O alumno de 3º da ESO, Juan Cañizo González-Elipe,  clasíficase para a Olimpiada Estatal de Filosofía tras acadar o 2º posto na final da Olimpiada Filosófica de Galicia na modalidade de Dilemas Morais celebrada este 20 de febreiro. A alumna Nayra Prado González, tamén de 3º da ESO, acadou un excelente o 3º posto.

Parabéns para estes dous alumnos, e todo o apoio e ánimo para Juan Cañizo nesta nova fase acadada tras unha importante xesta lograda na final da Olimpiada Filosófica de Galicia.

    O alumno Juan Cañizo  e a alumna Nayra Prado, de 3º de ESO,  clasíficáronse para participar na final da VII Olimpiada Galega de Filosofía, pola modalidade de Dilemas Morais.  A  final celebrarase na Faculdade de Filosofía da Universidade de Santiago de Compostela o vindeiro 20 de febreiro. Parabéns para estos alumnos e moita sorte na final. Ánimo!

A Directora do IES Plurilingüe de Ames, asiste a sesión plenaria do Consello Galego de Convivencia Escolar, como representante dos directores/as de Centros Públicos de Galicia.

Este xoves, 19 de decembro, tivo lugar a gala de entrega de premios do concurso radiofónico de teatro lido “Desata a lingua!”, organizado polo concello de Ames. A cerimonia celebrouse na casa da cultura de Bertamiráns, onde acudiron as/os participantes, as familias, o profesorado e varias das autoridades locais.

Ademais, podemos afirmar con orgullo que, de entre os nada menos que 69 participantes no concurso, dous dos tres premios foron adxudicados a grupos do noso centro.

Un destes grupos foi o das Sardiñas Armadas (Bento Lorenzo, Braulio Martínez, Roi Álvarez e Jairo Barreiro), que gañou o premio ao mellor guión orixinal, coa obra A terra que fuma, sobre o cambio climático.

O outro foi Raíces de Amizades (Marieta Calatayud, María Freire, Brais Lago e Antón Abalo) que, coa súa obra Asasinos en escena, conseguiu gañar o premio do público.

Non podemos deixar de recoñecer o mérito do grupo Sacarina, do IES do Milladoiro, que gañou o premio á mellor interpretación, coa obra Salvamento Canino.

Picando neste enlace, podedes acceder á nova publicada polo Concello.

Finalmente, dende aquí queremos dar os parabéns aos galardoados e, por suposto, tamén a aqueloutros participantes que non obtiveron un premio pero que elaboraron e interpretaron unhas pezas dunha calidade excelente, deixando o listón moi alto para as vindeiras edicións.  

Noraboa polo voso traballo!

Como estes anos pasados, no mes de novembro realizamos no IESP unha chea de actividades contra a violencia de xénero, coa finalidade de concienciar á comunidade educativa desta lacra que non deixa de medrar.

A ONU propuxo, en 1993, o 25 de novembro como Día Internacional da Eliminación da Violencia contra a Muller e defínea como “calquera acto que poida ter como resultado dano, sufrimento físico, sexual ou psicolóxico para a muller, así como as ameazas, a coacción, a privación da liberdade, tanto na vida pública como na privada”. Desde entón, son cada vez máis as iniciativas que se suman á loita contra o maltrato. Neste contexto, o IESP de Ames tamén se adhire, cada ano, a esta causa.

A gravidade e impacto desta situación fai da concienciación da mocidade un obxectivo prioritario, desde idades moi temperás. É por iso que todo o alumnado se viu implicado en diversas actividades e iniciativas promovidas dende o centro. Na parte inferior desta publicación, pódese descargar un vídeo de recompilación de todas estas iniciativas. Para velo, é preciso ir ao final da publicación e picar en "1 adxunto".

En primeiro lugar, durante o mes de novembro, cada grupo realizou unha reflexión sobre o tema e escolleu un lema contra a violencia de xénero. Este lema plasmouse nunhas pulseiras moradas, que se lle entregou a cada estudante o día 25, dende 1º da ESO ata 2º de Bacharelato. Ademais das pulseiras, repartíronse tamén adhesivos e chapas.

Ademais, o alumnado masculino desenvolveu a iniciativa #Eunonsoncómplice. En pequenas cartolinas, coas que se creou un mural, os rapaces mostraron a súa repulsa a todas as agresións machistas que detectan decote ao seu redor. De xeito paralelo, os profesores homes do claustro tamén se sumaron a esta causa e crearon un cartaz con este mesmo lema.

A estas iniciativas engadíronselles diversas exposicións elaboradas por toda a comunidade educativa:

• “Fotografías pola igualdade”, ANPA
• “Cancións violetas contra a violencia machista”, club de lectura de cancións
• “Libros sobre Feminismo e Igualdade”, Equipo de biblioteca
• “Bailando libres”, Educación Física
• “Violencia de xénero na arte”, Educación Plástica
• “Lemas 25N”, Educación Plástica e titorías
• “As/os delegadas/os do IESP din NON á violencia machista”
• “Poemas”
• “Datos sobre a violencia de xénero”
• “Mulleres asasinadas”

Ademais de todo o avanzado, o luns 25, como actividade central desta conmemoración, realizouse un acto ao que asistiu o alumnado de 1º da ESO e parte de 1º de bacharelato. Este acto comezou cunha performance na que diversas alumnas, profesoras e persoal administrativo encarnaron a cada unha das 51 vítimas mortais da violencia de xénero en España no que ía de ano ata ese momento; un número que, por desgraza, xa aumentou dende ese día. Cada unha contaba a historia dunha das mulleres asasinadas; posteriormente, tirábanse ao chan, para que, ao remate, as persoas espectadoras fosen onda elas e as axudasen a levantarse, representando con isto a nosa inconformidade ante esta realidade, o noso apoio a todas as mulleres que sofren maltrato, así como a nosa vontade de loita contra a violencia de xénero.

Á performance seguiu a lectura dun manifesto, elaborado polo alumno Antón Riveiro, de 1º de bacharelato. Posteriormente, como contrapunto á dureza desta realidade, e como mostra de esperanza, varias profesoras e alumnas/os bailaron ao son de “Color Esperanza”. Finalmente, baixo a coordinación da profesora de Educación Física, o alumnado fixo bailar uns trompos, simbolizando con isto a liberdade coa que todas as mulleres deberían poder vivir cada día.

Por último, para pechar un día, por desgraza, tan inzado de conmemoracións, no segundo recreo tivo lugar unha concentración, incluída na iniciativa xa comentada #Eunonsoncómplice. Alí, toda os membros da comunidade educativa tiveron a oportunidade de recitar ao unísono numerosos lemas de rexeitamento da violencia machista.

Dende aquí, non podemos máis que desexar que, moi pronto, deixe de ser necesaria esta conmemoración. Mentres tanto, cada día seguiremos loitando pola liberdade da que todas as mulleres deberían ser donas.

Nin unha menos!

Os alumnos e alumnas de 3º ESO A e B e 4º ESO A e B desafiaron as condicións meteorolóxicas e realizaron unha saída a Santiago de Compostela o venres, 29 de novembro.

Esta saída desenvolveuse ao abeiro do proxecto Corre, pensa, descubre, no que están a participar os alumnos e alumnas das materias de Educación Física e Xeografía e Historia, co apoio da Asociación Correr e pensar.

No proxecto os alumnos e alumnas deseñarán un percorrido de orientación en Santiago de Compostela organizado arredor de fitos históricos da cidade. Este percorrido darase a coñecer o día da celebración da European City Race que ha ter lugar en Compostela os días 25 e o 26 de abril.

A saída do 29 de novembro tivo como obxectivo que o alumnado puidese analizar de primeira man tanto as condicións do terreo sobre o que deseñarán o percorrido como os elementos históricos que servirán como puntos de control dese percorrido.

A Euro City Race é unha competición internacional de orientación urbana que se desenvolve unicamente en cidades históricas. Se queres saber máis sobre a Asociación Correr e Pensar e o European City Race preme aquí, aquí e aquí.

Como avanzabamos hai unhas semanas, o noso centro participa, unha vez máis, no concurso radiofónico de teatro lido “Desata a lingua”, organizado polo concello de Ames. Despois da fase de formación e elaboración de guións, a semana pasada por fin chegou o momento de gravar as pezas que con tanto empeño e ilusión elaborou o noso alumnado. Para isto, os 14 grupos participantes acudiron á emisora municipal Ames Radio, onde se converteron en todos uns profesionais da radio.

Desexámoslles toda a sorte do mundo e animámosvos a estardes pendentes da próxima emisión destas pezas. Poderedes escoitalas en Ames Radio (FM 107.2) entre o 2 e o 5 de decembro, así como na páxina web municipal, onde tamén estarán dispoñibles de forma permanente.

Recordámosvos, ademais, que un dos premios vén dado polo público, así que non deixedes de votar!

Durante o mes de novembro, e con motivo da celebración do Samaín, a Biblioteca Carlos Nieto do IES Plurilingüe de Ames, realizou unha exposición temática de literatura e cine de terror, con especial incidencia no vampiro como personaxe literario e cinematográfico. Escoulleuse unha representación de títulos que tivese como criterio a variedade e heteroxeneidade de autores, tanto clásicos coma contemporáneos, con incidencia para os títulos en lingua galega e para público lector da franxa 12-18 anos. A exposición complementarase cunha charla coloquio sobre o vampiro no cine e na literatura para os alumnos de varios grupos de 4º ESO, que terá lugar o 3 de decembro ás 13:30 horas.

O Departamento de Filosofía do IESP de Ames organizou o xoves 21 de novembro o Dia Mundial da Filosofía facendo especial referencia  á filósofa Rosa Luxemburgo no centenario da sua morte.

Nos recreos o alumnado pegaron posits con frases de filósofos e filósofas e algúns deles participaron no concurso aberto de postais filosóficas. Asemade poideron ver obras da filósofa Rosa Luxemburgo.

Para ver fotos e información prema Leer máis

A Directora do IES Plurilingüe de Ames, Mª Soledad Louro Lestón, acode en representación de Galicia, ao 40 congreso FEDADi, de directores que se celebra en Madrid os días 21, 22 e 23 de novembro de 2019.

Marisol Louro, co Secretario de Estado de Educación, Alejandro Tiana