IES do Milladoiro

O martes 12 de marzo o noso centro recibiu a visita de 54 alumnos e alumnas acompañados de catro profesores do Lycée Thépot de Quimper, na Bretaña francesa.

 Desde principio de curso a alumnado de Francés mantivo unha correspondencia con este centro e, grazas a este encontro pedagóxico, tiveron a oportunidade de coñecerse persoalmente.

Ao longo de toda a xornada leváronse a cabo varias actividades. A primeiras horas da mañá foron recibidos polo Director do IES do Milladoiro, visitaron as principais instalacións do centro, e asistiron a unha clase no taller de Tecnoloxía.

 Na segunda parte da mañá coñeceron o alumnado de francés de 1º de Bacharelato, de 4º de ESO e algún grupo de 2º de ESO, leváronse a cabo as presentacións do sistema educativo español e francés, así como unha demostración de robótica.

 Pola tarde, a pesar da choiva, levouse a cabo un xogo de pistas co alumnado de 1º de Bacharelato a algún grupo de 3º de ESO, o que lles permitíu estar en grupos mixtos e practicar o idioma.