Escoitar, Aprender e Compartir

O día 26 de febreiro arranca no IES Chapela o reto da Semaniña Enteira: falar en galego as 24h do día durante 7 días. Retamos a toda a comunidade educativa para contribuír ao futuro da nosa lingua.

A semana do 26 de febreiro ao 1 de marzo imos celebrar no IES de Chapela as Xornadas "Miradas diversas na infancia", organizadas polo Departamento de Servizos. Nestas xornadas levaranse a cabo distintas actividades para coñecer de primeira man experiencias de intervención e acompañamento a menores con diversidade funcional, así como para sensibilizar acerca da realidade que viven estes menores e as súas familias. Para iso contaremos con profesionais de recoñecido prestixio neste eido, procedentes de distintas entidades e centros da contorna.

Tedes o tríptico informativo aquí.

O 23 de febreiro, Día de Rosalía de Castro, visitounos pola mañá a mesmísima Rosalía. Comprobamos que se atopa máis viva ca nunca.

Preme aquí para ver o vídeo.

O martes 20 de febreiro o alumnado de 4º de ESO e 1º e 2º de Bacharelato que cursa as materias de Latín, Grego e Filosofía acudiu, xunto coas profesoras de Filosofía e de Latín, ao Teatro Municipal de Tui para asistir a unha función teatral: Antígona de Sófocles, obra que forma parte do Festival de Teatro Grecolatino, organizado pola SEEC-Galicia, e representada polo Grupo Corzos Reunidos, casa de Castilla la Mancha (A Coruña).

En Antígona desenvólvese un gran combate de ideas entre as leis divinas, santas e inviolables, e as leis civís, útiles e oportunas; dunha parte, unha moza, Antígona, doutra, un rei poderoso e autoritario, Creonte. Moitas son as interpretacións ás que deu pé unha obra tan maxistral e complexa. O que si queda de manifesto é que a oposición entre ambos se considera como a pugna entre dúas esferas de poder igualmente válidas, a divina e a humana, a da familia e a do Estado, a do mundo dos vivos e o dos mortos e, por último, o enfrontamento entre unha muller e o poder dos homes.

Esta actividade permitiu ao noso alumnado gozar dun espectáculo que mantén os ingredientes do teatro clásico, teatro do que somos herdeiros, e entrar en contacto cos numerosos mozos e mozas de diversos centros educativos que alí acudiron e que son, como así manifestaron os organizadores, os que fan posible a presenza e continuidade na escena do mundo clásico.

Este xoves 15 de febreiro pola tarde os grupos de APSD e Integración social modular tivemos a sorte de conversar cunha representación de profesionais e participantes de Alento (Asociación de dano cerebral adquirido, ubicada en Navia).

Achegáronse até o IES para amosarnos como é o día a día tanto no seu centro de día terapéutico como no servizo residencial. 

Atopámonos con persoas plenamente conscientes de que é o que se precisa para mellorar a calidade de vida e a autodeterminación das persoas e como é posible poñelo en práctica grazas a moitos perfís profesionais (fisioterapia, logopedia, terapia ocupacional, psicoloxía, neuropsicoloxía, traballo social, TCAE…) que desafían as barreiras que nun momento ou outro da vida, en realidade, todas as persoas podemos atopar no camiño. 

Descubrimos que teñen a posibilidade de mergullarse en obradoiros artísticos, sesións de psicomotricidade, natación, escalada, experiencias en contacto coa contorna, obradoiros nos que coidar da natureza ou saídas máis alá da contorna de Vigo: a quen non lle apetece ir até Tui, por exemplo? Collen as furgos e… adiante!

E todo, co bo humor das persoas que saben gozar do momento e ir resolvendo dificultades cando xorden; se non houbese a posibilidade de previlas, pois aí teñen, ao carón da man, os apoios precisos para seguir a avanzar no camiño, xuntas.

Teñen tamén a mirada posta no futuro, con ideas que xa están a xermolar, como unha andaina a finais de abril da que vos contaremos máis adiante cal vai ser o percorrido. Imos?

Desde aquí queremos deixar constancia do que nos transmitistes! Vida! 

Grazas por achegarvos ata o IES e ampliar a nosa mirada!  

Hoxe, venres 16 de febreiro, a climatoloxía permitiunos pechar a festa de Entroido por todo o alto cos tradicionais desfiles e coreografías do noso alumnado na pista deportiva. Moitas grazas a todas as persoas participantes no baile de disfraces pola vosa enerxía e atrevemento!

Pola súa banda, as nosas compañeiras e compañeiros de nocturno gozaron tamén da súa particular festa de Entroido a semana pasada co seu enterro de modular, en recordo dos ciclos presenciais perdidos, que agardamos que poidan resucitar.

Podedes picar na imaxe para acceder á galería de fotos.

O alumnado de 1º bacharelato: Gabriela Domínguez González e Andrés Rodríguez Cano xa están en Francia. Acompañados pola profesora Ángeles Alemparte, que foi a coordinadora do programa EDUMOB da Consellería de Educación, e xunto con outros compañeiros e compañeiras doutros centros, estes alumnos e alumnas participan no programa de intercambio nun instituto francés e asistirán durante un mes ao Lycée Jean Lurçat Bruyères de La Lorraine (Région Grand Est).

No mes de abril teremos aos alumnos/as franceses no noso centro, o que será seguro unha experiencia moi enriquecedora para todos e todas. Esperamos que Gabriela e Andrés o pasen moi ben e teñan moitas cousas que contar á volta! 

As alumnas do 2º curso do CS de Documentación e Administración Sanitarias Sara Novo e Nerea Bueno, xunto coa profesora María del Mar Prieto, asistiron o pasado 18 de xaneiro á sesión formativa en técnicas de Design Thinking, que se desenvolveu no CIFP Manuel Antonio, como membros do equipo de InnovaTechFP. Deste equipo, que representa ao IES de Chapela no devandito programa, forman tamén parte os alumnos Adrián Blanco e Gonzalo Fernández, do mesmo ciclo formativo.

Información sobre probas de acceso a ciclos formativos de grao medio: aquí.

Información sobre probas de acceso a ciclos formativos de grao superior: aquí.