Co  gallo do 8M, Día Internacional da Muller Traballadora, o Comité de Igualdade organizou durante os recreos do día 10 de marzo unha danza reivindicativa. A  actividade  serviu para pór de manifesto as inquedanzas do noso alumnado, así como a necesidade de camiñar  todos e todas xuntos/as cara a unha sociedade máis igualitaria.

Neste vídeo recóllense as imaxes do Photocall feito o pasado mércores para conmemorar o Día de Rosalía. A actividade, organizada polo EDLG en colaboración co Comité de Igualdade, titulouse "Rosalía tamén tivo teito de cristal" e estivo centrada no papel da autora como defensora dos dereitos da muller.

Pola tarde, Aroha Brandón, Ana Caamaño, Uxía Reyes e Alba Vidal foron as encargadas de ler parte do manifesto que escribiu Anne Figueirido para a AELG e que se leu nun acto sinxelo diante da casa de Barbazán en Bertamiráns, onde Joseba Muruzabal pintou "as Rosalías"

Deixamos  aquí o  vídeo que  reflicte a  homenaxe que  as  alumnas   do noso  IES  lle  quixeron  render  a algunhas  das  científicas  máis  importantes  do panorama  internacional  con motivo  da  conmemoración  do  Día Internacional  da  Muller  e  da  Nena  na  Ciencia. A  través  de  diálogos  de  gran  viveza  e  orixinalidade  o público  asistente  puido  achegarse  de  xeito  lúdico  aos  logros  dunha  serie  de  mulleres  que  dedicaron  a  súa  vida  á  ciencia.

A  actividade  foi  organizada  polo  departamento de  Física  e  Química  e  o  Comité  de  Igualdade   e  serviu para  pór  en  valor  o  papel  fundamental  das mulleres  no  eido científico, pero tamén  reivindicar  a  igualdade  de  xénero  e  lograr  unha  maior  participación  e  inclusión  das  mulleres  e  das nenas  no  mundo  da  ciencia  e  da  tecnoloxía.

Hoxe, 11  de  febreiro, conmemórase  o  Día  Internacional  da  Muller  e da  Nena  na  Ciencia e,  no  noso  IES, levamos  toda  a  semana  visibilizando  o  papel  fundamental  das  mulleres  na  historia  da  ciencia. Está  a  resultar  una  actividade  enriquecedora  e  que, día  tras  día, logra  completar  aforo.

A  actividade  complementouse  cunha  entrevista  no programa  de  radio Entrevistas  con  Diego.

Queremos  expresar  o  noso  agradecemento ás  nosas  alumnas por  darlle  vida  a  estas  grandes científicas. Mañá  poderemos  gozar  da  última  tertulia. En  breve  publicarase  unha  montaxe  con  todas  as  tertulias.

Así  mesmo,   o noso  centro  participou  activamente no  vídeo  conmemorativo  elaborado polo noso  concello.

"No día a dia reproducimos estereotipos machistas sen nos decatar porque vivimos nunha sociedade patriarcal; as familias, os medios de comunicación e tamén o sistema educativo contribúen a perpetualos. A incoherencia entre o que pensamos e o que facemos (curriculum oculto) delata o peso da socialización do que non somos conscientes, unha influencia tan sutil que resulta moi eficaz. Polo tanto hai que estar alerta, e para desvelar a desigualdade teremos que por os lentes violeta". Con estas palabras de Chis Oliveira e Amada Traba arrancan Paula García e Carlota Vicente o terceiro podcast do seu programa "Igualdade e Saúde", centrado na coeducación.

A entrevista fixéronlla a Carme Moure, profesora no IES Xelmírez I de Santiago, das materias de Igualdade de xénero (2º ESO) e Coeducación para o século XXI (1º BAC).

Xa temos a segunda entrega do programa Igualdade e Saúde.

Dirixido por Carlota Vicente e Paula García. Nesta ocasión trataron o tema das mulleres na física. A entrevista fixéronlla a Encina Calvo, profesora no grao de Enxeñaría química da USC.

Estade atentas e atentos que xa vai saír en breve o podcast seguinte deste programa.

Hoxe, 25 de novembro, Paula García e Carlota Vicente estrean programa na Radio MillaFalaDoiro, a radio do IES do Milladoiro. Chámanlle Igualdade e Saúde e van tratar de todos os temas arredor da Igualdade de Xénero.

Neste primeiro programa entrevistaron a Luisa Feijoo, Concelleira de Benestar Social de Ames.

O  vindeiro  23  de  abril  celébrase a  oitava  edición  do  Día  Internacional  das Rapazas  nas  TIC, dirixido entre  outros a  estudantes  dos  últimos  niveis  de  Secundaria, grupos  de idade  nos  que  parece  importante  potenciar  a  visibilización  das  TIC  desde  un  enfoque  inclusivo, facendo  fincapé  no  papel  das  tecnólogas, investigadoras  e  empresarias  galegas.

Desde  o  Centro  de  Supercomputación  de  Galicia (CESGA), tendo  en conta  a situación  vivida  actualmente  e  derivada  do  Covid-19,  propoñen  a  realización dunha  actividade  online (unha  multiconferencia web).  O día  23, entre  as 11h e  as 12:30  aproximadamente, terá  lugar  un  coloquio  virtual  entre  a  rapazada  e  catro  investigadoras  e  profesionais  das  tecnoloxías. O  coloquio  estará  aberto  á participación  en  directo  do  estudantado, mais  para  poder  participar  precísase dunha inscrición previa  que  ha  de  realizarse  co  envío  dun  correo  electrónico. Neste  enlace  pode accederse a toda  a  información  ao  respecto: como  inscribirse, como  conectarse, información  sobre  as  catro  mulleres  que  interveñen, etc.

O  xoves, 5  de  marzo,  os  membros  do  Comité de  igualdade   participaron nun acto  conmemorativo  do  8M no que  se  encontraron  co  alumnado  do  IES  de  Ames  e  con persoeiros  do  noso  concello. O  acto, no  que  se    recordou  a  historia  de  Carmen  Amado (vítima  da  violencia  de  xénero), leuse  un  manifesto,  recitáronse poemas  e  rematou  coa   plantación de dúas árbores  no   paseo  de  Carmen  Amado.

O  venres, 6  de  marzo  o  Comité  de  igualdade  preparou   un  photocall  no  andar intermedio  e  puidéronse  sacar  fotografías  con  mensaxes  reivindicativas.  O  acto  conmemorativo  foi  ambientado  con pezas  musicais  centradas  na  igualdade.

Nestas  últimas  semanas  o  noso  alumnado  estivo  a  traballar  rescatando  a  historia  de  mulleres  que  foron  invisibilizadas  nos  nosos  libros  de  texto. Algunhas  das  sinopses  biográficas   están  colocadas  nas  paredes  do  noso  IES. 

O  Comité  de Igualdade  convocou  de  novo hoxe, 3 de  marzo,   os  membros  da  nosa comunidade  educativa  para  gardar  un  minuto  de  silencio  como  símbolo  de  repulsa  ante o  último  asasinato  por violencia  machista.

O  pasado  venres, día 28 de  febreiro, o  alumnado que  forma parte de  Comité  de  igualdade  realizou  unha  convocatoria destinada  a  todos os  membros  da  comunidade  educativa   en  prol  da  eliminación  da  violencia  de  xénero.

Durante  o  acto  leuse  un  manifesto  no  que  foron lembradas  as  últimas  vítimas da  viloencia  machista e  logo  gardouse  un  minuto  de  silencio  que  rematou  nun  emotivo  aplauso por  parte  dos  asistentes.

O  Día Internacional da  Muller  e  da  Nena  na  Ciencia  foi  celebrado hoxe, 11  de  febreiro,  no  noso  IES  coa  realización dun cartel por  parte  da  rapazada  do EDLG e  que  foi  colocado  na  parede  central  do corredor  do  Andar 0 xunto  con  algunhas  sinopses  biográficas  de importantes científicas.

Ao  mesmo  tempo, o  dpto.   de  Física  e  Química  organizou  a  actividade  Científicas  que  experimentan para  o  alumnado  de  2º  de  ESO:  o  alumnado tivo a  oportunidade  de   participar ao  longo  da  mañá na  realización  de  diversos  experimentos  dirixidos  por  catro   mulleres. 

Ao abeiro do movemento 11febrero.org, nacido para conmemorar o Día Internacional da Muller e da Nena na Ciencia, hoxe,  7 de  febreiro, visitou o noso centro Cristina Rey Fungueiro, enxeñeira informática. Mantivo un encontro co alumnado de 4º  de  ESO  e  de  bacharelato que  cursa  as  materias  de  TIC, Tecnoloxía e  Introdución  á  programación.  Nel  deu conta da súa experiencia profesional no mundo da tecnoloxía facendo fincapé na importancia de que as mulleres se acheguen a este ámbito laboral e na necesidade de erradicar calquera tipo de estereotipo. Ao  mesmo  tempo  puxo  en  valor  a importante tarefa  desenvolvida  por  mulleres    que  traballaron  no  ámbito  da  tecnoloxía  pero  que  son  moi  descoñecidas.

A  actividade  foi  programada polo  dpto. de  Tecnoloxía.

Verónica, técnica  en  Igualdade,  estivo hoxe  no  centro para  dar  unha  conferencia  sobre  a  súa  especialidade, pero  non  veu  soa, acompañouna  a  súa   madriña,  Isaura. Entre  as dúas  intentaron que o  alumnado  reflexionase  sobre  cuestións  como  sexo  e  xénero  ou  machismo  e  feminismo.

 A  charla  levou  por  título O  día  que  as  mulleres  gobernen  o  mundo  todo  será  distinto  e  naceu  da  colaboración  entre o  recoñecido  grupo  de  teatro   Chévere  e  Promove, unha  consultoría  especializada  en  temas  de  igualdade integrada por  sete  mulleres.

Á áctividade asistiu  todo  o  alumnado  de  ESO  en  tres  sesións  diferenciadas e foi financiada  cunha  partida  especial  da  Consellería  de Educación, Universidade  e  Formación Profesional procedente  do  Pacto  de  Estado  contra  a  violencia  de  xénero.

O seguinte  enlace  dá  acceso  a  un  vídeo da actividade.

Hoxe, 25 de novembro, celebrouse no noso IES o Día internacional para a non violencia contra as mulleres.

Desde hai un par de semanas o alumnado do EDLG, coa colaboración de alumnado de 1º de Bacharelato e mais de 4º ESO, estivo a preparar esta actividade. Ademais de preparar a cartelaría e mais as pulseiras que se repartiron en 1º ESO o pasado venres, léronse dúas obras que tratan o tema da violencia de xénero: en 4º ESO a novela Senllerias de Antía Yáñez e en 1º de Bacharelato o poemario Dos días escuros de Mª Carme Caramés Gorgal. Esta autora achegouse hoxe ao centro. En colaboración co biblioteca organizouse un encontro co alumnado de bacharelato que lera o citado poemario da autora. 

Hoxe  o alumnado de  1º  de  ESO  participou  nun  obradoiro  para  reivindicar  o  bo  trato  cara  á  muller  organizado  en  colaboración  co  Centro  de  Información  á  Muller (CIM)  do  Concello. 

Así  mesmo, ao longo  desta  semana  a  rapazada  do EDLG estivo  facendo pulseiras empregando  cordón morado  sobre o que  escribiron o  lema "Non ó medo, liberdade".

De  cara  ao  luns  25, Día  internacional  da  non violencia  contra  a  muller, propomos  facer  visible  a  nosa  repulsa  vestindo  algunha prenda negra (xersei,  camiseta, suadoiro, camisa...).

O  xoves  levouse  a  cabo o  Obradoiro  de  Danza  contemporánea para  a  igualdade, tal  e  como  estaba  anunciado. O  alumnado  de  Música  de  1º  de  Bacharelato tivo  a oportunidade  de pór  en  prática técnicas  relacionadas  coa  expresión artística  da  danza  da  man  da  bailarina  e  coreógrafa  Xiana  Vilas. 

A  actividade foi  realizada  ao  abeiro  de  programa  IGUAL-SON  da  Secretaría  Xeral  de  Política  lingüística e organizada polo  departamento  de Música  en  colaboración co EDLG.

 O  vindeiro  xoves  o  alumnado  de  Música  de  1º  de  Bacharelato  participará  nunha  actividade  de  danza  levada  a  cabo  por  Xiana  Vilas, coreógrafa  e bailarina.

A actividade está organizada polo departamento de Música en colaboración co EDLG ao abeiro do programa IGUAL - SON que a Secretaría Xeral de Política Lingüística promove en execución do acordo de colaboración asinado entre a Vicepresidencia e Consellería de Presidencia, Administracións Públicas e Xustiza e a Consellería de Cultura e Turismo, para a educación en igualdade entre homes e mulleres, que introduce mensaxes positivas de rexeitamento de condutas machistas en desenvolvemento das actuacións do Pacto de Estado contra a violencia de xénero, NÓS CONTRA A VIOLENCIA.

O  venres  25  presentouse  por  parte da  Asamblea  de  Cooperación  pola  Paz (ACPP) o  programa Escolas sen  racismo ante  o  alumnado  de  1º  de  ESO.   No  mesmo acto tamén se presentou  a  Axenda  escolar  feminista  elaborada  para  o  curso 2019-2020 e á  qie  se  pode  acceder  a  través  deste  enlace.  O  centro recibiu  unha placa en  recoñecemento  ó  labor  desenvolvido.

Como  resultado do proxecto  interdepartamental  levado  ao longo  deste  curso, presentamos  a publicación  Mulleres traballadoras, 

O IES do Milladoiro participa na iniciativa 11 de febreiro, que busca conmemorar o Día Internacional da Muller e da Nena na Ciencia poñendo a disposición dos centros educativos diversos recursos didácticos. Dentro deste programa,  o alumnado de 4º de ESO tivo a oportunidade de coñecer a científica Nieves Vidal, do Instituto de Investigacións Agrobiolóxicas de Galicia do CSIC de Santiago de Compostela e puideron escoitar a súa charla  Hai futuro para o noso bosque?

Como continuación dos compromisos adquiridos ao desenvolver o Protocolo educativo para garantir a igualdade, a non discriminación e a liberdade de identidade de xénero, achegamos unha Guía de recursos

A ANPA Milla invita as familias do alumnado de 4º de ESO e 1º de Bacharelato a unha reunión informativa sobre o  "Protocolo educativo para garantir a igualdade, a non discriminación e a liberdade de identidade de xénero" o martes 18 de decembro ás 19:30 no salón de actos do IES do Milladoiro.

Dentro das actividades organizadas arredor do 25 de novembro, Día internacional para a non violencia contra a muller, o departamento de Orientación do noso centro organizou un "Obradoiro de relacións igualitarias" para 4º ESO, realizado por membros da ACPP (Asemblea de Cooperación pola Paz). Por indisposición da ponente, o venres 30 de novembro só puido realizarse con 4º ESO A. Os restantes grupos participarán neste obradoiro en canto sexa posible.

A profesora Sonia Fernández, pertencente á asociación Nova Escola Galega, deu unha charla sobre a historia dos movementos feministas ao alumnado de 4º de ESO e ao alumnado de HMC de 1º de Bacharelato. A charla tivo lugar o martes 27 de novembro, organizada polo departamento de Xeografía e Historia, dentro dos actos para conmemorar o 25 de novembro, Día internacional para a non violencia contra as mulleres.

Dentro das actividades celebradas no IES do Milladoiro para conmemorar o 25 de novembro, Día internacional para a non violencia contra a muller, o venres 23 tivo lugar un Obradoiro de igualdade e convivencia positiva promovido polo CIM do Concello de Ames.