Escoitar, Aprender e Compartir

O alumnado do Ciclo Superior de Integración Social, malia cursar os seus estudos a distancia, tamén celebra o 8 de marzo co resto da comunidade educativa do IES de Chapela e quere compartir convosco unha mostra de vídeos, carteis, trípticos e infografías que fixeron como parte de distintas campañas que deseñaron para promover a igualdade de oportunidades entre mulleres e homes. Podedes acceder a estes materiais na seguinte ligazón:

 https://drive.google.com/drive/folders/1jijVVtz8d0fHKqo7CUEQzEvmjRFeYH6U?usp=sharing

Volveu o Entroido, ano 2022, IES de Chapela. Xa tiñamos experiencia en celebrar en medio da pandemia e a nosa comunidade educativa volveu a recibir estas datas como se merecen. Alumnado, persoal non docente e profesorado eleváronse en medio do fastío e cansazo que nos impoñen as nosas máscaras de resistencia, para participar activamente nesta festa da convivencia e non renunciarmos á alegría de existir, de reexistir e de resistir. O venres 25 regalámonos un dos mellores momentos do ano, e o pulo para chegar a un final de curso que comeza a albiscarse. Quen non se emocionou vendo bailar a toda esta mocidade, e non tan mocidade, ao ritmo das músicas e disfraces máis variados? De diúrno a modular, de 1º ESO a 2º Bacharelato ou aos ciclos de adultos, o noso Entroido petouno grazas a todas e a todos vós.

Máis abaixo tedes imaxes e vídeos dos mellores momentos deste Entroido que xa pasou, pero que seguiremos recordando. Grazas a todo o alumnado implicado por compartir e sacar o mellor de si nos momentos que atravesamos, especialmente aos grupos de 3º ESO que comandaron a organización pola mañá. Grazas especialmente a Adrián, Marco, Eloy, Sergio, Bruno ao mando do equipo de son. Grazas ao profesorado e persoal non docente que soubo acompañar. Grazas a Olga, que unha vez máis reinventou esta celebración tan necesaria para que en Chapela sigamos a escoitar, aprender e COMPARTIR. Grazas a todas.

O 12 de marzo no Multiusos A Xunqueira terá lugar un obradoiro en relación ao papel dos medios de comunicación como axentes de cambio contra a violencia machista. No mesmo participará o noso exalumno, veciño e amigo, Joshua Alonso Mateo en calidade de promotor da igualdade entre homes e mulleres, xunto a Patricia Costa, xornalista de RNE. Para máis información pica aquí: II Xornadas “Gemma Pereira Otero” Mulleres e Igualdade.

Os institutos de secundaria do concello de Redondela, lanzan a súa iniciativa POLA SAÚDE MENTAL DA NOSA MOCIDADE. A mesma foi enviada onte ás xefaturas territoriais de sanidade e educación da provincia de Pontevedra, e ás consellerías respectivas.

Descarga o texto e compárteo

La Voz de Galicia - SOS dos institutos de Redondela para protexer a saúde mental do alumnado

Radio Redondela - Os institutos de Redondela reclaman maior atención sobre a saúde mental da mocidade

Nós Diario - CIG-Ensino pide atender a saúde mental nos centros educativos

CIG-Ensino - Pola saúde mental - Centros de secundaria de Redondela

Radio Vigo - Entrevista á dirección do IES de Chapela

Ábrese o proceso de admisión do alumnado de novo ingreso para ESO-BACH no curso 22-23

Prazo: 1 ao 21 de marzo

Poderá realizarse ben de xeito telemático a través da aplicación https://www.edu.xunta.gal/admisionalumnado/

Ben presencialmente no propio centro entregando a seguinte documentación

• Fotocopia DNI ou folla de inscrición da alumna-o no Libro de Familia.
• Certificado de matrícula (con código XADE) no que conste o curso que está a estudar actualmente.
• Certificado académico, salvo para 1º ESO.
• Padrón familiar

Vacantes

Listaxe provisional: 26 de abril

Listaxe definitiva: 18 de maio

O xoves 24 de febreiro a Volta Ciclista a Galicia pasará polo noso concello provocando o corte de tráfico entre Redondela e Vigo, afectando principalmente á estrada nacional 552 ata a Avenida de Vigo por onde continuará ata a Avenida de Galicia para proceder a súa entrada en Vigo. Dito corte abarcará previsiblemente desde as 14:00 ás 15:00. É por esta circunstancia, e de cara a asegurar a saída do instituto e a chegada do noso alumnado aos seus fogares, que os alumnos e alumnas de ESO e BACH abandonarán o centro escolar ás 13:10, hora na que serán recollidos e recollidas polo transporte escolar. Un saúdo.

A dirección.

Estimadas familias:

                Dirixímonos a vós para comunicar que o día 8 de marzo está convocada polo movemento estudantil unha folga de estudantes contra a violencia machista, a LGTBIfobia e o fascismo. Esta folga afecta a todo o alumnado, salvo aquelas ou aqueles que cursen 1º e 2º ESO. Acolléndose ao dereito de reunión, e celebrando a Xunta de codelegadas/os no IES Chapela en data de 22 de febreiro, o alumnado do Centro sumouse á decisión colectiva de non asistencia a clase.

            O alumnado que apoie a decisión colectiva de non asistencia a clase, non acudirá ao IES Chapela no día sinalado para realizar ningunha actividade. Como en situación de normalidade académica, ningunha alumna ou alumno menor de idade poderá abandonar o IES Chapela sen a autorización pertinente. As faltas de asistencia do alumnado que se sume á decisión colectiva de non asistencia a clase, consideraranse xustificadas. O alumnado que non se sume a esta convocatoria ten o dereito e o deber de asistir ao centro e recibirá clase normalmente. O profesorado proseguirá o desenvolvemento normal da materia. En ningún caso poderán realizarse exames, probas de avaliación ou recollida de traballos nestes días, sempre e cando algún alumno ou alumna do grupo onde se vaian realizar ou entregar, participe na decisión colectiva de non asistencia.

                Todo o alumnado menor de idade que participe desta decisión deberá contar cunha autorización da nai, pai ou titor-a cubrindo un modelo que poderá recoller en conserxería e que entregará á persoa titora.

                Sen outro particular reciba un cordial saúdo.

Chapela, a 22 de febreiro de 2022

A DIRECCIÓN