Como todos os anos, o Equipo de Dinamización da Lingua Galega en colaboración cos departamentos didácticos de ciencias preparou unha programación de actividades para conmemorar o MES DA CIENCIA EN GALEGO co obxectivo de visibilizar que a nosa lingua é perfectamente válida para o traballo científico. Adaptándonos á situación excepcional na que nos atopamos, ao igual que o ano pasado decidimos reformular a habitual Feira Científica en 15 vídeos gravados polo alumnado aos que podes acceder na canle de youtube do EDLG de Chapela ou directamente premendo sobre cada un deles.
O fin de trimestre foi unha explosión de actividades do máis variado. Coñecemos a nosa contorna natural, recibimos a visita da cruz vermella, intercambiamos postais do IES de TEIS, sementamos landras, realizamos o mercado de troco, fixemos o concurso das aulas acolledoras, levamos adiante gran número de charlas e obradoiros... Todo para despedir 2021 e recibir un 2022 no que agardamos o mellor para todas e todos.
O venres 17 de decembro, o alumnado do 1º curso de APSD do IES Chapela desfrutou dun obradoiro a mans de Manolo González Garrido, socio fundador e expresidente da Cooperativa de Consumo Consciente Árbore (Vigo). A través do obradoiro impartíronse nocións básicas no coidado do noso planeta e como integralo nos coidados propios do desempeño profesional dun/ha TAPSD. Do mesmo xeito, afondouse no concepto das 4R (reducir, reciclar, reutilizar e... recuperar) e nas pequenas accións sostibles que se poden levar a cabo no día a día. O noso planeta é finito e nós queremos contribuír co noso grao de area dende as nosas aulas.
O luns 20 de decembro, o alumnado do 1º e 2º curso de Educación Infantil do IES Chapela desfrutou dun obradoiro de locución e narración oral impartido por Damián, da empresa Solo Voz. Esta actividade contribuíu a mellorar a expresión oral do alumnado e a perfeccionar a súa capacidade de empregar a voz como ferramenta fundamental do seu futuro desempeño profesional.
A semana pasada unha delegación especial do proxecto Discamino, coa nosa alumna Lara Urdiales, acompañounos coas súas experiencias de aprendizaxe e motivación. O alumnado de APSD participou nesa charla con grande interese. Grazas!! Por gardar un anaquiño do voso importante tempo para estar en Chapela.
O alumnado do ciclo de Atención a Persoas en Situación de Dependencia (horario 2) do réxime de persoas adultas está a desenvolver este curso un obradoiro de teatro inclusivo en colaboración coa asociación Xaruma, centrada no traballo en prol da integración das persoas con trastornos mentais. Neste obradoiro, que se leva a cabo cada dous luns no auditorio do multiusos Piñeiral do Crego, está a participar alumnado e profesorado do ciclo, persoas usuarias e profesionais de Xaruma, e profesorado e alumnado da ESAD (Escola Superior de Arte Dramática).
O obradoiro inscríbese no proxecto de aprendizaxe “En compañía”, co que perseguimos que o alumnado se achegue aos colectivos de intervención a través do contacto directo con persoas reais do noso contorno pertencentes a estes colectivos, dándolles voz e protagonismo para coñecermos as súas características e necesidades a partir dos seus propios testemuños e experiencias.
Ao longo destas primeiras sesións do obradoiro puidemos tomar contacto coas outras persoas participantes, desinhibirnos pouco a pouco, apropiarnos do espazo, iniciarnos nalgunhas técnicas de teatro-imaxe e reflexionar sobre o que cada unha de nós podemos aportar no que esperamos que culmine cunha pequena peza teatral de creación colectiva. E agora somos xa todas e todos un só grupo ao que decidimos denominar Xanela (de Xaruma + Chapela).
Volveremos en xaneiro con moitas ganas de seguir dándolle forma a esta iniciativa de arte comunitaria. Moitas grazas a todas e todos os que estades a facer posible esta aventura!
O mércores 15 de decembro, o alumnado do 1º e 2º curso de APSD do IES Chapela achegouse ao complexo deportivo de A Madroa para presenciar a final da I Liga Galega de Fútbol Adaptado 8, que organiza a Federación Galega de Deporte Adaptado. Nesta xornada puideron desfrutar do encontro entre o Celta Integra e o Saladino Cortizo.
Esta actividade foi o peche a varios encontros entre a Fundación Celta Integra e o alumnado do CFGM en APSD, no que intercambiaron información, experiencias e opinións.
“Baixo o paraugas da diversidade", o IES de Chapela únese á campaña da asociación Andaina de Redondela para visibilizar a nosa realidade diversa do centro. Reclamamos que a sociedade é a que debe adaptarse buscando a normalización coma un dereito fundamental.
