Skip to Content

Linguas clásicas

Viaxe a Grecia 2019

      O alumnado de Grego de Bacharelato do noso centro, acompañado pola súa profesora, visitamos a Hélade na semana de Antroido nunha viaxe organizada pola SEEC de Galicia. Percorremos a sorprendente Atenas e o multiforme Peloponeso: o canle de Corinto, Micenas rica en ouro, Epidauro como centro terapéutico de Asclepio, Mesenia a sempiterna rival de Esparta, Pilos e o pazo de Néstor, Olimpia orixe dos xogos, Delfos e o seu oráculo...

Seguinco as pegadas dos antigos gregos clarificamos o noso mundo. Nesta viaxe polo berce da nosa civilización guiounos a luz do noso magnífico Hermes particular chamado Lefteris.

Rapazas e rapaces interactuaron no "eclesiasterion" de Mesenia coa lectura de poemas de Tirteo e de Pondal nun magnífico día case de primavera. Aprendemos e desfrutamos moito. Quedamos deslumbrados na nosa peregrinación pola beleza. Queda aquí unha mínima mostra gráfica...

Álbum: Actividades -> Viaxe a Grecia 2019

Odisea 2019

Este ano o concurso Odisea online versou sobre a ciencia e a tecnoloxía na antiga Grecia e na antiga Roma. Participaron douscentos cincuenta e dous equipos en Galicia e o IES Elviña quedou como finalista para o desempate. O noso centro foi a sede do desempate comarcal e viñeron os equipos gañadores de Monelos, María Casares e Fogar de Santa Margarita (ademais do noso). A final foi dunha dificultade extrema pero os participantes loitaron con enerxía e entusiasmo ata o final. Parabéns a todos eles e, en especial, as nosas Ahinoa e Azahara de cuarto de ESO, que foron excelentes guerreiras.

A voltas co exército romano

Varios compoñentes da Asociación de Recreadores de Galicia viñeron ó IES Elviña para explicarnos detalladamente a formación e evolución da impoñente máquina de conquista que foi o exército romano. E non se limitaron a isto: trouxeron abundante material de recreación e ensináronlle ó alumnado diferentes tipos de estratexia como a testudo, a cunnea, a domus... Rapaces e rapazas participaron animosamente no proxecto. 

Dende aquí reiteramos o noso agradecemento a Óscar, Paio e Río... Audaces Fortuna iuvat!

 

 

Antígona ante os xuíces

O pasado mércores 18 de outubro tivo lugar a representación da versión de Andrés Pociña Antígona ante os xuíces no IES Elviña. A obra estaba baixo a dirección de Ricardo Martín, antigo catedrático de Latín do Instituto e responsable do exitoso grupo de teatro Sardiña. 

O alumnado púxose unanimemente a favor da heroína grega que actuaba conforme ás leis internas e contra as leis inxustas da cidade. Resultou ser unha experiencia enriquecedora desde moitos puntos de vista.

Gañadora do concurso fotográfico Prósopon 2018

Cynthia Rodríguez Sagra, alumna do IES Elviña na Secundaria e no Bacharelato, foi a gañadora do primeiro premio ex aequo do Concurso Fotográfico Prósopon 2018. A súa instantánea foi tomada no teatro Colón durante a representación de Electra na pasada edición do Festival de Teatro Grecolatino organizado pola SEEC.

Prósopon 2018

Parabéns, Cynthia. Desexámoste todos os éxitos que mereces na túa nova etapa da viaxe a Itaca...

Distribuir contido


by Dr. Radut