Co gallo da conmemoración do 150 aniversario da chegada do Nautilus á Enseada de San Simón, as Bibliotecas de Redondela e a Radio Municipal, organizan unha lectura radiofónica da obra de Jules Verne, Vinte mil légoas baixo dos mares, á que convidan a participar a toda a cidadanía.
O alumnado de 2º de Educación Infantil do IES Chapela, acompañado da profesora Olga Rey, participou do proxecto nunha xornada moi proveitosa. Aí os vedes, orgullosos e orgullosas logo de sumar o seu grao de area, as súas voces, á lectura conxunta da obra do escritor francés.
O pasado martes 23 de xaneiro o alumnado de 2º do CFGS Educación Infantil e de 1º e 2º do CFGM de Atención a Persoas en Situación de Dependencia visitaron varios centros na comarca de A Coruña. O curso de 2º do CFGS en Educación Infantil coñeceu a Escola Infantil "A Caracola" en A Coruña e a Escola Bosque "Amadahí" en Oleiros. Por outra banda o alumnado de APSD diúrno visitou a Central de Teleasistencia da Cruz Vermella en A Coruña e o Centro de Promoción da Autonomía Persoal CPAP do IMSERSO en Bergondo. Foi un día longo e moi proveitoso para o alumnado e as súas profes acompañantes Olga Rey e Eva Fernández!!!
O pasado 23 de xaneiro o alumnado de 1º do CS de Educación Infantil conviviu cos nenos e nenas de 3, 4 e 5 anos dos colexios de Educación Infantil e Primaria da contorna: CEIP Laredo, CEIP Alexandre Bóveda e CEIP Igrexa (Chapela) e CEIP Frián de Teis (Vigo). A experiencia resultou estupenda, contamos contos, fixemos teatro de sombras, cantamos cancións, participamos en actividades de psicomotricidade e xogamos a todo o que os rapaces e rapazas nos ensinaron!!! Grazas a todos os colexios pola súa acollida e por deixarnos vivir unha experiencia tan lúdica e educativa.
O profesor de música tradicional Luís Prego estivo o 20 de decembro co alumnado de Educación Infantil e APSD para cantarlles e contarlles todo o que a música pode facer en nós. O alumnado e profesorado que participou quere compartilo con toda a comunidade escolar do IES Chapela para desexarnos unhas boas festas e un vindeiro 2018 de esplendor. Aquí os deixamos bailando o Don Melitón, abrazándose e bicándose ao son da música e o baile. Recomendámosvolo para estes días.
O 25 e 26 de setembro, o alumnado de 2º Educación Infantil e 2º Atención a Persoas en Situación de Dependencia, comezamos o curso cunha saída a O Beque (Moaña). Con esta experiencia conseguimos un achegamento á natureza desfrutando duns beneficios que acotío pasan desapercibidos ou non valoramos na súa xusta medida. Enchemos a viaxe cunha bolsa de tesouros do medio ambiente, unha clase de ioga ao ar libre, un obradoiro de clown, outro de expresión corporal e un encontro na praia con persoas da Asociación Juan XXIII de Cangas. E por suposto, durmimos no albergue O Beque e experimentamos abraiantes sensacións como as picadas de mosquitos.
Desta saída en grupo as alumnas e os alumnos extraemos dúas ensinanzas:
Como dixo Antoine de Saint-Exupéry en O Principiño, “o esencial é invisible aos ollos”. Relacionándoo coa beleza interior das persoas, a importancia de ver co corazón, valorar as pequenas cousas, un xesto, unha mirada, un sorriso, un agradecemento. Mais tamén a beleza do noso contorno natural, o canto dun paxaro, a aspereza dun tronco, o contacto coas follas secas... Redescubrir o noso mundo con ollos de crianza. A segunda, chegar xuntos é o principio, manterse xuntos é o progreso, traballar xuntos é o éxito.
O noso agradecemento ao Concello de Moaña, á Asociación Juan XXIII e a todas as persoas colaboradoras, cuxa axuda e implicación foi imprescindible. Grazas, grazas, grazas.
O alumnado do Módulo de Expresión do CS de Educación Infantil Modular realizou esta actividade despois de ver a exposición Heroes animados, da Fundación ABANCA.
O pasado Mércores 17 de Febreiro de 2016 a "Asociación Abuso y Maltrato Infantil NO" (AMINO) ofereceu unha charla destinada ao alumnado do CS Educación Infantil (Modular), á que tamén asistiu, polo seu interese, o alumnado do CS Integración Social. Deste evento deixou constancia a propia Asociación na súa WEB. Na mesma se pode descargar o material que empregaron durante a charla
O pasado 16 de Decembro tivemos o privilexio de contar coa presencia de Elena Cruces e Julián Maguna, creadores do Documental "Imagine Elephants: unha experiencia sobre o xogo e a infancia". Desfrutamos da súa explicación acerca da orixe deste proxecto sobre o xogo libre e espontáneo, e o seu proceso de creación. Visionamos o documental (accesible vía web neste enlace) e finalmente intercambiamos unha serie de enriquecedoras reflexións sobre o papel das/os futuras/os educadoras/es infantís acerca do xogo e a infancia. Foi, sen lugar a dúbidas, unha divertida e fantástica tarde.... de moito proveito! Grazas pola vosa visita!
O alumnado do Ciclo Formativo de Educación Infantil do IES Chapela colabora coa iniciativa “Quimions Coruña, o reto” promovida por Patricia Campos facendo máis de corenta fundas para cubrir a medicación dos pacientes infantís de oncoloxía para o Hospital Materno Infantil de A Coruña.
O 4 de decembro a profesora Elena Fouz fixo entrega na cidade de A Coruña das fundas realizadas polo noso alumnado. As profesoras implicadas nesta iniciativa foron Begoña Martínez, María Avendaño, Elena Fouz, Eva Ferreira e Olga Rey.
Do 12 ao 14 de Xaneiro, estanse a celebrar as xornadas "Miradas Diversas desde a Infancia", dirixidas ao alumnado do Ciclos de diúrno e modular de Atencion a Persoas en Situación de Dependencia e Educación Infantil, nas que se tratan as características e necesidades das crianzas con diversidade funcional. Programa das Xornadas
