Asesoría de bibliotecas escolares


 
 
 
 
 
A Asesoría de Bibliotecas Escolares é o equipo integrado na Dirección Xeral de Ordenación e Innovación Educativa da Consellería de  Educación, Ciencia, Universidades e Formación Profesional , que coordina todas as actuacións en materia de bibliotecas escolares e fomento da lectura integradas no Plan LÍA de Bibliotecas Escolares.

 

 

 

Redes sociais: @bescolaresgal 

 

 

 

 

Pode contactar coa Asesoría de Bibliotecas Escolares a través de:

ASESORÍAS DE ZONA

 

ASESORÍAS SERVIZOS CENTRAIS

 

María Pousa Rodríguez

Coordinadora da asesoría de bibliotecas escolares. Asesora de bibliotecas escolares zona A Coruña

Enderezo: CFR da Coruña. Rúa da Educación, 3, 2º Planta (Edificio U.N.E.D.), 15011 A Coruña (A Coruña) 

Teléfono: 981 274 221 

Correo electrónico: abe.coruna@edu.xunta.gal

 

Alexandra Cabana Outeiro

Asesora de bibliotecas escolares zona Lugo
Xestión documental Koha, Meiga

Enderezo: CFR de Lugo. Rúa Doutor Yañez Rebolo, 31 27004 Lugo (Lugo)

Teléfono: 982 251 068

Correo electrónico: abe.lugo@edu.xunta.gal 

 

 

 Asun Carballo Rodríguez

Asesoría de bibliotecas escolares zona Ourense 

Plataforma de préstamo dixital E-LBE.2 

Enderezo: CFR de Ourense. Avenida da Universidade, 18 32005 Ourense (Ourense)

Teléfono: 988 241 533

Correo electrónico: abe.ourense@edu.xunta.gal 

 

 

Isabel Nuevo Pérez

Asesora de bibliotecas escolares zona Pontevedra

Enderezo: CFR de Vigo. Rúa Rocío, 72, Coia 36208 Vigo (Pontevedra) 

Teléfono: 986 202 370 

Correo electrónico: abe.pontevedra@edu.xunta.gal 

Enderezo: Xunta de Galicia, Edificio Administrativo San Caetano, Rúa de San Caetano s/n, 15704 Santiago de Compostela

Correo electrónico: asesoria.bibliotecas@edu.xunta.gal

 

 

Eva Cancio Rascado  

Asesora de bibliotecas escolares servizos centrais
Xestión documental Koha, Meiga
Plataforma de préstamo dixital E-LBE.2

Teléfono: 981 546 547 

 

Eduard Velasco 

Asesor de bibliotecas escolares servizos centrais

Teléfono: 881 997 562

 

María Neira Cerdeira  

Asesora de bibliotecas escolares servizos centrais 

Teléfono: 881 997 330 

 

Saleta González Carnero

Asesora de bibliotecas escolares servizos centrais

Teléfono:  881 997 637

 

 

Xornada de Bibliotecas Escolares de Galicia 2025

 
 
 
 O vindeiro sábado 15 de novembro celebrarase no Palacio de Congresos de Santiago de Compostela a Xornada de Bibliotecas Escolares de Galicia 2025. Daranse cita equipos de biblioteca, docentes, asesores/as dos centros de formación do profesorado e persoas expertas na temática do lema deste curso "Biblioteca escolar + Deseño = Viaxe á creatividade".
 
 
Unha xuntanza que falará de competencia e prácticas lectoras, libros, deseño, a colección, a planificación do traballo nas nosas bibliotecas,  a alfabetización informacional...
 
 
Será, novamente, unha ocasión para o encontro entre o profesorado deste amplo colectivo de docentes que poñen en pé as bibliotecas escolares galegas, o reforzo de vínculos persoais e profesionais e, con toda seguridade, o comezo de novas colaboracións para o presente curso.
 
 

Recursos e equipamento para a biblioteca escolar

 

 
 
 
 
Achegamos un documento coa relación de recursos e equipamento que pode ter unha biblioteca escolar. Cada biblioteca seleccionará os materiais, recursos e equipamento, máis axeitados segundo o espazo dispoñible, a idade do alumnado e a actividade da mesma, así como bibliografía que apoie e optimice o seu uso (fondos de arte, manualidades, reciclaxe, matemáticas, física, bioloxía, xeografía, historia, música, programación, robótica...).
 
 
Os recursos que se merquen atenderán a diversidade do alumnado e as múltiples facetas e obxectivos da biblioteca escolar entre os que se sitúa a mellora da competencia informacional e mediática (ALFIN/AMI) así como propiciar a aprendizaxe por proxectos e outras metodoloxías activas.
 
 
 
 
 

Resolución provisional da convocatoria do programa de Clubs de lectura para o curso 2025/26

 
 
 
O Portal Educativo vén de publicar a Resolución provisional de centros seleccionados  na convocatoria do programa Clubs de lectura nas modalidades de nova incorporación e de continuidade para o curso 2025/26.
 
 
Abrirase un prazo de 5 días hábiles, contados a partir do día seguinte ao da publicación no Portal Educativo, para efectuar reclamacións ou renuncias. 
 

  • PUBLICACIÓN NO PORTAL EDUCATIVO

Resolución definitiva da convocatoria do programa de Biblioteca Creativa para o curso 2025/26

 

 
 
 
 
O Portal Educativo vén de publicar a Resolución  da Dirección Xeral de Ordenación e Innovación Educativa  pola que se resolve definitivamente a convocatoria do programa de BIBLIOTECA CREATIVA, en centros públicos non universitarios de titularidade da Consellería de Educación, Ciencia, Universidades e Formación Profesional integrados no Plan de mellora de bibliotecas escolares, para curso 2025/26. Integran o programa 25 novos centros seleccionados, así como aqueles solicitaron continuidade para o curso 2025/26.
 
 
 
 

Resolución provisional da convocatoria do programa Lectura e familias para o curso 2025/26

 
 
 
O Portal Educativo vén de publicar a  resolución provisional de centros seleccionados  na convocatoria do programa Lectura e familias nas modalidades de nova incorporación e de continuidade para o curso 2025/26.
 
Abrirase un prazo de 5 días hábiles, contados a partir do día seguinte ao da publicación no Portal Educativo, para efectuar reclamacións ou renuncias.
 

Novembro, Mes da Ciencia en Galego nas Bibliotecas - 2025

 

 
 
 
 
"Para que a transformación requirida avance con solidez, o coñecemento
debe chegar a todos os niveis da sociedade. É esencial fortalecer a súa
transferencia ao tecido produtivo para que se traduza en valor engadido
para Galicia. Pero non só: cómpre reforzar a transferencia social do
coñecemento a través da divulgación, da cultura científica e da ciencia
cidadá, conectando a investigación coas necesidades reais da cidadanía
e fomentando unha sociedade máis informada, crítica e participativa.

As bibliotecas son parte esencial deste ecosistema: non só como
espazos físicos, senón como nodos de encontro, conexión social e
aprendizaxe permanente.A súa transformación dixital e social facilita que
o coñecemento circule, que a ciencia se comparta e que máis persoas
participen activamente, proporcionando as ferramentas para seguir
aprendendo, cuestionando e creando". 
 
Concepción Paz Penín 
 
 
 
Desde a Consellería de Cultura, Lingua e Xuventude, en colaboración coa Conselleria de Educación, Ciencia, Formación Profesional e Universidades, vense impulsando a celebración anual do mes de novembro como o MES DA CIENCIA EN GALEGO NAS BIBLIOTECAS. Iníciase esta actuación coa elección dunha imaxe e a difusión dun texto, a modo de MANIFESTO, de Concepción Paz Penín, enxeñeira industrial, catedrática e doutora pola Universidade de Vigo. Actualmente dirixe o Departamento de Enxeñaría mecánica, máquinas e motores térmicos e fluídos nesa universidade. No ano 2023 recibiu o premio María Wonenburger, que recoñece o labor das mulleres científicas galegas.
 
 
O manifesto para este ano 2025 abrirá moitas rutas de traballo e investigación coas que poder sementar e degustar a ciencia nas nosas bibliotecas escolares.
Desde a Asesoría de bibliotecas escolares realizouse unha recompilación de recursos dixitais , relacionados coa ciencia, en galego, que se pon a disposición de todas as bibliotecas: libros e unidades didácticas descargables en formato pdf, páxinas web de institucións, museos e asociacións de profesores e divulgadores científicos, convocatorias e propostas, blogs de ciencia dos centros educativos, experiencias de bibliotecas escolares, etc. 
 
 

Plan de Lectura, Escritura e Acceso á información


 
 
O Portal Educativo vén de publicar a Resolución do 16 de outubro de 2025, da Dirección Xeral de Ordenación e Innovación Educativa pola que se ditan instrucións para o deseño, elaboración e implementación do Plan de Lectura, Escritura e Acceso á información nos centros docentes non universitarios sostidos con fondos públicos da Comunidade Autónoma de Galicia. 
 
 

BIBLIOTECA ESCOLAR + DESEÑO = VIAXE Á CREATIVIDADE

 
 
 
Un curso máis abrímoslle a porta á creatividade nas bibliotecas escolares, deste volta a través do deseño. O deseño que acompaña desde o inicio a comunicación escrita, que é orixe de tipografías, logotipos e páxinas, que consegue achegar a información da maneira máis impactante ou máis sutil. O deseño gráfico que atopamos desde a orixe dos tempos da escrita e que hoxe en día se espalla a través de aplicativos dixitais. Unha oportunidade para crear desde as bibliotecas do hoxe e do futuro, tecendo desde a nosa propia historia, coas referencias imprescidibles das editoriais Nós ou Castrelos, do Laboratorio de Formas e Ediciós do Castro… e de mestres do cartelismo como Xosé Vizoso. Propoñemos mirar os libros desde a súa orixe, coñecer o proceso da edición, da composición, da escolla de tipos, papeis, cubertas e encadernacións, da revisión da maqueta e da difusión… e coñecer as persoas que forman parte dese mundo da edición e do deseño gráfico. Deseño gráfico que tamén trascende do mundo do libro e está presente na publicidade, a prensa, as etiquetas, as marcas corporativas… e en tantos outros ámbitos da nosa vida cotiá.
 
O cartel que Desescribir nos ofrece para este curso é unha porta aberta a esa creatividade a partir da raíz: o alfabeto e as infinitas posibilidades que permite a partir dunha sinxela pauta. Sumémoslle deseño ás bibliotecas escolares e enrolémonos nesta viaxe á creatividade! 
 

Resolución provisional da convocatoria do programa Radio na Biblio para o curso 2025/26

 
 
O Portal educativo vén de publicar a Resolución provisional de centros admitidos na convocatoria do programa Radio na Biblio nas modalidades de nova incorporación e de continuidade. 
 
 
Abrirase un prazo de 5 días hábiles, contados a partir do día seguinte ao da publicación, para realizar reclamacións e renuncias. 
 

  • PUBLICACIÓN NO PORTAL EDUCATIVO

Resolución provisonal da convocatoria do programa Biblioteca Creativa para o curso 2025/26

 
 

 
 
 
 
O Portal Educativo vén de publicar a Resolución provisional de centros seleccionados  na convocatoria do programa Biblioteca Creativa nas modalidades de nova incorporación e de continuidade.
Abrirase un prazo de 5 días hábiles, contados a partir do día seguinte ao da publicación, para realizar reclamacións e renuncias. 
 
 
 

Día das Escritoras 2025

 
 
 
O Día das Escritoras é unha iniciativa  organizada entre a Biblioteca Nacional de España, a Federación Española de Mujeres Directivas e Executivas Profesionais e Empresarias (FEDEPE) e a Asociación Clásicas e Modernas, asociación para a igualdade de mulleres e homes na Cultura. Ademais, contará coa colaboración de Asociación Colexial de Escritoras e Escritores (ACE) e oCentro Español de Dereitos Reprográficos (CEDRO). Desde 2016 búscase reivindicar o labor e o legado das escritoras a través da historia.
Como en edicións anteriores, a data elexida é o luns máis cercano á festividade de Teresa de Jesús, o 16 de outubro. A X Edición celébrase este ano 2025  o 13 de outubro baixo o lema "1975: Escribide, compañeiras!l".
 
"As escritoras activas ao redor de 1975 reflicten en moitas das súas obras o desexo dun cambio profundo e radical nas vidas das mulleres, denuncian a falta de liberdade e de autonomía, dan testemuño do que ocorre fóra de España, esixen unha nova orde amorosa e un cambio nas leis que as veu marxinando durante o franquismo".
Anna Caballé, comisaria de la X edición del Día de las Escritoras
 
Desde as bibliotecas escolares propomos que se visibilice a obra das escritoras galegas, ben a través dunha exposición, ben lendo fragmentos nunha maratón literaria ou mesmo nos clubs de lectura ou a través de actividades de investigación, exploración ou creación...
 
Na selección de textos en galego a transcrición dos distintos fragmentos decidiuse manter a ortografía da escrita orixinal previa ás convencións derivadas das Normas Ortográficas e Morfolóxicas do Idioma Galego de 1983. Alén de ser unha mostra da literatura do momento, é tamén un reflexo das dificultades que comportaba escribir nunha lingua que carecía dunhas normas ortográficas e morfolóxicas estables.
 
Vaia con esta escolma o noso agradecemento e recoñecemento a estas dez autoras, mulleres que nos anos 70 publicaron en galego, pola súa obra e o seu compromiso coa nosa lingua e a nosa cultura. 
 
 
Animamos a toda a comunidade educativa a participar nesta actividade que visbilizaremos a través desta páxina e nas redes sociais. #bescolaresgal #bescolaresgalabertas #DíaDasEscritoras25 
 
Actividades  nas bibliotecas escolares de Galicia:
 

Resolución definitiva do Plan de mellora de bibliotecas escolares para o curso 2025/26

 

 

 

 

 

 

 

O Portal Educativo vén de publicar a Resolución da Dirección xeral de Ordenación e Innovación Educativa pola que se resolve definitivamente a convocatoria do Plan de mellora de bibliotecas escolares en centros públicos non universitarios de titularidade da Consellería de Educación, Ciencia, Universidades e Formación Profesional para o curso 2025/26. 

 

 

 

 

Día das Bibliotecas 2025: Contra a DESINFORMACIÓN

 
 
 
Dende 1997 celébrase o Día das Bibliotecas o 24 de outubro,  unha conmemoración impulsada pola Asociación de Amigos del Libro Infantil y Juvenil á que se foron sumando, xa dende hai algún tempo, o propio Ministerio de Cultura e todas as administracións autonómicas.
A Dirección Xeral do Libro, o Cómic e a  Lectura, a través da Subdirección Xeral  de Coordinación Bibliotecaria, impulsa a celebración do Día das Bibliotecas, este 24 de outubro de 2025.   
 
O lema deste ano, "Contra a desinformación: bibliotecas", pretende destacar o papel fundamental que desempeñan todas as tipoloxías de bibliotecas (públicas, escolares, universitarias, especializadas e nacionais/rexionais) na loita contra a desinformación.
 
As bibliotecas combaten a desinformación non só a través dos seus recursos, como as coleccións de libros e prensa ou as bases de datos, senón tamén a través dun uso adecuado das novas tecnoloxías. E, por encima de todo, as bibliotecas son un dique de contención contra a desinformación grazas ao seu persoal bibliotecario, que traballa como curador de contidos e apoio aos usuarios na procura de información a través de fontes fiables e contrastadas. 
As bibliotecas escolares galegas amosáronse, e continúan facéndoo, como unha ferramenta ao servizo da comunidade educativa ofrecendo recursos, información e apoio,  lugares que contribúen á formación dunha cidadanía crítica, activa e comprometida. O seu traballo de deseño e planificación de actividades e servizos desenvólvese cunha perspectiva de Axenda 2030 poñendo o foco en que ninguén das nosas comunidades educativas debe quedar atrás.
 
A biblioteca escolar, esa biblioteca pola que pasan todas as nenas e todos os nenos do país, a primeira biblioteca que lles aprende, tamén, a usar outras, que os pon en contacto con eses outros espazos do coñecemento e do lecer, eses lugares nos que pasan moitas cousas, que son as bibliotecas públicas, eses lugares que están sempre ao noso carón: as BIBLIOTECAS.  
 
 
#DíaDasBibliotecas #DíaDasBibliotecas25 #ContraaDesinformaciónBibliotecas 
 
Actividades nas bibliotecas escolares de Galicia:
 

Convocatoria do programa Lectura e Familias para o curso 2025/26

 

 
 
 
 
 
 
O Portal Educativo vén de publicar a Resolución do 16 de xullo de 2025 da Dirección Xeral de Ordenación e Innovación Educativa pola que se convoca a participación no programa LECTURA E FAMILIAS, no contexto do Plan LIA de Bibliotecas Escolares (Lectura, Información e Aprendizaxe), para promover a lectura e o uso responsable da información entre os distintos sectores da comunidade educativa, en centros públicos de titularidade da Consellería de Educación, Ciencia, Universidades e Formación Profesional, integrados no Plan de mellora de bibliotecas escolares, para o curso 2025/26.
 
 
O prazo de presentación de solicitudes será de quince días naturais a partir do día seguinte ao da publicación da presente convocatoria no portal educativo. 
 

Plan de Biblioteca

 

 
 
 
 
 
 
Achégase un cadro resumo do Plan de Biblioteca e o Plan Anual de Biblioteca, no que se indica en que documentación do centro deben estar recollidos, que persoas son as responsables da súa elaboración, cal é a finalidade de cada un e que actuacións deben contemplar. Este documento parte das Instrucións de inicio de curso da Dirección Xeral de Ordenación e Innovación Educativa. 
 

Convocatoria do programa Biblioteca Creativa para o curso 2025/26

 

 
 
 
 
 
 
 O Portal Educativo vén de publicar a Resolución do 16 de xullo de 2025 da Dirección Xeral de Ordenación e Innovación Educativa pola que se convoca a participación no programa de BIBLIOTECA CREATIVA, no contexto do Plan LIA de Bibliotecas Escolares (Lectura, Información e Aprendizaxe) para apoiar a cultura da experimentación, a creación e a investigación, en espazos creativos e cooperativos no seo das bibliotecas escolares dos centros públicos non universitarios de titularidade da Consellería de Educación, Ciencia, Universidades e Formación Profesional integrados no Plan de mellora de bibliotecas escolares, para curso 2025/26.
 
 Poderán participar neste programa de innovación educativa centros públicos non universitarios de titularidade da Consellería integrados no Plan de mellora de bibliotecas escolares durante o curso 2025/26, que matriculen alumnado de ensino infantil, educación primaria, educación  secundaria obrigatoria, bacharelato e/ou formación profesional, tanto en réxime ordinario como aprendizaxe permanente, ou ensinanzas artísticas, idiomas e deportivas.
 
  Non poderán participar os centros que se incorporan ao Plan de mellora de bibliotecas escolares no curso 2025/26. 
 
 
O prazo de presentación de solicitudes, será de quince días naturais a partir do día seguinte ao da publicación da presente convocatoria no portal educativo. 
 

Convocatoria do programa Radio na Biblio para o curso 2025/26

 
O Portal Educativo vén de publicar a Resolución do 20 de xuño de 2025 da Dirección Xeral de Ordenación e Innovación Educativa pola que se convoca a participación no programa RADIO NA BIBLIO, no contexto do PLAN LIA de Bibliotecas Escolares (Lectura, Información e Aprendizaxe)  para a introdución da radio nas bibliotecas escolares dos centros públicos non universitarios de titularidade da Consellería de Educación, Ciencia, Universidades e Formación Profesional integrados no Plan de mellora de bibliotecas escolares, para o curso 2025/26.  
 
O prazo de presentación de solicitudes, será de quince días naturais a partir do día seguinte ao da publicación da presente convocatoria no portal educativo. 
 

Instrucións para o desenvolvemento da organización e o funcionamento das bibliotecas escolares no curso 2025/26

 

 
 
 
 
 O Portal Educativo vén de publicar a Resolución do 1 de setembro de 2025, da Dirección Xeral de Ordenación e Innovación Educativa, pola que se ditan instrucións para o desenvolvemento da organización e o funcionamento das bibliotecas escolares nos centros docentes non universitarios, de titularidade da Consellería de Educación, Ciencia, Universidades e Formación Profesional no curso académico 2025/26.
 
  

Convocatoria do programa Clubs de Lectura para o curso 2025/26

 

 
 
 
 
 
 O Portal Educativo vén de publicar a Resolución do 1 do xullo de 2025 da Dirección Xeral de Ordenación e Innovación Educativa, dentro das actuacións para o fomento da lectura no ámbito educativo, no contexto do Plan LIA de Bibliotecas Escolares (Lectura, Información e Aprendizaxe), pola que se incentiva o funcionamento de CLUBS DE LECTURA en centros públicos non universitarios de titularidade da Consellería de Educación, Ciencia, Universidades e Formación Profesional durante o curso 2025/26.
 
 
 
O prazo de presentación de solicitudes comezará a contar a partir do día seguinte ao da publicación da presente convocatoria no portal educativo e rematará o  día 26 de setembro de 2025. 
 

Resolución provisional do Plan de mellora de bibliotecas escolares para o curso 2025/26

 

 
 
 
 
 
O Portal Educativo vén de publicar a Resolución provisional da Dirección Xeral de Ordenación e Innovación Educativa, coa relación dos centros seleccionados na modalidade de nova incorporación que se integran no Plan de mellora de bibliotecas escolares no curso 2025/26, así como as asignacións económicas correspondentes.
 
 
Ábrese un prazo de cinco días naturais, a partir do día seguinte ao da publicación, para efectuar reclamacións ou renuncias. 
 
 

Novos artigos sobre bibliotecas escolares na Revista EDUGA de xuño de 2025

 
 
A Consellería de Educación, Ciencia, Universidades e Formación Profesional vén de facer público o novo número da Revista Galega do Ensino (EDUGA), que conta cunha sección fixa de Bibliotecas Escolares. Neste número 89 de xuño de 2025 pubícanse un total de sete artigos, nas tres sub-seccións: Biblioteca escolar, Boas prácticas e Hora de ler. Nestes artigos, atopamos reflexións e actividades sobre o programa Radio na biblio, a Hora de ler, a biblioteca inclusiva e solidaria, as lecturas compartidas, a internacionalización desde a biblioteca e os retos da biblioteca dun CIFP.
 
Lecturas sobre as que reflexionar e nas que afondar nos días de descanso que se achegan.  
 
 

Saber ler é unha cuestión (de) práctica: Hora de Ler

Cristina Novoa Fernández

Exasesora de Bibliotecas Escolares de Galicia 

 

 

 Internacionalizar desde a biblioteca escolar.

Experiencias e propostas desde a EOI de Lugo para promover a mobilidade do alumnado.

Alma lópez Figueiras

EOI de Lugo 

 

 Bibliotecas escolares inclusivas e solidarias no século XXI.

#CAFI_ IncluÍDAS e biblioteca escolar.

Mercedes Teijeiro Gato 

CIFP Compostela (Santiago de Compostela-A Coruña) 

 

 Os retos e as experiencias da dinamización da biblioteca do CIFP A Carballeira.

Mariña Fontenla Fortes

CIFP A Carballeira - Marcos Valcárcel (Ourense)

 

Sintonizando cultura desde Radio Petela.

Doa González Gómez

CEIP de Petelos (Mos-Pontevedra) 

 

 A lectura fácil como ferramenta real para a inclusión.

A lectura é un dereito de todos e todas e para todos e todas.

Miriam Rodríguez Vázquez

CEE Infanta Elena (Monforte de Lemos-Lugo) 

 

Ler, compartir, aprender.

Creando comunidade a través da lectura. 

Alicia Nimo Liboreiro 

CEIP P. de Outes (Outes-A Coruña) 

Lecturas que alumean os días de verán

 
 
 
[...] ela adoraba ler na cama, naquela atmosfera de intimidade absoluta, case luxuriosa, que se creaba cando só o libro aparecía alumeado e o resto do mundo permanecía esvaecido e silente. Os seus ollos esvaraban agora polos dous amatles cheos de paxaros coloridos e retorneadas flores exóticas que ela mesma lle regalara a avoa Amalia despois dunha viaxe a México e, tamén, polo pequeno andel da cabeceira en que se mesturaban vellos libros infantís con algunhas lecturas recentes, e deixábase abrazar polo silencio balsámico da noite da fin do verán, co cheiro a maré baixa a lle penetrar as narinas, ollando, agora con certa resignación, unha lúa inmensa, as estrelas das que, alén da Vía Láctea, só aprendera a recoñecer a osa maior e o carro [...]
  
Fuentes, Moncha (2018). O mar que nos leva. Xerais
 
 
Chega o tempo de verán e as bibliotecas escolares de Galicia preparan as súas recomendacións lectoras e os seus préstamos para espazos de lecer.
 
Lecturas que alumean para nós, que non deixaremos pasar e habitarán as nosas xeografías lectoras.
 
 

Imaxe do Encontro dos Clubs de Lectura da rede BiblioTea
 
Seleccións das bibliotecas escolares de Galicia: 
 

Adaptación da CDU para as bibliotecas escolares galegas

 

 

 

 

 

 

 

 

 

Dende a creación da Asesoría de Bibliotecas Escolares púxose a disposición dos responsables das bibliotecas escolares de Galicia unha adaptación da CDU que servise ás necesidades e características destas.

 

 

 

Facilitamos agora estes materiais actualizados, xunto cun documento que contén os encabezamentos de materia máis empregados nas bibliotecas escolares.
 
Documento que contén información xeral sobre a adaptación da CDU ás bibliotecas escolares, as
signaturas topográficas e a organización dos fondos  documentais.
 
CDU adaptada ás bibliotecas escolares galegas na súa versión abreviada (con dous díxitos) que se emprega na maioría de centros educativos que escolarizan alumnado de educación infantil, educación primaria e educación secundaria obrigatoria.
 
CDU adaptada ás bibliotecas escolares galegas na súa versión estendida (con tres díxitos) que se emprega habitualmente en centros educativos que escolarizan alumnado de bacharelato, formación profesional e outros centros que precisan dunha maior especificidade na catalogación dos fondos documentais. 
É un documento que serve de axuda tamén no labor de catalogación en centros que utilizan a versión abreviada.
 
Táboa moi simplificada da CDU adaptada ás bibliotecas escolares galegas.
 
Documento de apoio á catalogación no referido aos termos de materia.
 
Documento de apoio á catalogación no referente ás series e coleccións.
 
 
Documento de apoio á catalogación coas especificacións precisas nunha EOI. 
 
 

Convocatoria do Plan de mellora de bibliotecas escolares para o curso 2025/26

 
 
 
O Portal Educativo vén de publicar a Resolución do 4 de xuño de 2025 da Dirección xeral de Ordenación e Innovación Educativa pola que se convoca o Plan de mellora de bibliotecas escolares en centros públicos non universitarios de titularidade da Consellería de  Educación, Ciencia, Universidades e Formación Profesional para o curso 2025/26
 
O prazo de presentación de solicitudes comezará ao día seguinte da publicación desta convocatoria no portal educativo e finalizará o día 4 de xullo de 2025. 
 
123456789…seguinte ›última »