28/12/2022

No conxelador desta web, tiñamos imaxes aéreas do Feal que non se utilizaran no vídeo do 50 aniversario, así que pensamos en aproveitalas con esta pequena montaxe.

A música de Kate Bush resucitou en 2022 grazas a Stranger things, pero xa é case tan vella como o noso centro, polo que pensamos que podería encaixar nesta montaxe, e fixemos unha versión instrumental caseira para a ocasión.

Pechamos así este ano de celebracións. Vémonos no 100 aniversario!

Nota: as primeiras imaxes aéreas do noso centro tomáranse en 2010 (con moi baixa resolución), desde un helicóptero da Guardia Civil.

Preme para ampliar a foto

24/01/2020

Dende hai uns días, o Feal gañou en cor, xa que recuperamos o mural pintado hai anos na fachada principal (cun deseño do pintor Leandro Lamas). Coas últimas obras realizadas no centro, o debuxo desapareceu, e moit@s lamentamos esta perda.

O Programa de Recursos Educativos de Apoio á Escola (impulsado pola concelleira de Educación Mercedes Taibo) permitiunos recuperalo, nunha actividade na que o alumnado de 3º ESO, dirixido por Édgar Gómez e Alejandro López, axudou a pintalo de novo seguindo o debuxo orixinal.

Quedamos moi content@s coa experiencia e o resultado. De seguro que as cores do noso mural axudan a empezar a xornada con mais enerxía! Moitas grazas a tod@s @s que o fixestes posible!

Preme para ampliar a foto

30/09/2019

Moita xente coñece xa esta novidade nas nosas instalacións, pero quedaba pendente publicalo nesta web. Durante o pasado verán, a Consellería de Educación reformou a antiga vivenda do/a conserxe (situada xunto ao patio cuberto), creando tres espazos novos para o noso centro: a futura Biblioteca de Infantil e Primaria (na foto), unha pequena aula para Audición e Linguaxe, e un baño accesible.

Desde a aula que aínda está dedicada á Biblioteca de Infantil e Primaria, irase trasladando o material ao novo espazo pouco a pouco, quedando dispoñible para o seu uso ordinario. Ademais, a nova biblioteca mellorarase con novo material.

31/01/2019

Esta mañá tivemos que evacuar o noso centro como medida de precaución, despois de ver fume saíndo da caldeira de calefacción.

Tras moi poucos minutos, chegaron os bombeiros de Narón, pero hai que aclarar que só se trataba dunha mala combustión (producida por residuos), e que xa está resolta a avaría sen que houbese ningún tipo de explosión ou complicación.

Todo o alumnado, o profesorado e o persoal non docente quedou concentrado no pavillón de Secundaria durante aproximadamente unha hora, sen maiores incidencias.

19/07/2018

As obras de mellora da nosa eficiencia enerxética que anunciáramos a finais de 2017 xa están en marcha. Finalmente, a Xunta investirá 800.000 € nesta actuación.

15/12/2017

Como recolle o Diario de Ferrol do 15/12/2017, onte recibimos a visita do delegado territorial da Xunta (Ovidio Rodeiro), o xefe territorial de Educación (Indalecio Cabana) e alcaldesa de Narón (Marián Ferreiro). Nesta visita, confirmouse unha importante reforma exterior do edificio principal do noso centro (tellados, paredes, ventás, canalizacións...). O principal obxectivo desta reforma é a mellora da nosa eficiencia enerxética, e está previsto que se realice ao longo de 2018. O CPI do Feal é un dos nove centros galegos seleccionados para esta quenda.

Fai clic para ampliar a foto

20/10/2016

Este curso, O Feal perdeu unha das súas aulas de informática (debido ao crecente número de aulas normais en Primaria), pero modernizou notablemente as dúas que de momento resisten.

A da segunda planta tiña os equipos máis vellos (de principios de século), e durante o mes de xullo montamos alí os máis novos (enviados pouco antes pola Xunta). A decisión que tomamos de ampliar o software que traían, fixo que necesitásemos superar numerosas dificultades durante os meses seguintes. Foron literalmente centos de horas de traballo e cabreo tecnolóxico para chegar por fin á “inauguración” desta mañá.

Ademais do persoal do noso centro, colaborou (con gran xenerosidade e acerto) persoal da empresa ferrolá Artemisa (un millón de grazas, Javi e Iván!!), e incluso axudou o alumnado de 4º de ESO que vedes na foto (matriculado na materia de TIC).

Pregamos a tod@s @s usuari@s das renovadas aulas de informática, que agora axudedes a mantelas como o primeiro día. Tod@s sairemos gañando.

E non podemos rematar este artigo sen mencionar a alguén do Feal que se mantén imperturbable desde principios de século: a nosa fascinante... Velocidade de Internet!! Sentímolo, non podemos facer nada por ela... non depende de nós. Se alguén de vós ten enchufe na Xunta... é o último recurso que nos queda (esta mañá mediamos entre medio e dous megas nos nosos máis modernos equipos).

Chapuzas a domicilio

21/11/2013

Ante a inquedanza suscitada a semana pasada pola presenza dun pequeno guindastre-elevador no centro, dende a Dirección queremos comunicar que, simplemente, se tratou da realización de tarefas de mantemento para rematar de xeito funcional a obra de cobertura do patio (realizada durante o verán), xa que se producían filtracións dos canlóns no interior deste espazo. Ademais, resolvéronse os problemas de goteiras no ximnasio de secundaria, todo isto grazas ao compromiso acadado o día 6 de novembro tras a celebración do Consello Escolar Municipal coa Concelleira de Ensino e o Concelleiro de Servizos do Concello de Narón.

Por outra banda, informamos de que a Dirección do centro presentou un escrito no rexistro do Concello, con data 20 de setembro, no que solicitaba, entre outras cousas, a sinalización da zona de autobuses, reparación do firme, e establecemento dun paso de peóns. Esta solicitude conta xa co visto bo do Concello, e estamos agardando a que se leve adiante o traballo.

24/10/2012

Papá Noel non defraudou. Xa temos ordenadores novos nas seguintes aulas do Feal:

• Infantil de 3, 4 e 5 anos
• 1º, 2º, 3º e 4º de Primaria

Son os primeiros ordenadores do Feal sen disco duro. En lugar do tradicional disco magnético xiratorio, xa teñen unhas memorias sen mecanismos (moito máis rápidas e similares ás USB) chamadas SSD.

Ángel Carrera, 28/05/2010

Como agasallo polo terceiro aniversario desta web, fixen un pequeno vídeo musical con cinco fotos que recibín recentemente de Dolores. Por razóns de seguridade, non podemos desvelar o nome do fotógrafo (GRAZAS AMIGO!!). Esperamos conseguir imaxes similares unha vez rematadas as obras do comedor. No vídeo, pódese apreciar o colorista legado da nosa directora en todo o seu esplendor. Tamén é posible gozar deste legado a través das imaxes fixas do álbum "Instalacións exteriores" da nosa Galería.