05/02/2015

Despois de pasar unhas festas nas que os xoguetes e os rapaces e rapazas se converteron nos grandes protagonistas, preguntámonos que saberán de como xogaban os seus pais, os seus avós... como se entretiñan os nenos doutrora?

Deste xeito, dende o Equipo de Dinamización da Lingua, pensamos en organizar unha exposición de xoguetes e xogos antigos co obxectivo de dar a coñecer entre o noso alumnado esta parte fundamental e fermosa da nosa cultura tradicional. Para iso, queremos contar coa vosa colaboración.

Somos conscientes de que moitos dos utensilios que usabamos para xogar os creabamos nós mesmos: bonecas de trapo, pelotas de herba, carracas... e que iso suporá un maior esforzo para as familias, pero tamén valoramos a importancia de achegar aos nosos nenos e nenas outras opcións de xogo no marco da actual sociedade consumista.

Os obxectos deben vir identificados co nome do rapaz ou rapaza, curso e acompañados dunha breve información na que se explique como se xoga con eles. 

No caso de conseguir material suficiente, a exposición estaría aberta ás visitas no noso centro.

Agradecemos a todos de antemán a súa colaboración!

Carla Santalla e Alexia Iglesias (de 4º de ESO A) coas súas cuncas (abril e maio)

16/01/2015

Este ano, os alumn@s que fixeron os traballos seleccionados para o noso calendario recibiron un premio especial: unha cunca co seu debuxo impreso. A verdade é que quedamos sorprendidos do ben que quedaron e poderiamos facer máis para outras ideas no futuro. Moitas grazas de novo aos agasallad@s, e animamos a todo o noso alumnado a que participe na elaboración dos nosos próximos calendarios.

21/12/2014

Durante esta semana, o alumnado de 3º e 4º de Primaria estivo representando dúas pequenas obras teatrais para todos os nosos grupos de Infantil e Primaria (Corre, corre, cabaciña e Indo para o Samaín). As primeiras representacións (para Infantil) tiveron lugar no pavillón de Secundaria o mércores 17, pero a acústica non era nada boa, polo que continuaron na biblioteca de Secundaria. Os vídeos que publicamos agora corresponden a un dos pases do venres 19.

Fai clic para ver o calendario completo

12/12/2014

As protagonistas do noso calendario de 2015 son obras de pintores/as galegas, reinterpretadas polo noso alumnado da ESO.

Os traballos seleccionados son de:

Os gañadores de Primaria e Infantil para as tarxetas foron:

Moitas grazas a todo o alumnado participante (e aos titores/as).

Boas festas e feliz 2015!

12/05/2014

Un curso máis, celebramos o Día das Letras, dedicado nesta ocasión ao poeta e tradutor Xosé María Díaz Castro. A Coordinadora de Equipos de Normalización  pon á disposición da comunidade escolar unha páxina monográfica que compila recursos e materiais sobre o autor homenaxeado:

http://coordinadoraendl.org/letras2014

Queremos destacar este vídeo tan xeitoso que lle fixeron a Díaz Castro na súa terra, Guitiriz. Está pensado para utilizalo nas vosas clases, pois achégannos a letra e a música. Animádevos a cantar e pedídellelo aos vosos profes!

No noso centro as celebracións encádranse fundamentalmente arredor do Certame Intercentros do Concello convocado con ese motivo e no que participaron alumnos e alumnas dos diferentes niveis en diversas categorías. En concreto, temos dúas gañadoras nas modalidades escritas: Alicia Santos de 2ºA de ESO (cómic e poesía) e Andrea Ramos (colaborando con Aldara Castro) de 3ºA de ESO (teatro escrito).

Fai clic para ver máis fotos de Intercentros 2014

Así mesmo, contamos coa presenza de Tono e Sino, dous monitores colaboradores co Servizo de Normalización Lingüística do concello. Estiveron hoxe mesmo con varios grupos da ESO e o PCPI para desenvolver un obradoiro de pintura e creatividade literaria sobre camisolas. Foi unha interesante mañá e quedamos ben satisfeitos co resultado da cousa! Así que imos compartilo con todo o centro pendurándoas na entrada do colexio durante os vindeiros días.

Fai clic para ver máis fotos

25/03/2014

De novo está en marcha o Certame Intercentros. Este ano organizado polo EDLG do CEIP Ponte de Xuvia de Narón.

Non queda xa moito tempo para apuntarse ás categorías orais!! 

Consultade aquí as bases do certame para ver as modalidades en que podedes participar e as datas de entrega.

11/03/2014

Neste entroido puidestes ver á entrada do centro unha exposición coas carautas presentadas polo alumnado para o concurso que convocara o Equipo de Dinamización Lingüística. Estas tres son as gañadoras:

1. Alba Perille Borreiros (1ºB de Primaria)
2. Yaiza Caamaño Canosa (2ºB de Primaria)
3. Andrea Leira Bouza (3ºA de Primaria)

Noraboa ás tres e moitas grazas a todos rapaces e ás familias que participastes nesta iniciativa!

18/12/2013

Algúns alumnos de 6º de Primaria representaron unha pequena peza de títeres para festexar o Nadal. O público foi o alumnado de Primaria, que quedou encantado coa representación dos seus compañeiros. Mañá repetirán a posta en escena desta obra titulada "A estrela xoguetona" para os rapaces de Infantil.

Temos que agradecer o seu entusiasmo a Alba Fontal, Alba Fachal, Alba Romero, Alex L. Matuszczak, Isaac Freire e Nuria Romero. Non tiveron miramentos en investir parte do seu tempo de lecer nos ensaios. Tamén agradecemos a colaboración do resto de compañeiros coa decoración e das familias na elaboración dos monicreques.

18/12/2013

GRAZAS

A todo o alumnado de Secundaria pola súa participación no concurso:

“O NOSO CALENDARIO”

Os traballos seleccionados son de:

GRAZAS

A todos os nenos e nenas de Infantil e Primaria que participaron no concurso:

“TARXETA DE NADAL”

Saíron seleccionadas as tarxetas de:

Este ano, as nosas postais levan un adhesivo cun código QR, que é algo parecido a un código de barras, pero con moitas máis posibilidades, e pensado para ser lido sobre todo con teléfonos móbiles. Lendo ese código, poderedes ver un vídeo moi especial gravado recentemente no Feal.

Existen numerosas aplicacións para móbiles que permiten isto, como por exemplo BIDI (que está dispoñible para todos os sistemas operativos). Non hai máis que executar a aplicación e visualizar o código coa cámara do móbil o mellor posible.

19/09/2013

Un ano máis temos que dar as grazas a toda a xente que colaborou no novo número d'A Tribo. E moi especialmente a Sonia Álvarez, que este ano o tivo un pouco máis complicado para rematar a maquetación. A versión dixital xa está por fin dispoñible no apartado Revista escolar deste espazo web, con diversos erros corrixidos respecto á versión impresa de xuño.

A tribo cumpre dez anos, e parece que foi onte cando se foi artellando a primeira delas... ao principio nin sequera tiña nome! Decidimos chamala así por un lema africano que vén a dicir que para educar a un neno fai falta a tribo enteira.

Na Biblioteca de Secundaria, tedes expostos os dez números que levamos, e tamén podedes participar nun concurso que argallamos para festexar o décimo aniversario. Enchendo un cuestionario con 10 preguntas que acharán resposta en cadanseu número d'A Tribo, poderedes conseguir algún agasallo. Animádevos!!