|
||||||||||||||||
Este ano 2024 celebrouse o 50 aniversario da Revolução dos Cravos, que se produciu o 25 de abril de 1974. Para comemoralo tivemos, xa desde primeiros de abril, unha exposición, que nos cedeu a Asociación José Afonso, na que se ven cartaces de diferentes comemoracións desta efeméride. A rapazada tamén fixo caraveis de papel e mais deseñou os seus propios cartaces co que construímos un decorado para a actuación do Coro das emocións que, xunto co alumnado de portugués, e todas as persoas voluntarias que quixeron achegarse, cantamos a canción "Grándola, vila morena", interpretada por primeira vez en Compostela, antes de que soase na radio portuguesa como sinal da revolución. |
|||
O concello de Ames ofreceunos, dentro dos actos para homenaxear a Rosalía de Castro, unha andaina teatralizada por un espazo (a Costa do Mar de ovellas) no que transcorre un dos seus poemas máis famosos (A velliña que está xorda). Esta actividade, programada para o mes de febreiro, non se puido realizar daquela debido á chuvia que deixou o camiño intransitable, polo que se desenvolveu este pasado martes 7 de maio. Alumnado de 3º ESO A e B, que quixo asistir, foi en autobús ata a ponte de Augapesada, onde se encontraron con Rosalía de Castro e logo, desde alí, subiron a Costa do Mar de ovellas, acompañados polos actores e músicos do grupo "Os Quinquilláns" que foron facendo unha representación das partes principais do poema.
|
|||
Lara Fernández Portela, alumna de 1º ESO, co texto "Xirando nunha nora cheíña de xeometría" referido á fotografía deste obxecto, foi a gañadora do premio "Matemáticas na vida" convocado polo EDLG. Entregoulle o premio Mariló Padín, profesora de matemáticas e membro do EDLG.
Canta xeometría hai nunha nora! |
|||
Este pasado luns, 6 de maio, comezamos cos actos para homenaxear a Luísa Villalta, escritora á que se lle dedican as Letras Galegas este ano. A primeira actividade foi unha performance teatral sobe a autora coa que o actor e músico Serafín Marcos entretivo o alumnado de 1º ESO
|
|||
|
|||
Os MillaFalantes, nesta ocasión, estiveron a investigar un pouco sobre Luisa Villalta, autora á que se lle vai dedicar o Día das Letras Galegas. Un primeiro podcast que nos achegan Alba García, Sara Martínez, Paula Lourido e Erik Cadavid que se centra na relación entre a literatura e a música. |
|||
Dentro dos materiais elaborados para a exposición "Ao son da oralidade" que se organizou no Museo do Pobo Galego no primeiro trimestre deste curso había unha parte dedicada á toponimia. Desde a Sección de toponimia da Real Academia Galega convidáronnos a gravar uns vídeos presentándoa e así o fixemos. Deixámosvos aquí os vídeos e xa sabedes que podedes ver algúns dos materiais da exposición e participar nalgúns dos xogos na planta intermedia, en fronte á biblioteca:
|
|||
Novo episodio do grupo MillaFalantes que desta vez len a obra de Núñez Singala "Planificación estratéxica". Alba García, Sara Martínez, Paula Lourido con Érik na parte técnica publican hoxe o primeiro episodio. Estade atentos e atentas que en breve poderedes escoitar a obra completa!
|
|||
Aproveitando que pasaba por aquí... estreamos programa entrevistando a Carlos Callón. Alba, Sara, Paula con Érik na parte técnica. |
|||
O pasado 4 de abril, o profesor e escritor Carlos Callón estivo no noso centro para falar co alumnado de 4º ESO sobre sociolingüística e historia recente da lingua. Centrouse principalmente en toda a historia de agravios que ten documentada na publicación da súa autoría "O libro negro da lingua galega" e arredor da que este alumnado xa tiña traballado nas aulas.
|
|||
Foi o pasado día 3 de abril. O alumnado do EDLG, tanto o do colectivo Euterpe como un pequeno grupo da radio, participou na Gala do Enreguéifate 2024. Os primeiros actuaron coa Orquestra da Regueifa, composta polo noso alumnado xunto con outro dos IES Marco de Camballón de Vila de Cruces e do IES Antonio Fraguas de Santiago. Como as prazas eran moi limitadas só puido acudir unha pequenísima representación de alumnado da radio que se repartiu entre facer entrevistas unhas e recoller información e datos para reportaxe outras. Tamén estivo actuando no escenario o rapeiro Vila C, estudante de 1º Bac do noso centro. Aquí quedan as pílulas radiofónicas e mais un pequeno resumo audiovisual da xornada.
|
|||
O grupo de alumnado de 3º ESO pertencente ao EDLG participou este curso no Club de debate como Xurado Xuvenil. Convidáronos á fase previa a Santa Comba e alí estiveron moi atentos e atentas aos oito debates que se desenvolveron, catro pola mañá e outros catro pola tarde. Tomaron todas as notas, cubriron todas as rúbricas e finalmente as representantes deron o seu veredito. Podedes escoitalo, xunto cas imaxes da xornada, no seguinte vídeo:
|
|||
Convidámosvos a escoitar o primeiro episodio dun novo programa "De pé a pa". Acabado de crear por un grupo de rapazada de 1º ESO D (Ada Asorey, Xabier Barcala, Ainhoa Díaz, Mariña Dopico, Mauro Vilas, Hugo Vrhowski e Mauro Vrhowski) . Coa expresión "De pe a pa" que é o mesmo ca dicir "De cabo a rabo" nomearon un programa para falar do que lles pete, dun lote de temas variados. Neste primeiro episodio quixeron demostrar o seu amor polos animais e fixeron un programa xusto que fala do maltrato animal. |
|||
Esta princesa está durmida? Será que non quere espertar? Por que queren que esperte? Para casala con quen non quere? Estas son as preguntas que conforman a sipnose da obra Dormente de Raquel Castro, publicada en 2021 e que un dos grupos do alumnado do EDLG que se centrou en facer teatro lido escolleu para dramatizar na radio. Yago Bouzas, Héctor Pin, Carlota Ageitos, Víctor García, Mateo Campos e Gael Rodríguez na parte técnica. Deixámosvos o Preacto e o Acto 1, en breve poderedes escoitar o Acto 2:
Dormente: Preacto Acto 1 |
|||
Erik Cadavid na parte técnica e como locutoras Paula Lourido, Sara Martinez, Marta Mayo, Paula Mosquera e Nicole Izaguirre. |
|||
Este martes 5 de marzo, o alumnado que mellor resolveu o kahoot sobre mulleres científicas elaborado polo club de ciencia, disfrutou dunha sesión de peli e flocos de millo. Nestas fotos podedes ver algúns dos carteis elaborados, como foi a xornada na que xogamos ao kahoot e a sesión de cine coa película escollida: Marte.
|
|||
Este curso avanzamos con episodios específicos do programa "Vozes da lusofonia" sobre os libros da maleta prestada pola Consellería: Iago Varela fai un episodio no que explica o que descubriu hai pouco sobre o portugués: |
|||
O Día Mundial da Radio celébrase o 13 de febreiro, pero este ano cadrou en pleno entroido. Daquela, fixemos un programa especial xusto o último día lectivo antes desta festividade e a temática tiña que ser acaída coas datas, polo que o Entroido tradicional galego centrou os 100 minutos deste programa. Con entrevistas a persoas que viñeron falarnos do Entroido de Laza, de Xinzo, de Salcedo, do enterro da sardiña de Bueu... E como non, tamén como se fan as filloas. Pechouse cun kahoot "analóxico" entre todas as persoas participantes e o alumnado gañador recibiu de agasallo unhas caixas con doces de entroido cedidas pola ANPA. Deixámosvos un vídeo con momentos do que foi o programa de radio e mais a entrevista que lle fixeron desde Ames Radio a parte do noso alumnado con motivo deste evento (minuto 50).
|
|||
Dámoslle a benvida a un novo grupo de rapazas de 1º ESO que se animaon estas últimas semanas a achegarse ao EDLG para facer radio. Comezaron Silvia, na parte técnica, e Thais, na locución, e fixeron un primeiro episodio. Logo xuntáronse a elas Alba e Marina. Agora son tres locutoras e unha técnica e nesta semana elas soas prepararon e gravaron un programa especial para hoxe, 8 de marzo, Día internacional da muller. Deixámosvos os dous episodios:
|
|||
|
|||
O grupo que se fixo chamar "Radio Madrid Falantes" composto por alumnado de 2º ESO (Pablo, Juan, Gabriel, Martín e Xacobe na parte técnica) fixeron os seus dous primeiros episodios:
O grupo de deportes do MillaFaladoiro (Pablo, Xoel e Diego, tamén de 2º ESO) fixeron o seu cuarto episodio, neste caso falando de tenis:
|
|||
Este curso 2023-24 a través da resolución do 28 de febreiro de 2024 da Dirección Xeral de Ordenación e Innovación Educativa, pola que se ditan instrucións para a acreditación das competencias dixitais do alumnado que cursa ensinanzas de educación secundaria obrigatoria e bacharelato na Comunidade Autónoma de Galicia no curso 2023/24 o alumnado podera acreditar os niveis de competencias dixitais de iniciación e intermedio. Estes niveis correspóndense cos niveis de aptitude do Marco galego de competencias dixitais recollidos no documento Bases para o desenvolvemento do Marco galego de competencias dixitais. Acreditación do alumnado de educación secundaria obrigatoria
Acreditación do alumnado de bacharelato
Os requisitos para presentarse á proba son:
As convocatorias de probas específicas, no curso 2023/24, realizaranse no instituto consonte ao seguinte calendario:
Para solicitar a participación tereds que cubrir o formulario de inscrición e entregalo na secretaría do centro. O prazo remata o día 15 de marzo.
|
|||
O pasado 23 de febreiro celebramos o Día de Rosalía no centro pero tamén participamos nas actividades do Concello de Ames, tanto na gala que celebraron o propio día á tardiña na Casa de Cultura de Bertamiráns, coma coa acción "Luxo no lixo". Á gala achegámonos cun programa especial sobre Rosalía no que Diego Madarnás fixo en directo o seu programa de "Entrevistas con Diego" cuns "expertos" en Rosalía (Yago, Mateo, Claudia e Héctor)
Por un lado, colocamos ao lado das papeleiras do interior do centro os adhesivos que o concello imprimiu dentro da campaña "Luxo no lixo" (coa que se reivindica a poesía -un luxo- en calquera espazo, mesmo ao lado do lixo). Así podemos ler versos da poeta sempre que vaiamos tirar algo ao lixo, ou o que é o mesmo, ir tirar algo ao lixo para poder ter o luxo de ler poesía.
Tamén fixemos ese día unha lectura voluntaria de poemas nos recreos, en colaboración coa biblioteca. A rapazada do EDLG de 3º decorou e preparou un espazo de lectura:
|
|||
No noso IES sumámonos o pasado xaneiro á campaña de dinamización da lingua galega "Aquí tamén se fala galego" nacida no IES Rafael Dieste o curso pasado e que se estendeu case 200 centros de toda Galicia. O alumnado de 3º ESO participou activiamente nesta campaña repartindo cartaces por comercios e locais de diferente índole do Milladoiro e mesmo tamén de Santiago. A continuación podedes escoitar a presentación da campaña, feita por Julia, Noa, Antía e Alicia, así como a opinión dalgúns compañeiros que participaron na mesma.
Diego Madarnás, no seu programa de entrevistas, quixo falar con Alberto Pombo, a persoa que ideou esta campaña o curso pasado, no IES Rafael Dieste, así como con Román Landín, responsable da mesma no IES núm. 1 da EStrada. Ao mesmo tempo entrevistou a alumnado dun e doutro centro. Pombo: (IES R. Dieste) Noa (IES R. Dieste) |
|||
Un interesante conto sobre unha raíña moi nosa (a raíña Lupa), un príncipe lagargo, un demo e a súa filla... unha historia diferente que escribiu Jacobo Paz e que interpretaron Ángela Tronceda (píncipe), Claudia Santalla (raíña), Miguel Franco (demo), Víctor García (narrador e BrancaFlor). Na parte técnica Gael Rodríguez.
|
|||
Para celebrar o Día da Muller e a Nena na Ciencia, o Club de Ciencia organiza un xogo de preguntas sobre as mulleres científicas das que previamente elaboraron uns cartaces informativos. Bótalle un ollo aos cartaces colocados nos corredores do instituto e participa no kahoot de mulleres científicas. Debes inscribirte na biblioteca nos recreos do venres 9 de febreiro. O concurso celebrarase o venres 16 de febreiro. Consulta as bases e anímate a participar
|
|||
Pablo Paz, Xoel Reinaldo e Diego Pérez (alumos de 2º ESO) fan entrega dun novo episodio sobre deportes. Na parte técnica Gael Rodríguez. |
|||
O pasado venres, 26 de xaneiro, no pavillón polideportivo do Milladoiro participamos na feira de InnovAmes, unha xornada que organizou o Concello de Ames para empresas de innovación, a onde acudiron tamén as universidades e mais varios centros de ensino do concello, entre os que nos atopamos. O tema desta terceira edición foi a intelixencia artificial e ofrecéronnos un interesante obradoiro sobre o chat GPT, pero só tiña capacidade para 25 persoas polo que máis da metade do noso alumnado que foi á feira tivo que quedar fóra.
O Club de ciencias e mais o EDLG participamos colocando os nosos experimentos e a nosa radio nun stand polo que foron pasando durante toda a mañá as persoas que se achegaron ao evento. Aproveitamos para entrevistar a profesorado doutros centros, representantes de empresas e autoridades, desde o alcalde ás concelleiras de promoción económica ou educación. Durante a xornada, todo o alumnado participaba nunha xincana que gañou a rapazada do noso IES.
|
|||
O pasado mércores 17 de xaneiro achegámonos ata Rois, convidados polo SNL do concello de Ames, para participar na xornada de formación do Club de Debate, aínda que este ano non imos competir. O alumnado do IES do Milladoiro compartiu a xornada con alumnado de institutos de Carballo, Rois, Santa Comba, Santiago de Compostela, Teo e Val do Dubra. A actividade pretende favorecer o uso do galego oral en contextos formais (os propios debates) e informais (a convivencia que se xera). Traballáronse contidos relacionados coas habilidades comunicativas e fixéronse prácticas de debate. Tamén houbo outra xornada de formación o día anterior, nesta ocasión en Pontevedra, a onde acudiu o alumnado do IES de Bertamiráns. |
|||
