Xornadas, obradoiros

O venres 8 de Abril na Sala de Conferencias tivo lugar a presentación oficial do Plan Proxecta Meteoescolas, nunha actividade interdisciplinar de exposición preparada polo alumnado de 2° Bacharelato , 3° e 4° ESO, dos traballos de Arte, TIC, Cultura Clásica , Latín , Física e Química e Matemáticas . Contou como público co alumnado de 1° e 2° ESO e foi organizado en tres sesións.

Cabe recordar que a final de curso esta presentación farase ao revés, será o alumnado de 1° e 2° o que expoña os traballos realizados neste proxecto ás compañeiras e compañeiros de cursos superiores.

Agradecemos a participación e o gran traballo do alumnado que expuxo e a atención e interese do público, facendo desta xornada unha oportunidade de formación e interacción  entre todos os grupos.   

O xoves 7 de abril o alumnado de 2º ESO do IES de Chapela reforestou unha zona preto do río Fondón con árbores autóctonas: castiñeiros, nogueiras e cerdeiras. Foi unha xornada tan, tan especial, que o alumnado quedou con gana de máis....aprendizaxes. Agradecemos a coordinación de Álvaro e o apoio do Concello de Redondela e da Asociación Veciñal.

O venres 17 de decembro, o alumnado do 1º curso de APSD do IES Chapela desfrutou dun obradoiro a mans de Manolo González Garrido, socio fundador e expresidente da Cooperativa de Consumo Consciente Árbore (Vigo). A través do obradoiro impartíronse nocións básicas no coidado do noso planeta e como integralo nos coidados propios do desempeño profesional dun/ha TAPSD. Do mesmo xeito, afondouse no concepto das 4R (reducir, reciclar, reutilizar e... recuperar) e nas pequenas accións sostibles que se poden levar a cabo no día a día. O noso planeta é  finito e nós queremos contribuír co noso grao de area dende as nosas aulas.

O pasado venres 21 de xuño inauguramos o grafitti feito polo alumnado de 1º ESO, dentro do programa DepoRúarte, da Deputación de Pontevedra. Para ese día contamos coa presenza de Digna Rivas, deputada en funcións e alcaldesa de Redondela e coa do artista grafiteiro O Ras. Os alumnos e alumnas, conscientes da situación de contaminación na que se atopan as nosas praias e as nosas augas, e da repercusión que teñen as accións do ser humano sobre a natureza, elexiron como título do proxecto "Coidando o noso mar".

Para a creación deste grafitti o alumnado recibiu unhas sesións formativas sobre os Obxectivos de Desenvolvemento Sostible (ODS) establecidos pola ONU, temática do programa DepoRúarte 2019. Os traballos no exterior, comezaron o venres 14 de xuño e contaron coa colaboración do grafiteiro o Ras.

Dende o centro queremos agradecer a presenza de Digna Rivas  e as súas palabras, nas que como exalumna do instituto destacou que tanto "a educación en valores como a sustentabilidade e a igualdade están moi presentes neste centro".

Ler a noticia