Skip to Content

Escolares

SÉCHU SENDE NO IES ELVIÑA

Made in GalizaSéchu Sende contra os prexuízos lingüísticos

Invitado polo profesorado do Departamento de lingua galega do IES Plurilingüe Elviña, dentro da súa programación de actividades, acudiu ao noso salón de actos o recoñecido autor de Made in Galiza, Séchu Sende, para dar unha charla de dúas horas ao alumnado de 4º ESO, 1º e 2º de Bacharelato. Coa súa ben coñecida capacidade de fabular e as súas non tan coñecidas, pero igualmente admirables facultades mediúmnicas e telequinéticas -adeprendidas en parte, segundo a súa propia confesión durante a charla, nun cursiño por terras do Oriente marabilloso- sorprendeu e engaiolou aos rapaces. Tentouno tamén coa hipnose colectiva e, aínda que ninguén acabou catatónico (por sorte para todos!), é de esperar que as súas palabras e as súas historias espertaran en máis de un e de unha o desexo de falar sen prexuízos lingüísticos.

124
568

 

SABORES DE OUTONO

IV XORNADA DE COMIDAS DE OUTONO DO IES ELVIÑA

Como ven sendo tradición (e as tradicións cómpre respetalas), chegado o outono, veñen tamén os seus sabores a encher os espazos do IES Elviña, e tamén os seus bandullos. O Departamento de dinamización, coa axuda inestimable de todos os membros do instituto (alumnado, familias, docentes e non docentes), organizou un ano máis a súa festa da outonía. Outros festexan o Nadal, a canícula, os campionatos mundiais de fútbol e outras cousas máis raras aínda: nós festexamos o outono, a estación dourada do ano (a cor das follas caedizas, da castaña que reventa no tépedo ourizo, do saboroso cogumelo, do alongado solpor de outubro e do mel da laboriosa abella, entre outras líricas orixes).

E como se festexa un bo outono?, perguntarán os apacibles lectores.
Pois como vai ser! Somos galegos, non si? Pois comendo, que é xerundio.

01020304
O soto do IES Elviña festexando o seu outono
06070809
A xente do IES Elviña colaborando (a mellor parte foi dos que xantaron as viandas...)

     Como cada ano, cada participante deu o mellor de si mesmo para traer o mellor exemplo das súas habilidades na cuciña, tentando non repetir, porque a graza está non só no xantar, senon na sorpresa do que se lle ocorreu este ano aos "chefs" do turno. E así, xunto coas inevitables castañas cocidas e asadas (e que ricas que están!) ou coa frescaxe da granada, correron por aí tartas de chocolate (e de chocolates), de améndoas e de marmelada, galletas de manteiga, de nata e de bombón (dignas do paladar de Willy Wonka), biscoitos de froitas e de tona (entonado ficou quen os degustaba), pasteliños de doce de leite ou de sweet cream (en poucas ocasións foi o centro máis plurilingüe...), pastas recheas de noz coa aromática dozura do anís e, por se non chegase xa con todo isto, o caldo da venerable Galiza e as fabes das Asturias apareceron tamén para quencer os corpos e alegrar as ánimas, que boa falta lles facía.

010610
Coma sempre fantástico o traballo dos voluntarios e das voluntarias

Poesía con sabor de outono no primeiro tempo lecer

     Coma parte literaria da xornada, para abrir boca, no andar da pranta baixa do centro durante o primeiro recreo Fernando Álvarez ofreceuse a ler para todos os presentes o poema de Rosalía de Castro "Miña casiña, meu lar" (Libro IV de Follas Novas, "Da terra"), no que, tras da violenta requisitoria contra a mesquindade humana para o pobre e o vencido, agóchase tamén un canto emocionado á honradez do fogar campesiño, simbolizado no sinxelo alimento que é o sal da vida. Que a ninguén lle falte!

02mediana

Arrimei ò pote ô lume
con augua para quentar;
mentras escarabellaba
na cinza, vin relumbrar
un ichavo d'a fertuna...
¡Miña Virxe d'o Pilar!
Correndiño, correndiño
o fun en sal a empregar;
máis contenta qu'unhas páscoas
volvín a port'a pechar
e na miña horta pequena
unhas berzas fun catar.
Con un pouco d'unto vello
qu'o ben soupen aforrar,

    e c'a fariniña munda,
    xa tiña para cear.
    Fixen un caldo de groria
    que me soupo que la mar;
    fixen un bolo d'o pote
    qu'era cousa de envidiar;
    despois qu'o tiven comido,
    volvín de novo a rezar;
    e despois qu'houben rezado
    puxen a roupa a secar,
    que non tiña fío enxoito
    d'haber tanto em mollar;
    n'antramentras me secaba
    púxenme logo a cantar...

Por último, o vídeo da xornada, editado por Carlochos:

 

SAMAÍN 2019

E PASOU O SAMAÍN POR ELVIÑA...

cabaza

A mañá menceu chuventa e escura. Aínda sen a mortal friaxe dos días que virían despois, semellaba que a luz non tiña nen gañas nen forza para atravesar os suxos vidros da fiestra. Os supervivintes do exame de Bioloxía fuxían das aulas aterridos polo berros que chegaban do soto. Unha ducia de espíritos apareceron entón no primeiro andar, amarelos e  lentos, vagarosos como as brétemas que chegan coas maruxías de novembro, e enfilaron, con decisión, ata a Biblioteca arrastrando as cadeas, deixando polo camiño algún anaco de carne, un par de ósos cariados (que atoparon as señoras da limpeza detrás da porta de audiovisuais) e catro pozas de sangue fresco fronte a sala de profesores...
Ben sabían os espíritos o que lles agardaba na Biblioteca do IES Elviña: as lecturas máis horrendas, os laídos máis calafriantes, as torturas máis crueis (ollos arrincados, meigas fóra, demos vermellos de lingua babexante, coitelos afiados, pústulas e apostemas...)
Pois nada, que o alumnado do clube de lectura, como cada ano por estas datas, adicoulles aos atentos espíritos desta Santa Compaña elviñense, a lectura duns poucos contos de medo, banquete delicioso para as ánimas atormentadas polos anxos infernais.

Velaquí o espantosa que foi a lectura do conto
das DÚAS ASASINAS...

 

CHARLA AESLEME

O pasado 29 de outubro o renovado Departamento de Orientación do instituto dirixido pola nosa benquerida Ana María Rivera preparou para o alumnado de 4º de ESO e 1º de Bacharelato unha charla de concienciación sobre os problemas das persoas con lesións medulares. Acudiu para a ocasión ao noso humilde salón de actos un representante de AESLEME (a Asociación para el Estudio de la Lesión Medular Espinal) quen alertou aos rapaces coa súa presenza e coas súas palabras das dramáticas consecuencias que pode ter a condución descoidada. Esperemos que a charla sirva para que descenda no futuro o elevado número de accidentados con lesións medulares nas nosas estradas costeiras, ben coñecidas por esta razón...

AESLEME-03miniAESLEM-01mini

LEMBRANZA DO FIN DE CURSO ANTERIOR

Aínda que con retraso (disque xamais é tarde, se é boa a intención), o noso director de cinema Carlos estivo a traballar todo o verán para compor os vídeos das actuacións do festival de fin de curso, coa moi afectuosa e loábel intención de deixar lembranza do talento dos participantes, que bo esforzo fixeron na xornada final do curso pasado. Non era para menos: celebraban o final das angustias e o principio das vacacións... Espertemos, pois, hoxe a morriña dos tempos idos con esta entrada pretérita da nosa web.

Ah! Memento! Na realización de todos os vídeos, se a dirección e realización foi cousa de Carlochos, o deseño de produción tocoulle a Gemma López e o manexo da cámara correspondeulle ao talentoso e nunca ben ponderado Fernando Álvarez. Vaia tamén por eles!

Vídeo recordo do FestivalUriel coa tubaXan ao celloAroa ao piano
Mauro tocandoProtagonistas: 2º ESO AProtagonistas: 2º ESO BAgora vai 3º ESO A
3º B facendo das súasOs incribles de 4º ESO AMáis de 4º, por guaposO baile para rematar

Houbo máis, pero non mellor. Haberá que esperar polo deste curso. E chegará...

Distribuir contido


by Dr. Radut