Tecnoloxía

Podemos estar ben orgullosos do alumnado de 1º de BAC que cursa as materias de Tecnoloxía Industrial I e TIC I e que participou na III competición de robots da Universidade de Vigo o pasado venres 28 de abril.

O pasado venres 17 de marzo o alumnado de 2º de Bacharelato que cursa Tecnoloxía Industrial II realizou unha visita guiada ás instalacións da empresa de telecomunicacións TELEVÉS, situada en Santiago.

O pasado martes 24 de maio o alumnado que cursa Tecnoloxía Industrial I e II participou na actividade "Obradoiro de música electrónica con obxectos cotiáns", organizada polo Departamento de Tecnoloxía e financiada pola ANPA do centro. Dito Obradoiro foi impartido polo enxeñeiro electrónico e músico Mateo Mena Calavia.
O obxectivo da actividade foi a construción de diversos dispositivos sonoros a través de cadanseu proxecto concreto. Para isto empregáronse materiais cotiáns xa que o obxectivo primordial foi o de estimular a creatividade, a concienciación ambiental e a aprendizaxe cooperativa, poñendo en xogo coñecementos concretos de tecnoloxía (electrónica, electricidade) e xerais de física, química e música.

Velaquí unha reportaxe gráfica de dito obradoiro:

O vindeiro martes 29 de marzo o Departamento de Tecnoloxía organiza unha saída didáctica co alumnado de 2º de ESO. Pola mañá visitarase o Parque eólico didáctico-experimental de Sotavento (Xermade - Lugo) e pola tarde realizarán unha xincana guiada polo MUNCYT (Museo Nacional de Ciencia e Tecnoloxía - A Coruña).

O vindeiro mércores 29 de abril, o alumnado de Tecnoloxía de 3º de ESO realizará unha visita de estudos ao centro de educación ambiental das Corcerizas, situado no corazón da Serra de San Mamede (Vilar de Barrio - Ourense), o cal é pioneiro en Galicia e referente a nivel estatal no uso das enerxías renovables, o tratamento alternativo dos residuos e a bioconstrución.

Un novo curso, e xa van tres seguidos, un equipo de alumnos e alumnas do MGB, coordinados polo profesorado do Departamento de Tecnoloxía, gaña no concurso escolar Consumópolis, esta vez na categoría para 3º e 4º da ESO, cun 2º premio a nivel galego. Este concurso está organizado polo Instituto Nacional de Consumo e a Consellería de Economía e Industria, tendo por obxectivo que o alumnado reflexione de forma consciente, crítica e solidaria sobre distintos aspectos do consumo responsable, contribuíndo ao desenvolvemento integral de actuais e futuros consumidores. A actual novena edición estivo adicada ao uso responsable das TIC e titulada "Consumir entre pantallas".

O equipo gañador está formado por:

• Rubén Bustelo Arca (4º ESO B)
• Carlota Pereiras Matalobos (4º ESO C)
• Uxía Prado Cerqueiro (4º ESO B)
• Adrián Rey Quintás (4º ESO B)
• Andy Torres Blanco (4º ESO B)

Na imaxe adxunta da dereita podedes ver o cartel da proba final co que gañaron este 2º premio.

Noraboa aos gañadores!

O Conselleiro de Cultura e maila Presidenta do Instituto Galego de Consumo felicitaron á comunidade educativa polo premio. O traballo representará á Comunidade Autónoma na fase estatal. Prema aquí se quere ver a fecilitación completa.

El Faro de Vigo deu conta da noticia nas súas páxinas.

Esta semana o Departamento de Tecnoloxía do centro organiza as seguintes saídas didácticas por cursos:

• Martes 29 de abril: o alumnado de 2º de ESO visitará pola mañá o Parque eólico didáctico-experimental de Sotavento (Xermade - Lugo) e pola tarde realizará un roteiro de sendeirismo polas Fragas do Eume (actividade organizada en colaboración co Departamento de Ciencias Naturais).
• Mércores 30 de abril: o alumnado de 4º de ESO e 1º de BAC, que cursan respectivamente as asignaturas de Tecnoloxía e Tecnoloxía Industrial, visitarán ao longo da mañá ás centrais térmica e de ciclo combinado das Pontes (As Pontes de García Rodríguez - A Coruña) e pola tarde realizarán unha xincana guiada polo MUNCYT (Museo Nacional de Ciencia e Tecnoloxía - A Coruña)

O DOG do mércores 22 de maio fai publica a relación de centros premiados na fase autonómica do Concurso Consumópolis 8: "Adéstrate ben para o consumo responsable", no que o traballo "En el deporte y en la vida, consumo responsable" do equipo de traballo los Batman do noso centro, coordinado pola profesora do Departamento de Tecnoloxía: Obdulia García Nimo, e composto polos alumn@s: Carlota Pereiras, Uxía Prado, Adrián Rey, Andy Torres e Miguel Valiño; acadou o 1º premio na categoría de 3º e 4º de ensino secundario.

O vindeiro martes 5 de marzo, nas dúas sesións da tarde, o alumnado de 3º de ESO asistirá a usos múltiples a unha charla sobre seguridade en Internet, impartida por un profesional informático do Colexio Profesional de Enxeñería Informática de Galicia, dentro do programa NAVEGA CON RUMBO.

O alumnado de 3º e 4º de PDC e de 4º de ESO da asignatura de Tecnoloxía organizaron e montaron os paneis que estas semanas podedes observar no andar da Biblioteca coa exposición "Medindo o universo: historia das medidas". As láminas desta exposición foron impresas á súa vez da exposición homónima do LOMG (Laboratorio Oficial de Metroloxía de Galicia). Esperamos sexa do voso interese e aprendades moito con ela.

Se queredes consultar online a exposición facede clic aquí.

O vindeiro martes 6 de novembro, con motivo do Día da Ciencia e a Tecnoloxía en Galego, o alumnado de 3º da ESO participará, xuntos con outros 99 centros de Galicia, nunha videoconferencia internacional de título "Facendo Física de Partículas polo mundo". Nela 5 científicos galegos espallados por Xenebra, Santiago, Londres e Lisboa contarán a súa experiencia científica e lingüística e as vantaxes que lles supuxo saber falar galego na súa profesión. A videoconferencia terá lugar en usos múltiples de 12:30 a 13:30.

Os próximos días 11 e 12, venres e sábado, o alumnado de 3º e 4º ESO da materia de Tecnoloxía realizarán unha visita a Allariz dentro do Proxecto Terra ( organizado polo  Colexio Oficial de Arquitectos de Galicia). Actividade organizada polo departamento de Tecnoloxía.

O equipo “Los Batmans”, formado por Uxía Prado, Adrián Rey, Carlota Pereiras, Miguel Valiño e Ángel Sanmartín, de 2º de ESO, acadou o 1º Premio, na categoria do primeiro ciclo de ESO, fase autonómica de Consumópolis, concurso sobre consumo responsable e calidade de vida, co traballo: “Conserva el ticket, conserva tus derechos”.
Ademais, como clasificados no primeiro posto da súa categoría, representarán a Galicia na fase estatal do concurso.

Parabéns!!

osa@iesgarciabarros.org. Este será o enderezo electrónico de OSA, Obradoiro de Sostibilidade Ambiental do MGB, dende o que se pretende impulsar iniciativas para facer o MGB un centro máis sostible. Todas as accións estarán vinculas a Axenda 21 Escolar de Galicia, rede de centros coordinada pola Consellería de Medio Ambiente á que pertence o noso instituto dende hai uns meses.

La Voz de Galicia informa sobre a integración do noso centro na rede de centros comprometidos co medio ambiente.