Escoitar, Aprender e Compartir

Esta pasada semana despedimos ás profesoras do Departamento de Sanitaria Asunción Gómez e Concepción Bandín. As dúas desenvolveron unha boa parte da súa carreira profesional no IES de Chapela. Aquí deixaron Asun e Chiti parte dos seus folgos e ilusións para construír o centro que hoxe en días somos, e ser xa, memoria compartida das nosas aulas. Longa vida compañeiras!

Os grupos de 1º e 2º curso do CFGS en Educación Infantil realizan unha xornada de comadres na Senda da Auga

O alumnado do 1º e 2º curso do CFGS en Educación Infantil do réxime xeral-ordinario levaron a cabo unha xornada de coñecemento mutuo e convivencia percorrendo o roteiro da Senda da Auga.

Con anterioridade á saída, o alumnado distribuíse en parellas de comadres (unha alumna de 2º curso cunha de 1º curso) mediante un xogo de imitación.

Con saída ás 10:30h dende o IES Chapela, chegaron até o “Banco máis fermoso do mundo” para desfrutar das vistas da Ría de Vigo. Polo camiño puideron coñecerse, intercambiar pareceres e debater sobre a titulación.

Antes de voltar, realizaron paradas para almorzar, hidratarse e realizar dinámicas de coñecemento.

Coa alegría dos reencontros e a ilusión dos comezos, atopámonos ás portas deste novo curso 21-22. Damos a benvida a todas as aprendizaxes coas que nos agasalle. Comezamos. Avante Chapela!

Mural realizado polo Equipo de Igualdade do IES de Chapela

Mañá martes será o último día lectivo deste atípico curso que comezou coa incerteza de saber se sería posible desenvolver a pé de aula. Atrás quedou aquel 23 de setembro do ano pasado no que as máis pequenas e pequenos do IES de Chapela traspasaban as portas do centro as nove da mañá. Desde aquela son moitos os momentos e as experiencias compartidas entre o alumnado de tan diferentes idades. Cento sesenta e sete días de clase nos que non foi preciso pechar o centro nin ningunha das súas aulas, e nos que no interior do instituto non se constatou ningún contaxio. O labor incansable de Celia, Sefi, Marina e Fátima; a planificación e elaboración de plans e protocolos deseñados por Isabel e Elena desde o equipo COVID e implementados polo profesorado e persoal non docente; a sorte; e sobre todo a madurez e responsabilidade do noso alumnado no cumprimento das medidas de hixiene e seguridade, fan que poidamos dicir, agora si, que contivemos a pandemia no curso 2020/21. Por riba dos resultados académicos mañá toda a nosa comunidade educativa celebra a aprendizaxe da nosa resistencia activa. Moitas grazas a todas e a todos e os nosos parabéns! Bo verán!

A dirección