IES do Milladoiro

O desenvolvemento do plan proxecta O Laboratorio do ClimaDoiro e a colaboración da Biblioteca do IES do Milladoiro fan posible que, dende o 8 ao 29 de xaneiro, o noso alumnado poida acceder á exposición Expometeoro, realizada por MeteoGalicia.

A Asociación Galega de Reporteiros Solidarios (AGARESO), en colaboración co noso centro e a ACPP Galicia, ofrece ao alumnado de 2º de ESO a posibilidade de participar, de xeito voluntario, nun obradoiro de educación audiovisual gratuíto que se realizará no centro os luns de 16:30 a 18:30, do 29 de xaneiro ao 12 de marzo. O xoves 11 de xaneiro terá lugar en horario escolar a primeira sesión informativa para solicitar voluntarios.

O profesor da Facultade de Bioloxía da USC Óscar Cordero acudiu ao noso centro o martes 9 de xaneiro para falar co alumnado de bioloxía de 1º e 2º de Bacharelato das investigacións no eido da vacinación contra o cancro. Trátase dunha charla dentro do programa A Ponte da USC, no que o noso centro participa. O obxectivo é facilitar o tránsito entre o bacharelato e os estudos superiores e ofrecerlle ao alumnado a posibilidade de coñecer as últimas investigacións da man dos seus protagonistas.

Un dos grupos do IES do Milladoiro participante no VII Concurso Radiofónico de Teatro Lido vén de gañar o Premio do Público na gala organizada polo Concello de Ames o día 20 de decembro na Casa da Cultura de Bertamiráns. Lois Santiago, Hugo López e Isabella Marín, alumnos e alumna de 4º da ESO, recibiron o premio pola peza Lois e os Loisiños, e correspóndelles un agasallo en metálico ademais da satisfacción de ter o recoñecemento do público.

A Biblioteca do IES do Milladoiro organiza a participación do noso centro na V edición de El día más corto, festival internacional de curtametraxes. Os alumnos de 1º de ESO desfrutarán  deste evento o día 21 de decembro a partir das 12: 50.

Os días 19 e 20 de decembro os alumnos de 2º de ESO tiveron a oportunidade de participar nun obradoiro de química no MUNCYT (A Coruña).

Co motivo do Día Escolar da Non Violencia e da Paz, que terá lugar o martes 30 de xaneiro de 2018, a Biblioteca do IES do Milladoiro organiza o seu II Concurso literario baixo o título "TEXTOS EN PAZ", dirixido a todo o alumnado de ESO e Bacharelato. Bases neste enlace.

O sábado 16 de decembro, no marco do festival Cinema e crianza, será proxectada ás 11:00 na Casa da cultura de Bertamiráns a película De Milladoiro a Seidón, realizada polo alumnado participante no proxecto CINE EN CURSO (2016/2017). Mónica García, a coordinadora deste proxecto, asistirá á proxección para explicar como se desenvolveu esta iniciativa educativa. A entrada é libre e gratuíta.

A Biblioteca do IES do Milladoiro celebrou o luns 11 de decembro o 70 aniversario da Declaración dos Dereitos Humanos cunha lectura plurilingüe deles e a exposición de Amnistía Internacional Os dereitos humanos e a pintura.

   Durante o mes de novembro, o alumnado de Ciencias Aplicadas á Actividade Profesional (CAAP) participou nun proxecto de ciencia colaborativa de ámbito mundial. O proxecto leva por nome The art of crystallitation e foi deseñado pola Royal Society of Chemistry. Neste enlace pódese acceder a toda a información, ós datos obtidos polo alumnado e a algunhas imaxes da actividade.

Neste enlace podemos acceder ao resultado da segunda sesión de traballo, que versou sobre o sexismo nos medios de comunicación. O Laboratorio de Educación para o Desenvolvemento é unha iniciativa da Asociación Galega de Reporteiros Solidarios (AGARESO) na que o IES do Milladoiro participa nun traballo conxunto con outros catro centros galegos.

A Nova Escola Galega, en colaboración co Concello de Ames, organiza unha charla-debate sobre Redes sociais e mocidade, o mércores 13 de decembro ás 17:30 no IES do Milladoiro.

O martes 12 de decembro ás 17: 20 o coro Son Elas actuará para o alumnado de 2º de ESO no salón de actos do IES do Milladoiro.

Do 1 ao 18 de decembro poderemos ver, organizada pola Biblioteca do centro, a exposición da Secretaría Xeral da Igualdade da Xunta de Galicia Á violencia de xénero dille NON! Cun formato de banda deseñada e unhas mensaxes sinxelas e claras, amosa comportamentos discriminatorios presentes nalgunhas  relacións afectivas e sociais e que son un sinal incipiente de violencia machista.

Novembro é o mes da ciencia en galego nas bibliotecas. Con tal motivo, a biblioteca do IES do Milladoiro ten organizado:

• Exposición dedicada á figura do docente, botánico e metereólogo Baltasar Merinos. Traballos de investigación do alumnado de ciencias.
• Exposición no exterior da biblioteca: A pegada e a débeda ecolóxica en Galiza.
• Mostra e difusión dos fondos científicos recentemente adquiridos.

O proxecto O Laboratorio do ClimaDoiro, levado a cabo durante o curso 2016/2017 no noso IES e no que participaron 17 profesoras e profesores e alumnado de todos os cursos da ESO, foi recoñecido como PROXECTO DE EXCELENCIA dentro do programa Meteoescolas do plan Proxecta.

Os resultados das sesións de formación sobre condutas adictivas que impartiu a psicóloga Belén Montesa ao alumnado de 2º da ESO na semana do 6 ao 10 de novembro serán presentados ás familias nunha reunión que se celebrará no Salón de Actos do Instituto o vindeiro martes 28 de novembro a partir das 19:00.    

O pasado martes 21 de novembro tivo lugar na biblioteca do IES do Milladoiro unha reunión de Bibliotecas dos centros públicos do Concello de Ames para intercambiar experiencias e proxectos.

O xoves 23 de novembro o alumnado de 4º da ESO interesado acudirá á XI edición de GALICIENCIA no Parque Tecnolóxico de Galicia (Ourense).

O xoves 23 de novembro, ás 19:00, Carmela Sánchez (Etnoga. Patrimonio cultural) e Paco Veiga (Asociación Galega de Xogo Popular e Tradicional) darán unha charla no Salón de actos do IES do Milladoiro baixo o título De xogos e xoguetes en rede. Primeira base de datos sobre o patrimonio lúdico galego.

     O IES do Milladoiro súmase á campaña En negro contra as violencias que busca poñer na axenda pública a loita para rematar con todos os tipos de violencia contra as mulleres en vésperas do Día Internacional de Eliminación da Violencia Contra as Mulleres (25 de novembro).

Os resultados das sesións de formación sobre condutas adictivas que impartiu a psicóloga Belén Montesa ao alumnado de 4º da ESO na semana do 6 ao 10 de novembro serán presentados ás familias nunha reunión que se celebrará no Salón de Actos do Instituto o vindeiro martes 21 de novembro a partir das 19:00.

Neste curso escolar, todo o alumnado de 2º da ESO do IES do Milladoiro participa, desde o Departamento de Física e Química, no proxecto “AQUA” organizado pola fundación Ibercivis en colaboración co FECYT (Fundación Española da Ciencia e da Tecnoloxía).

O alumnado de 2º de ESO acudirá os días 9 e 10 de novembro ao Auditorio de Santiago para escoitar á actriz, escritora e contacontos  Paula Carballeira nunha adaptación da obra de Tolstoi A familia do Vurdalak, acompañada pola banda municipal de música. Despois realizarán unha visita guiada aos tellados da catedral.

O pasado luns 6 de novembro, no auditorio da Casa da cultura do Milladoiro, o narrador camerunés Samuel Mountoumnjou transportou o alumnado de francés de 3º de ESO ata o continente africano, dando así continuidade a unha tradición ancestral de narracións orais que se transmiten de pais a fillos.