de Pontevedra. Un total de seis centros escolares competiron na modalidade de carreira de orientación, na que o IES Laxeiro acadou un éxito notable. Na categoría máis concorrida (infantil) logramos meritorios postos.
Así, en infantil masculino, Luís Alejandro León Rivas, acadou o 2º posto seguido no 3º por Diego Carral García.
Na categoría infantil feminino Alicia Castro Sesto, Maria Jiménez Crespo e Carme Rivero Montoto coparon os postos 3º, 4º e 5º respectivamente.
Igualmente destacada foi a participación das/os deportistas lalinenses nas categorías cadete masculino e feminino.
A boa actuación de todas/os membros do equipo do IES Laxeiro, fixo que, na clasificación por equipos, quedaramos no 1º posto nas categorías infantil feminina e na suma das categorías infantil masculina e feminina. E nas categorías infantil masculino, cadete feminino e masculino concluímos cun notable terceiro posto por equipos.
A carreira de orientación é unha carreira individual, contra reloxo e en terreo descoñecido, na que o deportista ten que pasar por unha serie de puntos chamados controis, os cales están sinalados con exactitude no seu mapa, e situados no terreo mediante unha baliza. O deportista completará o percorrido máis ou menos rapidamente dependendo da súa habilidade para interpretar o mapa (xunto co apoio do compás) e o seu nivel de condición física.
Parabéns a todas/os participantes por ter gozado desta grata experiencia deportiva en contacto coa natureza e por apostar por un estilo de vida activo e saudable.

 

     orienta     

 

 

 

O 1º Concurso de Ciencia "Luis Gustavo Rodríguez Taboada" amplia a súa recollida de traballos ata o 3 de abril

O xurado e o Equipo Directivo do IES Laxeiro toma a decisión de ampliar o prazo de presentación de traballos para esta 1ª edición ata o 3 de abril alegando motivos técnicos e informáticos de soporte  que crearon problemas a hora de enviar traballos. Ademais atendemos con esta decisión a petición de varios centros que nos solicitaban mais tempo para elaborar os seus proxectos.

Por estes motivos e comprendendo as dificultades que se orixinan na 1ª edición, anunciamos esta ampliación de prazo de entrega , facendo constar que todas as demais datas e prazos son as que figuran nas bases do concurso , polo que a resolución do xurado manterase para o 17 de maio, día no que se darán a coñecer os gañadores dos premios que figuran nas bases do concurso.

Agardamos que esta medida sirva para aumentar o número de participantes nas diferentes categorías.

Probas de acceso a Ciclos Medios e Superiores 2020

Convocadas as probas de acceso a Ciclos Medios e Superiores do ano 2020. No portal www.edu.xunta.es/fp pódese consultar toda a información relativa a esta convocatoria. Nos arquivos adxuntos podedes informarvos de todo o relativo ao proceso desta convocatoria.

 

- Orde do 8 de xaneiro que regula a convocatoria

- Calendario do proceso

- Información Probas de acceso a Ciclos Superiores

- Información Probas de acceso a Ciclos Medios

- Impreso de inscrición a Ciclos Superiores (ED312D)

- Impreso de inscrición a Ciclos Medios (ED312C)

 

Homenaxe a Miguelanxo Prado

 O próximo xoves cumprimos un dos nosos soños: recibir no noso centro a Miguelanxo Prado e nomear a aula de Plástica. Con el inauguramos asemade o Corredor das Artes.

 Autor de proxección internacional, os seus libros e cómics foron traducidos a moitos idiomas.
  A visión poética das historias, e un estilo que sen ser localista ten unha forte sensibilidade galega, fan deste autor un dos representantes máis internacionais da produción cultural galega.

Foi o deseñador da mascota oficial do programa infantil da TVG, o "Xabarín Club" e do elenco da serie de animación producida en Galicia "Os vixilantes do camiño".

Tamén traballou na serie de animación "Men In Black", producida por Steven Spielberg.

Realizou a longamentraxe animada "De profundis" con música do compositor Nani García, sen diálogos e que foi proposta para os premios Goya. Este traballo, experimental e sen diálogos foi debuxado enteiramente por el e animado con técnicas informáticas.

Sorteo da cesta do Nadal 2019 no IES Laxeiro

Efectuado o sorteo das rifas da cesta de nadal 2019, comunicamos que o número agraciado co premio foi o seguinte

 

                                                                               4777

Integración en Canadá

O profesor do Educación Física, Xosé M. García, participou nunha estadía no instituto canadense Bell High School, situado na capital Ottawa. Esta experiencia é unha das modalidades que ofrece o programa PIALE da Consellería de Educación para o profesorado galego. Trátase dun programa de inmersión total, neste caso en inglés, consistente na integración na vida escolar, sen obrigas lectivas, no centro escolar de Canadá.

A experiencia foi moi produtiva, segundo Xosé M. Por un lado, supón un pulo na mellora da competencia lingüística: mellora a confianza en canto á expresión e comprensión oral, a fala e a escoita, en inglés. O feito de ter que enfrontarse a situacións cotiás noutra lingua para resolver algúns problemas, ir ao teatro ou ter conversacións telefónicas, por exemplo, constitúe un reforzo e inflexión na aprendizaxe da lingua. Doutra banda, asistir ás clases da materia que impartes permite coñecer de primeira man o vocabulario específico, as expresións e o seu uso no contexto apropiado.

Por outro lado, a observación da práctica docente, da organización escolar ou tratamento da diversidade permite reflexionar sobre a propia práctica e realidade escolar. É interesante descubrir aspectos do sistema escolar transferibles ou adaptables nas nosas escolas, así como as boas prácticas. Neste sentido destacaría:

  • Organización de horarios e espazos: aulas para cada materia / profesor. Períodos lectivos máis longos e con descansos entre eles. Os alumnos trasládanse e non o profesor, de xeito que se gana en eficiencia.
  • Plan de estudos: reducir os contidos e as materias, adelgazar o currículo, dar prioridade ás tarefas e o traballo autónomos, ofrecer máis opcións para configurar o itinerario académico.
  • Agrupamentos: son máis flexibles e en liña coa alta flexibilidade dos itinerarios académicos de cada estudante. Non se fan sempre por idade ou curso, senón por opción persoal (cada alumno opta polas materias que desexa, cuns mínimos obrigatorios),  destreza ou coñecementos previos.
  • Titoría entre iguais: o alumnado de 12º grao (o equivalente a 2º de bacharelato) son titores dalgúns outros grupos, tamén nos aspectos académicos.

Moitos dos aspectos transferibles dependen de decisións que traspasan o ámbito dunha escola polo que dependen da vontade dos lexisladores e gobernantes. Pero algunhas das prácticas, especialmente no contexto da aula, si se poden implementar. En todo caso, debemos ter en conta que as sociedades sobre as que se asenta a escola non funcionan exactamente igual polo que cómpre reflexionar sobre o que pode encaixar ou non; non vale o copia e pega.

O profesorado de Educación Física da Bell HS impartía varias materias dentro do ámbito do departamento: Healthy Living and Personal and Fitness Activities, Healthy Living and Large-Group Activities, Introductory Kinesiology, Healthy Living and Rhythm and Movement Activities, entre outras. Estas foron o foco de observación durante a estadía e supuxo a parte máis interesante, máis aínda pola posibilidade de participar en actividades ligadas ao deporte nacional como o hóckey sobre xeo, algo bastante alleo á realidade galega. Porque outra das características das escolas é a excelente dotación en equipamento e espazos de que dispoñen; no caso da Bell HS tiña a súa disposición o Bell Arena (con pista de xeo regulamentaria), campo de béisbol, de fútbol, un sala de fitness e outra de spinning, un ximnasio e varios espazos máis para EF. En definitiva, asistir ás clases de Physed (Physical Education), como eles lle chaman, interactuar con alumnado e profesorado supuxo un reto enriquecedor.

O manexo da clase de  Physed é bastante similar ao que se leva a cabo en Galicia  pero a forma de organizar esta materia nas escolas difire polo optatividade das materias, a duración dos períodos lectivos (75 minutos) e o currículo. Con todo calquera estudante ou profesor galego non tardaría en adaptarse a estas clases (mesmo ao sosego e ausencia de ruído que caracterizan o desenvolvemento das clases en xeral)

Ademais, asistiu como observador a outras clases como  ESL (Inglés como Segunda Lingua), grupos onde se podía comprobar o grado de diversidade cultural das escolas canadenses e o tratamento do ensino da lingua. Tamén puido observar o desenvolvemento noutras áreas como Artes.

En definitiva, unha experiencia recomendable para todo docente e que, por outro lado, tamén nos fai ver que aquí, nas escolas galegas, tamén se está a innovar e a desenvolver moi boas prácticas.

 

 

O IES Laxeiro participa no XOGADE (deporte en idade escolar): campo a través en Silleda

Este mércores 4 celebrouse no recinto ferial da semana verde de Silleda unha nova edición do “Cross escolar”, actividade programada dentro do XOGADE que é o plan de deporte en idade escolar da Xunta de Galicia.
74 alumnos/as do IES Laxeiro de 1º, 2º e 3º da ESO tomaron parte nunha competición na que tiveron que facer un percorrido que rondaba 1 km de lonxitude, nunha mañá fría e solleira que permitiu desfrutar ao alumnado dunha xornada de actividade física ao aire libre. 
Salientar o bo comportamento de todos/as participantes, rematando con esforzo as súas probas e con resultados meritorios, con especial mención a Ihcene Bouchaila, que rematou en 2º posto na categoría infantil feminina e Jacobo Guerreiro que foi terceiro na cadete masculina.
Parabens a todos e un agradecemento especial ao profesorado que colaborou co departamento de EF (Sara e Mónica).

Para ver as fotos debes identificarte coa túa conta @ieslaxeiro.com

Educación STEM para o alumnado do Laxeiro.

Un grupo de alumnos e alumnas do IES participaron na semana STEM do 24 ao 30 de novembro. Un campamento de innovación educativa deseñado para espertar o interese na Ciencia, Tecnoloxía, Enxeñaría e Matemáticas, a través de actividades cun enfoque eminentemente Maker (aprender facendo).

Makey Makey, Microbit, Robótica, Xogos Matemáticos, Efecto invernadoiro ou Pegada ecolóxica, son algunhas das actividades realizadas polo noso alumnado e que abrangen as áreas inluídas no acrónimo STEM. Un acercamento interdisciplinar ao aprendizaxe que desenvolve habilidades como a investigación, o pensamento crítico, a solución de problemas, a creatividade, a comunicación e a colaboración.

Convocatoria STEM 2019-2020

Ver mais Fotos - >Fai Click sobre a imaxe...

ou ben en https://drive.google.com/open?id=1w6ql4g-231gkl9VTqdhzO8IGDaRZ2K2I

 

Novembro contra a violencia de xénero

O alumnado de 2º de ESO- A na materia de igualdade escribiu e realizou unha performance para o 25 de novembro, poñendo o acento en que as mozas non deben vestir nin comportarse segundo os estereotipos de xénero que a sociedade impón.


 

O alumnado de 2º de ESO-B da materia de Igualdade realiza unha performance para o 25 de novembro,  a partir dun poema de Ana Cerezuela (do seu libro "Lejos")

 

Distribuir contido