Skip to Content

Disfrutamos do monólogo de Helena de Troia

    O alumnado de Latín e Grego do IES asistiu ao monólogo dramático de Helena de Troia na obra do Teatro do Atlántico Helena, xuízo a unha lurpia no Forum Metropolitano. Disfrutamos escoitando unha poderosa voz feminina tradicionalmente silenciada na transmisión tradicional patriarcal e a recreación dos mitos e historias que perviven ao longo dos séculos.

Alumnado

 

Obradoiro de primeiros auxilios en 4º de ESO

     Os rapaces e rapazas de 4º de ESO participaron o mércores e o xoves días 8 e 9 de Novembro nun obradoiro de primeiros auxilios impartido no ximnasio por monitores especializados. Todo o alumnado practicou as principais técnicas de reanimación, como a masaxe cardíaca, a respiración boca a boca ou as manobras para tratar a un accidentado. Nas imaxes podemos ver algúns exemplos da actividade. Todos estaremos agora un pouco máis seguros no instituto en caso de urxencia...

Primeiros auxilios

Primeiros auxilios

Programa municipal "A Coruña no Mundo"

Bolsas de estudios Junior Year 2018/2019:

1º Bacharelato en EE.UU.

Junior Year 2018

     O Concello da Coruña abre o seu programa de bolsas de axuda dentro do Progama A Coruña no Mundo, destinado ao alumnado que cursa este ano 4º de ESO e desexe facer o seu 1º curso do Bacharelato (Grao 11 no sistema americano) nun instituto dos EE.UU.
     As bolsas de axuda ofrécense proporcionalmente dependendo da renda familiar e cubren un ano enteiro de estudios no estranxeiro. O prazo de solicitude comezará o día 27 de Novembro e rematará o día 11 de Decembro ás 14:00 horas. As bases completas da convocatoria e as características do programa poden consultarse e descargarse clicando AQUÍ.

Samaín no IES Elviña

Araña 

    O pasado día 31 de Outubro celebrouse no noso centro o Samaín con diversas actividades. Coa Biblioteca e os andares do instituto engalanados para a ocasión, os membros do Club de Lectura Elvilendo, fixeron unha terrorífica lectura de varios relatos axeitadamente sinistros. 

Samaín-01      Samaín-02

  Disque houbo berros arrepiantes e son de cadeas na Biblioteca ao longo de todo o día: seguramente espíritos de antigos exalumnos apesadumbrados aínda pola posibilidade de exames parciais... Polo visto, tamén durante a noite, algúns veciños escoitaron son de ósos e risos cadavéricos. Abofé que os defuntos tiveron abondo que gozar coa lectura dos nosos rapaces!
    O noso compañeiro Carlos Silva editou o vídeo da espantosa xornada e o temos dispoñible na súa conta de youtube. Velaí o tedes... Para que pasedes uns minutos de horror! Estades avisados... Vós veredes!

Calavera   Calavera   Calavera   Calavera   Calavera 

     Mentres isto sucedía no instituto, os alumnos de 4º de ESO asistían no Teatro Colón da nosa cidade á tradicional representación do Don Juan Tenorio de José Zorrilla, en versión do grupo de teatro local afeizoado Noite meiga. Estes tamén pasaron un bo rato coas andanzas do famoso conquistador romántico.

araña

Don Juan

Saída dos alumnos da English Week

     Os alumnos de 1º de ESO do IES Elviña saíron este domingo desde o instituto para iniciar as actividades da English Week. Pasarán unha semana no Centro Os Peares para practicar a lingua inglesa nun campamento de actividades de inmersión lingüística. Con seguridade pasarán unha estupenda semana. Boa viaxe a todos eles!


Saída da English Week

Celebración do día das linguas

     O pasado día 3 de Outubro celebreouse o día mundial das linguas. No noso instituto non quixemos deixar pasar a oportunidade de facer un acto para conmemoralo. O Departamento de dinamización lingüística en colaboración cos departamentos de linguas do centro escolleu a alumnos e alumnas de varios cursos da ESO para ler polas distintas aulas poemas escollidos en diferentes linguas. A nosa compañeira do Departamento de lingua galega Patricia Varela preparou un vídeo con imaxes da actividade que podemos ver na súa conta de youtube. Velaquí o vídeo.

O IES Elviña no Encontro internacional de pulso e púa

Encontro Internacional de Pulso e Púa Concerto do Dúo "Nuestra herencia" e Jesús Alejandro Sánchez (Colombia)

    O pasado 5 de Outubro tivo lugar no salón de actos do noso centro un concerto didáctico a cargo do dúo de guitarras "Nuestra herencia" e o solista de requinto Jesús Alejandro Sánchez. Este trío de músicos, procedente de Colombia, interpretaron ante os alumnos de 2º e 3º de ESO un conxunto de pezas que exemplican a riqueza e variedade dos ritmos e das músicas colombianas. Esta actividade insértase no Encontro Internacional de Música de Pulso e Púa organizado pola asociación Pórtico das artes que se está a celebrar na cidade da Coruña durante o mes de Outubro.  O Encontro está dirixido por Rosa González, quen actuou tamén como presentadora da actuación no IES Elviña.

Dúo "Nuestra herencia"

    O dúo Nuestra Herencia é unha agrupación de música colombiana fundada no 2000 por iniciativa dos irmáns Juan Pablo e Felipe Andrés Sánchez Pena. Este grupo está especializado nos aires tradicionais de Colombia, e conxuga a tradición coas linguaxes musicais modernas. Foron galardoados coas máis altas distincións en concursos, festivais nacionais e internacionais, coma o Premio Nacional de Música para Producións Musicais Discográficas do Ministerio de Cultura de Colombia, e realizaron recitais e concertos en importantes escenarios de México, España, Francia e Portugal.

Jesús Alejandro Sánchez Pena

      Aos seus 14 anos de idade é un virtuoso do requinto, instrumento propio da cultura andina colombiana. Desde moi neno explorou a música tradicional colombiana coa dirección dos seus irmáns Juan Pablo e Felipe Andrés Sánchez Pena. Na súa curta pero meritoria carreira conseguiu importantes galardóns nacionais e internacionais, como a obtención do Premio Iberoamericano “Novos Talentos” en Braga, Portugal, no ano 2016 e o máximo galardón do Concurso Nacional do Requinto Tuta Boyacá 2017.

     O noso compañeiro Carlos Silva editou un vídeo da actuación, que compartimos desde a súa canle de Youtube.

Agradecemento aos bombeiros da Coruña

   Persoal do corpo de bombeiros da cidade eliminou un niño de vespas asentado na fachada do edificio do IES Elviña, a uns oito ou nove metros de altura. Tratábase de vespas autóctonas, non invasoras, pero máis agresivas cas velutinas, e que supoñían un importante risco para alumnos e profesores do centro, para os nenos do contiguo CEIP Alborada e para calquera veciño do barrio.