( clicando na imaxe enlazas coa nosa páxina web)

Chegan as IV Xornadas EspazoFamilias!

Este ano a nosa intención é darlle voz ás familias e facilitar o diálogo entre as persoas participantes. 

Durante tres xornadas xeraremos un tempo de conversa no que poder compartir inquedanzas, dúbidas e experiencias en torno a gran tarefa que temos as persoas adultas intentando educar ás nosas crianzas.

Introducimos para iso unha novidade que consideramos moi enriquecedora: non limitarnos ás familias e incluír á rapazada como parte fundamental destas xornadas. Para iso deseñamos actividades paralelas ao encontro de adultos onde elas e eles sexan as protagonistas.

As sesións estarán a cargo de:

• Anabel Mosquera (pedagoga, formadora e experta en adiccións) estará coas nais, pais, titores e adultos a cargo de menores.
• Xaime Bello (Educador social e coordinador do Proxecto Turbina) con adolescentes a partir de 13 anos
• Alba Pérez (Educadora Social) coa rapazada de 8 a 12 anos
• Para os máis pequenos(de 3 a 7 anos) haberá servizo de canguraxe que podedes reservar no seguinte enlace: https://espazofamilias.org/reserva/

As demáis actividades non precisan de reserva.

Datas: 22 marzo, 12 e 26 abril

Hora: 18.00h

Lugar: Centro Social de Boiro

Animámosvos a participar!!!

O 25 de Xaneiro catro membros do alumnado de 3º ESO elixidos por sorteo ( Airam Ces, Nelly González, Manuel González, Leire Rodríguez) acompañados da docente Pury Vez , foron recibidos pola Concelleira de Cultura e polo alcalde de Boiro para presentar o produto final dunha unidade didáctica baixo o título Improving your town (mellorando a túa cidade) . A unidade didáctica foi levada a cabo no marco do Obxectivo de Desenvolvemento Sostible nº 11 (Cidades e comunidades sostibles) e duns obxectivos e competencias específicas . Trala recollida de sinaturas e votacións a favor realizadas no centro escolar, algunhas das peticións achegadas á reunión no Concello foron : instalación de mais farolas solares nas rúas, mais fontes de auga potable, peticións concretas para mellorar as instalacións deportivas da vila e do rural, melloras nas paradas de autobús no rural, zonas de lecer cubertas, bicicletas de aluguer, etc . Agradecemos a atención cordial e pormenorizada tanto por parte da concelleira como polo alcalde en escoitar a opinión da mocidade. Grazas ao alumnado pola súa implicación na actividade. Se queredes saber mais, achegádevos a nós.

Todo o alumnado de 3º ESO.