Corenta alumnas e alumnos dos institutos do Milladoiro e de Vila de Cruces están participaron no encontro"Regueibertso"en Igorre, Biscaia, de improvisación oral en verso.

Regueifeiros/as da Galiza, glosadors dos Países Cataláns e bertsolaris vascos adolescentes reúnense neste encontro de dúas xornadas educativas.

A Regueifesta é un proxecto de innovación educativa que desde 2015 impulsa a regueifa como ferramenta para a normalización lingüística, a educación musical, a educación en valores como o feminismo, a autoxestión ou a transformación social.

Esta é a cuarta vez que regueifeiras adolescentes visitan Igorre, nun proxecto que vén reunindo cada ano repentistas de Galiza, Cataluña e Euskadi nun destes tres países.

Durante estas xornadas, o alumnado improvisador participou e organizou actividades de valoración das linguas e culturas propias, desde a poesía oral e a música até o baile ou o deporte tradicional. O día 7 de abril tivo lugar o festival Regueibertso no auditorio de Igorre, onde o alumnado improvisou con artistas do País Vasco como Onintza Enbeita.

A Regueifesta comprende a improvisación oral como un recurso educativo fundamental para unha educación humanista, onde as emocións e os afectos son motor das relacións persoais e do empoderamento individual e colectivo, a autoestima e o sentido crítico. 

A prensa di:

O CORREO GALEGO

21 NOTICIAS

ÁBRETE DE ORELLAS

BERTSOA

O alumnado de portugués de 3º da ESO, 4º da ESO e 1º e 2º de bacharelato realizou unha saída didáctica a Portugal o pasado xoves día 7 de abril. Achegáronse ao Museo da fábrica de chocolate en  Viana do Castelo, onde se lles explicou, en portugués, toda a historia do chocolate e as fases da súa produción desde a antiguidade ata hoxe. Despois de dar un paseo polo centro desta cidade, foron ata a cidade do Porto, para realizar a pé un percorrido  que os levou polos principais monumentos: Torre dos clérigos, estación de São Bento, ponte de Luis I, Sé-Catedral etc.

O grupo "1,2,3 Milladoiro", que participou na segunda xornada do Club de debate celebrada onte, día 6 de abril, gañou o terceiro premio e o pase á final que se vai celebrar en Pontevedra no mes de maio.

Gabriel Blanco, Enid Alonso e Nacho Molina tiveron que afrontar o debate sen dúas das persoas que tamén conformaban o grupo, pero que estaban de baixa: Carmen Paredes e Sergio Mella.

Enfrontáronse ao alumnado de 1º de Bacharelato do IES Sánchez Cantón e ao de 4º ESO do Colexio Sagrado Corazón de Praceres. 

O xurado fixo unha mención especial para o noso alumno Nacho Molina. Parabéns!

Durante o día de onte, martes 5 de abril, desenvolveuse no Auditorio do Centro Sociocultural de Negreira a primeira xornada do Club de debate. O tema que había que tratar foi o de “A liberdade individual pode estar por riba do interese colectivo?”.

Do noso centro participaron dous grupos. O primeiro estaba formado por alumnado de 3º ESO B do IES: Lía Barreiro, Andrea Caramés, Martina Bretaña, Clara Barral, Sara Iglesias, Anthony Rivera e Paola Torrado (que non puido achegarse por atoparse enferma). Realizaron dous debates durante a mañá, un contra o CPI Eusebio Lorenzo Baleirón de Dodro e outro contra o IES Punta Candieira.

Contra  o IES de Ames  debateu pola mañá o grupo  "Xente que fala", formado por 8 persoas, das cales só puideron participar Diego Madarnás, Breogán Fajundes, Mario Iglesias e Javier Conde. As alumnas Andrea Gallego, Sofía Chang, Iria Ferreiro e Marta Méndez estiveron na preparación do argumentario durante os meses previos mais non puideron acudir.

Pola tarde o noso alumnado enfrontouse ao IES Punta Candieira de Cedeira, neste caso defendendo que o interese individual non pode estar por riba do interese colectivo. 

Hoxe mércores participa o terceiro grupo inscrito, "1,2,3 Milladoiro", que ten que competir contra dous centros de Pontevedra: IES Sánchez Cantón e IES Sagrado Corazón de Praceres.

Este 1 de abril, o alumnado do IES do Milladoiro, concentrouse para participar no manifesto-regueifeiro-expansivo "NON ÁS GUERRAS". Un berro colectivo de alegría ante tantas guerras, para que as armas disparen flores e versos libres

Estes son os vídeos das alumnas participantes no Concurso de Recitado "Rosalía sempre viva" en Outeiro de Rei. Parabéns para Saínza Ruiz e Xiana Lorenzo:

Este sábado 19 de marzo, nas vésperas do Día da poesía, celebrouse o VI concurso de recitado "Rosalía sempre viva", organizado pola Casa-Museo Manuel María en Outeiro de Rei (Lugo).

O noso instituto estivo representado por dúas alumnas de 2º ESO: Saínza Ruíz, co poema "Eu ben vin estar o moucho", e Xiana Lorenzo, con "Nasín cando as prantas nasen".

Ao son da dobraxe é un proxecto que busca implicar o alumnado para dobrar ou adaptar produtos culturais do seu interese ao galego. Sábese que unha das mellores maneiras de enganchar a mocidade ao galego é con produtos audiovisuais específicos para eles e na nosa lingua. Polo tanto, crear contidos dobrados ao galego, tanto para usar de entretemento como para aprender a lingua, é fundamental no proceso normalizador no que pretende inserirse este innovador proxecto.

Velaquí tedes o vídeo do concerto-faladoiro de flamenco,que levaron a cabo  Josemi Carmona (guitarrista de Ketama), Rafita de Madrid (cantador flamenco) e Moisés Fernández (tocador de caixón) para o alumnado do noso centro.

O xoves 10 organizouse no Auditorio do Milladoiro un concerto-faladoiro, dende o Departamento de Música, coa colaboración do alumnado da Radio e do Equipo de Dinamización Lingüística.

Tivemos a gran sorte de contar coa visita de tres grandes artistas internacionais de flamenco: Josemi Carmona (guitarrista de Ketama), Rafita de Madrid (cantador flamenco) e Moisés Fernández (tocador de caixón). O alumnado participou activamente no evento, posto que presentou Rebeca (que tamén bailou ao final), tocou Simón a guitarra e Diego bailou e cantou. Erik foi o encargado da loxística da gravación e da entrevista para a radio. 

 
A maiores de realizar o concerto, estes músicos fixeron un faladoiro moi interesante, no que o alumnado participou cunha serie de preguntas. Tratáronse temas moi diversos e interesantes que axudan a empoderar o alumnado para que siga estudando e perseguindo os seus soños. Xenerosos artistas con grandes palabras de ánimo para o alumnado, que serven para mudar narrativas cara a camiños motivadores.

Foi un día que seguro que o alumnado non esquecerá na vida. 

Moitísimas grazas a Josemi, Rafita e Moisés por tanta xenerosidade e arte.

Grazas tamén a Rosa Bugallo por facilitar que viñeran os artistas ao centro, e ao Concello por ceder as instalacións e acompañarnos no evento.

LA VOZ DE GALICIA. 27 DE FEBREIRO DE 2022

EL CORREO GALLEGO.VENRES, 25 DE FEBREIRO DE 2022

Celebramos o Día de Rosalía 2022 adaptándonos á nova data na que se confirmou que naceu a autora de Cantares gallegos. Foi neste 23 de febreiro tamén o día no que naceu o colectivo musical Euterpe, que abriu e pechou os actos no centro. Co poema que Curros Enríquez lle dedicou a Rosalía de Castro, "No bico un cantar" (interpretado por María Iglesias na voz e piano, Dora Iglesias na frauta, Erik Cadavid na trompeta e Eloi Zabala na guitarra), déuselle paso á charla que Marilar Aleixandre, que lle ofreceu ao alumnado de 1º ESO A, B e C. Baixo o título de "Rosalía e as desposuídas, a terra e as mulleres", explicou a actualidade da poeta en temas como a emigración, o feminismo e a defensa da paisaxe natural galega. Pechouse o faladoiro coa interpretación do poema "Nasín cando as prantas nasen" na voz de Xiana Lorenzo, acompañada na guitarra por Simón Jiménez.

A seguir, o alumnado de 1º ESO, acompañado polo alumnado do Equipo de Dinamización da Lingua Galega, saíu para a zona do patio destinada á plantación das árbores cedidas pola Aula da Natureza do Concello, cuxa brigada tamén previamente viñera ao centro para acondicionar o terreo. Alí procedeuse, seguindo as indicacións dos técnicos medioambientais, á plantación de 11 bidueiros, 3 érbedos, 2 castiñeiros, 2 carballos, 2 sobreiras, 1 cereixeira e 1 figueira. Todas estas árbores quedaron etiquetadas cuns cartaces, realizados  previamente polo alumnado do primeiro curso da ESO, e colocadas nunhas estacas que fixeron nas aulas de tecnoloxía. 

Durante a plantación, un grupo de alumnas do EDLG leu o manifesto da Asociación de Escritores/as en Lingua Galega (AELG) para o Día de Rosalía 2022, e xunto cos demais membros do EDLG recitaron versos da autora. Estiveron no acto o alcalde de Ames e mais o concelleiro de medioambiente.

O Día de Rosalía pechouse no centro coa inauguración dos novos versos que se colocaron nas escaleiras. En dous tramos combinouse a poesía de Rosalía escrita no s. XIX  e tantas veces musicada "Miña terra, miña terra/ terra onde m'eu criei/ hortiña que quero tanto/ figueiriñas que prantei..." con algúns versos da tan actual canción Terra das Tanxugueiras ("Canta ti, cantarei eu/ co xeito das nosas nais..."). Remataron as actividades da mañá no IES con outra actuación do colectivo Euterpe, que aínda volveu intervir á tarde na inauguración do mural de Rosalía realizado na entrada da Casa da Cultura, onde as nosas alumnas volveron ler poemas e mais o manifesto da AELG.

NO BICO UN CANTAR (MARÍA, DORA, ERIK E ELOI)

NASCÍN CANDO AS PRANTAS NASCEN (XIANA E SIMÓN)

EQUIPO DE DINAMIZACIÓN DA LINGUA GALEGA DO IES DO MILLADOIRO

COLABORAN: DEPARTAMENTOS DE MÚSICA, BIOLOXÍA-XEOLOXÍA E TECNOLOXÍA

#_rcd_2022

#SementadePensamentos

CARTA ÁS FAMILIAS

AO SON DA PAISAXE

DÍA DE ROSALÍA DE CASTRO 2022

FUNDACIÓN ROSALÍA DE CASTRO

A semana pasada entregáronse os premios dos concurso do EDLG realizados no 1º trimestre (Concurso de relatos de terror "Coa pel de galiña" e mais o de "Xeometría con lema").

Poden lerse os textos gañadores no blog do EDLG.

A xornada do Club de debate, realizada no noso centro xunto co IES Plurilíngüe de Ames o pasado 24 de xaneiro, é obxecto dun artigo en La Voz de Galicia:

O programa de erasmus +, Euro a de repente, na que participa o IES do Milladoiro, apareceu recollida nos medios de comunicación e en concreto en La  Voz de Galicia. Amosamos aquí o artigo

Hoxe, 24 de xaneiro, desenvolveuse no noso centro a xornada de formación do club de debate para o alumnado participante dos dous centros do concello de Ames. Desde as 9,30 h da mañá, a rapazada do IES de Bertamiráns anotada a este certame, acompañou á do noso centro para recibir a formación xeral sobre o Regulamento e a dinámica desta actividade. Impartíronse nocións e consellos básicos sobre a procura de información e documentación para o debate e sobre a estruturación do argumentario, así como información sobre as habilidades comunicativas precisas para o desenvolvemento fluído das intervencións.

A sesión de hoxe desenvolveuse no salón de actos do noso IES, mais agora o alumnado de cada centro ten que preparar o seu argumentario de cara aos debates que se van celebrar en Negreira os días 5 e 6 de abril. Neste certame participan os centros anotados de diferentes puntos de Galicia e vai ser nesa data cando se determinen os finalistas que debaterán en Pontevedra no mes de maio.

Do IES do Milladoiro van participar tres grupos de 3º e 4º ESO. Un está formado por cinco membros, outro por sete e un terceiro por nove.

Os Equipos de Dinamización da lingua galega do IES de Ames e mais do IES do Milladoiro, xunto coas bibliotecas dos dous centros, organizaron este ano o 5º Concurso de relato fantástico e de terror en lingua galega “Coa pel de galiña”.

No IES do Milladoiro o xurado, formado por cinco membros do profesorado de distintas materias (David Amboage, Maruxa Fernández, Valentina Formoso, Manuel Maseda e Ismael Ramos) acordou premiar na modalidade A (que correspondía a 1º, 2º e 3º ESO) a:

Lucía Pájaro (1º ESO E) co texto “Aquela figura”

O xurado valorou especialmente a capacidade para crear unha atmosfera de medo, así como a orixinalidade na trama, evitando tópicos argumentais e clixés narrativos.

Reciben dous accésit:

Gabriela Leis (1º ESO A) co relato “Unha ponte no río”

Alba García (2º ESO E) co texto “Noite de camiños perdidos”

A entrega de premios vaise realizar o vindeiro martes 25 de xaneiro no 1º recreo na biblioteca, día en que se publicarán tamén os relatos no blog do EDLG.

A modalidade B, correspondente a 4º ESO e Bacharelato, quedou deserta.

 O Equipo de Dinamización da Lingua Galega (EDLG) e mais o departamento de plástica do IES organizaron un concurso entre o alumnado de 1º e 3º da ESO de deseños xeométricos con lema en galego.

A intención final era realizaren deseños para colocar en bolsas que se repartirían no IES.

Houbo deseños moi ben elaborados e con gran calidade, o que provocou que fose un o escollido para que decore as bolsas do IES, como 1º premio, pero outros dous van ser recoñecidos imprimíndose como marcadores que se van repartir no Día do libro.

O alumnado premiado é o seguinte:

• 1º premio: Gabriela Leis, 1º ESO A
• 2º premio: Noa Mesías, 1º ESO B
• 3º premio: Aroa Riveiro,  1º ESO A

Accésit:

• Noa Varela, 1º ESO B
• Antía Casavella, 1º ESO B

Os premios vanse entregar o vindeiro martes 25 de xaneiro, no primeiro recreo, na biblioteca.

O  IES do Milladoiro está a participar nun programa Erasmus+, programa europeo no que participan sete centros de ensino e dous centros culturais baixo o título Euro a de repente. Os socios deste programa son, ademais do noso centro, outros dous galegos (o IES Marco de Camballón de Vila de Cruces e mais o CEIP Labarta Pose de Baio) e catro doutros países europeos: Madeira (Portugal), Iparralde e Córcega (Francia) e Tortona (Italia). A coordinación lévase desde  o CFR da Coruña, delegación de Vimianzo.

Con este programa vaise coñecer o panorama actual da improvisación oral en Europa e mais difundir o estado das diferentes manifestacións do repentismo.

Nesta semana comezou a  primeira visita a Madeira, polo que dous docentes do IES do Milladoiro se desprazaron durante catro días ata a illa para avanzar in situ neste obxectivo. Realizáronse numerosas entrevistas e gravacións a persoas de moi diferentes idades para compoñer un documentario que visibilice cal é a situación actual do repentismo nesta illa portuguesa. Este é o primeiro material audiovisual que conforma o conxunto de vídeos que se expoñerán no final do proxecto para o alumnado.

Yomara Ferreiro arrancou de novo co programa Sinag, que botara a andar o curso pasado. Neste pasado mes de decembro gravou dous novos episodios, de temáticas diferentes e ambos moi interesantes.

O episodio 3 vaivos resultar entretido ao escoitar as súas reflexións a partir de citas de cine e literarias.

No episodio 4  vai a unha temática diferente e moi interesante. Desta vez centrouse en dar conta dunha enfermidade que xa está bastante estendida, pero que aínda é moi descoñecida: a fibromialxia.

Pechamos o trimestre coa entrega de premios  ás alumnas participantes no mes da ciencia en galego. Lucía Romar, Irene Vázquez e Alba Sueiro (foto de arriba) foron dobremente premiadas, por un lado pola participación nos vídeos para o "Medio minuto de ciencia en galego" (xunto con Antía Somoza que non puido acudir á entrega), e por outro porque entre as tres participaron no concurso de Igaciencia e recibiron un accésit polo seu poliedro. Tamén recibiron o seu galardón, de mans do director, Antía Casavella e Alicia Lariño (foto de abaixo) polo vídeo gañador no "Medio minuto de ciencia" na modalidade A (1º e 2º ESO).

E hai unhas semanas tamén se entregaron os diplomas que enviou a Consellería para o alumnado que participou o curso pasado no proxecto Radio na biblio. A entrega estivo amenizada pola actuación musical de Diego Jiménez Jiménez (4º ESO A) e de Alejando Buela Pampín (4º ESO B). A música que podedes escoitar co vídeo é da actuación.

En colaboración co Comité de Igualdade, adornamos a entrada do centro. Desde o EDLG  aproveitamos para facer reflexionar sobre o uso do galego nos agasallos e mais animar a buscar agasallos en galego.

Por un lado, quixemos provocar a reflexión sobre o uso do galego:

Por outro, demos unha mostra de uso do galego en determinados elementos, que poden servir de agasallo, ou non, pero queda aí o recoñecemento polo uso do galego en produtos comerciais:

 A Real Academia Galega e a Fundación Barrié abren, a través do Portal das Palabras, a fase de votación popular para escoller a Palabra do Ano 2021. Tras a fase de recollida de suxestións, as voces finalistas que optan a se converter na Palabra do Ano 2021: coada, gromo, resiliencia, tanxugueiras e vacinódromo.

O prazo de votación permanecerá aberto ata as 23:59 horas do sábado 25 de decembro de 2021 nesta ligazón:

http://portaldaspalabras.gal/palabradoano/

O pasado luns 13 de decembro, o alumnado de 1º ESO A tivo a oportunidade de recibir un dos dous obradoiros que se celebraron no noso centro por parte de María Lobo, da Asociación AGARESO, e organizados desde a Secretaría Xeral de Política Lingüística baixo o título de Dicionarios de ida e volta. O primeiro deles desfrutárao, o pasado 10 de novembro, o grupo de 1º ESO C. 

Se queredes máis información sobre a cuestión, só tendes que escoitar o podcast do programa que dirixe, desde o curso pasado, Diego Madarnás Iglesias ("Entrevistas con Diego"), pois aproveitou que estaba María Lobo no centro para facerlle unha entrevista ben interesante: