Skip to Content

Actividades do 40 aniversario

Actividades conmemorativas para a celebración do 40 aniversario da fundación do IES Elviña

DALÍ CIENTÍFICO NO IES ELVIÑA

Dali-03
Dali-01

     Arte e física en amorosa compaña? Quen dixo tal? Non vai iso contra a natural antipatía entre ciencias e letras? Non, non, non misturemos... Asíntotas e Leonardo da Vinci? Cálculo diferencial e Michelangelo? Vaites! Quita de aí, rapás! Pois si!
    E non é tan raro: nisto da interdisciplinaridade sabían moito máis ca nós os antigos gregos e romanos (mesmo os homes do medioevo), que, con máxica intuición, agochaban o misterio esencial das belas artes baixo a chave da segreda linguaxe dos números.
     Remedando, pois, aos vellos mestres das artes da beleza, varias profesoras do IES Castro de UZ de As Pontes María Fernández Bouza, Rocío Chao Fernández, Rosa Ana Fernández Rodríguez, María José Fernández Yánez e María José Vergara Leonardo preparon hai xa uns anos unha exposición na que se estuda con esmerado detalle a relación entre a ciencia matemática e a pintura de Salvador Dalí. A exposición obtivo no ano 2004 unha Mención de honor no apartado de "Traballos de divulgación científica" dentro do Concurso Física+Matemáticas en acción do Parque de las Ciencias de Granada.
     Grazas á xenerosa e atenta intercesión da nosa benquerida compañeira do Departamento de Física e Química Isabel Muinelo, a exposición, depositada no IES das Pontes, chegou ao IES Elviña cedida durante dúas semanas para se sumar á celebración do noso aniversario, convertíndonos no primeiro centro da cidade da Coruña en recibila.  A aproveitala!

Salvador Dalí: as mates do surrealismo

Dali-retrato    O geni de Cadaquès é un dos máis importantes pintores do século XX. Vencellado aos creadores da Xeración do 27, distinguiuse dentro do grupo surrealista de París onde coincidiu con nomes míticos da arte de avangarda coma André Breton, Louis Aragon, Paul Éluard, Picasso, Picabia, Max Ernst, Yves Tanguy, Hans Arp ou Réné Magritte.
     Con Luis Buñuel firmou dúas obras mestras da historia do cinema, cuxas propostas imaxinarias teñen aínda suficente forza para impresionar pola súa xenialidade. Antes de se converter en Avida dollars (Cugat dixit), Dalí desenvolveu toda unha teoría de composición pictórica que el mesmo baptizou co estrambótico nome de método paranoico-crítico: dar renda solta, sen ataduras da moral nin da consciencia, á imaxinación creativa suxerindo asociacións insólitas entre os obxectos, as ideas, como reflexo das obsesións persoais do artista. Con este método, Dalí creou todo un universo pictórico orixinal e propio, aínda vivo en representación simbólica da liberdade que propón a arte das vangardas.

Surrealistas de ParísMano-1Mano-2

  Son precisamente estas obras as que as autoras da exposición utilizan para exemplificar a subtil relación entre a pintura e a proporción matemática, amosando a maneira irónica na que a lóxica dos números se agocha tras da irracionalidade do imaxinario do pintor.

Cadro1Cadro3

        Pódese atopar unha detallada explicación dos paneis da exposición clicando AQUÍ.

ACTOS DO 40 ANIVERSARIO: LUIS VEIRA NO IES

Luis Veira: tamén mestre fóra da cociña

    Dentro doVeira-03s actos que o IES Plurilingüe Elviña está a organizar para a celebración do seu 40 aniversario, este luns 19 de Marzo tocoulle o turno a un artista da gastronomía, e máis tamén home do barrio, o cociñeiro Luis Veira, chef do restaurante Árbore da Veira da rúa de San Andrés.

      Luis Veira é un deses cociñeiros dos que se pode dicir que teñen algo máis que sona. O seu nome é un dos poucos que se escoitan cando se oe falar da alta cociña galega. Certamente, ten unha Estrela Michelín e traballa ben arreo para obter a segunda. Disque a xente de éxito vive alí enriba, encumiada na divinidade da súa gloria. Se cadra é así con algúns persoeiros, pero, desde logo, non é o caso de Luis Veira, que deu no noso instituto unha soberana lección de cercanía, de familiaridade e de entusiasmo polo seu traballo. Falou coa rapazada de ESO e Bacharelato como quen fala cuns amigos aos que hai tempo que non ve, e aos que pode dar consello afectuoso. Na súa charla, amena, directa, persoal, falou do seu restaurante e dos seus pratos, fixo reconto da súa vida, da súa época como estudante (“yo fui muy mal estudiante, pero muy malo”) e do seu esforzo diario para chegar ao éxito actual. Pode que, ás veces, as cousas non saian como un quixera, pero Luis deixou claro que ninguén chega lonxe se non se esforza e arrisca.

     En fin, a súa foi, ademais dunha estupenda charla, toda unha lección de filosofía de vida: non deixarse levar polo medo ao fracaso, a confianza no noso traballo ben feito son o segredo do éxito.

Veira-02Veira-04Veira-06
Veira-01Veira-07Veira-08

      Despois da súa charla, o noso convidado baixou ao xardín botánico do noso centro e apadriñou ao grupo de 1º de ESO C na prantación dunha árbore froiteira: un paraguaio (Prunus persica). A placa conmemorativa ficará coma testemuño da súa visita.

Veira-10Veira-08

O xornal La Voz de Galicia publicou unha breve reseña da visita na súa edición do día 20 e na súa páxina web.

O IES ELVIÑA CUMPLE OS 40

40 anos ensinando: o IES Plurilingüe Elviña no curso do seu 40 aniversario

Logo-40 anos

    O noso insti xa é cuarentón! Quen o ía dicir? Durante este curso 2017/18 o IES Plurilingüe Elviña celebra o seu 40 aniversario. Para moitas e moi diferentes vivenzas hai tempo en 40 anos... pero non é cousa de andarse cos achaques do tempo: se alguén pensa que o insti vai pra vello está moi errado, ten pulo para rato... Baste saber que toda a xente que está nel seguirá a traballar co mesmo compromiso ao servizo da docencia para o alumnado do barrio de Elviña.

     Pero, ben! Chegados aos 40 anos, ten o seu aquel facer reconto de logros empezando polo principal: 40 promocións de estudantes que agora son pais, nais, profesionais do presente coma o serán no futuro os nosos alumnos de hoxe. Foron (e son) moitas as persoas que contribuíron neste camiño do IES Elviña: os traballadores e traballadoras que o manteñen aberto e o dispoñen a diario para o labor docente, o persoal administrativo, o abondoso profesorado que ten exercido o seu labor en Elviña, e as autoridades da administración autonómica que velan porque todo siga a funcionar coma o primeiro día e apoian coa súa presenza e o seu alento o traballo diario no centro ao longo dos anos. Co esforzo diario e o compromiso de todos eles fíxose posible a continuidade no tempo do IES Elviña, convertíndoo, como debe ser, nunha seña de identidade para o barrio de Elviña e para as súas xentes, ás que o instituto se debe.

     A todos os que, dunha maneira ou doutra, tocounos formar parte del, énchenos de orgullo dicir que traballamos no instituto de Elviña. Que non se diga que nos faltaron forzas para lograr que chegue aos oitenta con menos xuventude da que agora...

Feliz aniversario, IES Elviña, e que cumplas moitos máis.

VISITA DE XULIO FERREIRO

Visita do alcalde da Coruña: Xulio Ferreiro no IES Elviña

Alcalde6
Placa

     Como parte da celebración dos 40, o pasado luns 26 de febreiro o alcalde da Coruña, Xulio Ferreiro Baamonde ofreceuse amablemente a participar na celebración do noso aniversario abrindo un oco na súa axenda para estar connosco unhas horas, compartindo xornada lectiva cos rapaces dos cursos da ESO. 

   En primeiro lugar, participou no plantado dun exemplar de acivro femia (ilex aquifolium) apadriñando ao grupo de 1º ESO "A" nesta actividade que, tradicional no noso centro, organiza o Departamento de Bioloxía. Xulio Ferreiro respostou con humor e afecto ás preguntas que lle formularon nenos e nenas, e posou con eles para a prensa, que inmortalizou a escena. Na placa conmemorativa que acompaña á árbore, quedará constancia da súa presenza neste día.

Acivro

Alcalde4Alcalde5
Alcalde3Plantación da árbore

 

    Despois deste momento de amable lecer, o alcalde deu unha charla para o alumnado de 3º e 4º de ESO, reunido para a ocasión no Salón de actos do instituto. Flanqueado por Isabel García Vila, inspectora de educación do noso centro, en representación da administración autonómica, e polo director do instituto, o alcalde Xulio Ferreiro falou do duro traballo que supón a presidencia do consistorio e das ideas e deseños que, desde a alcaldía, poñen de manifesto o seu proxecto de futuro para a Coruña. Non faltaron na súa charla, informal, amena, pero tamén seria e chea de reflexións comprometidas coas necesidades da cidadanía, especialmente dos máis desfavorecidos, palabras afectuosas para o aniversario do instituto, mesturadas con lembranzas persoais sobre os seus vínculos con exalumnos do centro.

     O alumnado presente no acto non perdeu a oportunidade de plantexarlle peticións e preguntas, ou de fotografarse con el. Non é raro. Non se presenta todos os días a oportunidade de falar co principal representante electo da cidade. A súa presenza, cercana e familiar para rapaces e rapazas, terá sido a bo seguro un gratísimo estímulo para todos eles.

Moitas grazas, alcalde.

Distribuir contido


by Dr. Radut