Skip to Content

Xeografía e Historia

DEPARTAMENTO DE XEOGRAFÍA E HISTORIA

PROFESORES:

  • Nieves González Fernández (Xefa de Departamento)
  • Roberto C. Agrelo Tubío
  • María del Carmen Rodríguez Lemos
  • Ana María Pose Blanco

MATERIAS:

  • Ciencias sociais, xeografía e historia: 1º,2º,3º e 4º ESO
  • Paisaxe e sustentabilidade: 2º ESO
  • Historia do mundo contemporáneo: 1º BAC
  • Fundamentos da arte: 1º e 2º BAC
  • Historia de España: 2º BAC
  • Historia da arte: 2º BAC
  • Xeografía: 2º BAC
  • Patrimonio artístico e cultural de Galicia: 2º BAC

 PROGRAMACIÓN ANUAL DO DEPARTAMENTO:

Saída a Santiago de Compostela

 

 

O xoves 24 de febreiro o alumnado de Bacharelato que cursa as materias de arte (Historia da arte, Fundamentos da arte e Patrimonio artístico e cultural de Galicia) tivo a oportunidade de facer unha visita á catedral de Santiago da man do departamento de Xeografía e Historia. O alumnado e as súas profesoras puideron realizar unha visita guiada á catedral e aos tellados, observando en primeira persoa todos aqueles elementos que previamente analizaran na aula. Unha experiencia moi enriquecedora da que volveron encantados.

Obradoiro "Marisqueo a pé"

Este xoves 21 de outubro un grupo de alumnado de 3º de ESO participou no obradoiro "Marisqueo a pé" da man das traballadoras da Asociación de Mariscadoras Mar da Pobra, da Pobra do Caramiñal. Acompañados de profesorado do Departamento de Xeografía e Historia coñeceron de primeira man o duro traballo destas mulleres e o seu respecto e amor polo mar; tamén gozaron dunhas horas de educación fóra das aulas. Profesorado e alumnado coincidiron en que foi unha experiencia estupenda, de aprendizaxe e diversión. Grazas ás anfitroas por recibirnos!

Modificacións da programación didáctica. Curso 2019 - 2020

Re-enacting History / Re-creando a Historia

Os alumnos e alumnas de Historia do Mundo Contemporáneo- sección bilingüe recrearon un ano máis fotos históricas.

Esta foto é unha recreación realizada por Jessica Fernández dun retrato de Maud Wagner, que a comezos do século XX se converteu na primeira tatuadora coñecida no mundo occidental. 

Jessica elixiu esta fotografía porque amosa o valor da historia cotiá e o importante papel das mulleres na Historia e porque a tatuaxe segue presente na actualidade.

 

Laura Piñeiro recreou esta fotografía de Frida Kahlo por ser unha muller á que admira moito como artista e como persoa pola súa fortaleza ante a enfermidade e pola súa defensa do feminismo.

 

Liz Puerto recreou un cartaz que representa ao Tio Sam, personificación dos EEUU, facendo un chamamento aos homes para loitasr  na I Guerra Mundial. Este cartaz, á súa vez, é unha adaptación doutro anterior realizado no Reino Unido. Liz imitou este cartaz pois tivo un grande impacto na súa época e é reinterpretado de xeitos moi diferentes na actualidade. 

 

Re-enacting Art / Re-creando a Arte

 

Os alumnos e alumnas de 3º de ESO B-sección bilingüe reinterpretaron diferentes obras de arte do Renacemento e do Barroco dentro da materia de Xeografía e Historia.

Unha das obras adaptadas foi A rendición de Breda, de Diego Velázquez, na que recreamos a obra representando un enfrontamento entre dúas bandas urbanas que remata coa reconciliación destas nunha defensa do respecto á diversidade.

Feito por todos os alumnos e alumnas de 3º ESO B.

 

Nesta recreación d'A derradeira cea, de Leonardo da Vinci, denunciamos varias prácticas da actualidade: os malos hábitos alimentarios nos que ten unha excesiva presenza a comida lixo; a enorme produción de residuos por mor do uso de embalaxes innecesarrias e produtos de usar e tirar; a substitución en ocasións dos valores deportivos por rivalidade e violencia no fútbol; e o mal uso que fai en ocasións das novas tecnoloxías.

Feito por Sabela Martínez Tomé, Jorge Saavedra Fungueiriño, Alejandro Tubío Sieiro, Javier Varela Viturro, Alejandro Santos Tubío, Eva Regadas Tubío, Yolanda Casqueiro Fernández, David Triñanes Ozores, Roi García Vidal, Antía Ramallo Blanco e Sandra Martínez Liste (3º ESO B).  

 

Na recreación d'O Nacemento de Venus, de Sandro Botticelli denuncimos a violencia machista na sociedade.

Na representación, a ninfa Clovis é substituída por un home que intenta maltratar a Venus, mentres o vento Céfiro, que representa as forzas policiais, intenta deter a Clovis empregando tamén a violencia. Venus é representada como unha muller. A pedra sobre a que está simboliza o seu poder e forza, mais está axeonllada sobre ela por mor da opresión que sofre. Primavera representa á parte da sociedade que segue a pensar que o papel da muller é coidar da casa e dos fillos, e por iso está a lle ofrecer un mandil a Venus.

Feito por: Sara Blanco García, María Blanco Resúa, Jorge Hermo González,  Laura Pérez López, Pablo Piñeiro Ínsua e Sara Romero López (3º ESO B).

 

O bolero, de José Camarón Bonanat, é unha obra inspirada no estilo rococó francés, pero adaptada ao gusto español. Os personaxes están vestidos segundo a moda madrileña dos majos e as majas. Nós recreamos a fotografía adaptándoa aos bailes tradicionais de Galicia.

Feito por: Miranda Carou Laíño, María Gómez Sánchez, María Jacobs Sánchez, Sonia Romero Vidal e Catariña da Silva Lopes e  (3º ESO B). 

 

Recreamos o cadro Nenos comendo uvas, de Bartolomé Esteban de Murillo, substituíndo a froita por vídeo xogos para representar a importancia que ten este tipo de xogos no lecer dos rapaces e rapazas na actualidade. Esta representación tamén se relación co cadro Nenos xogando aos dados, do mesmo autor, pois permite ver como cambiaron os xogos ao longo do tempo. 

Feito por: Jorge Piñeiro Bermúdez e Pablo Trasbach Sánchez (3º ESO B).

Clausura do III certame de recreos con historia

 

Este curso realizouse por terceiro ano consecutivo o certame de microdebates "Recreos con Historia" con alumnos e alumnas de 2º de bacharelato. Alison, Camila, Aldara, Antón, Paula, Iris, Lara, Sara, Sara, Rubén, Julia, Marta e María, debateron temas como os ataques terroristas a París e a Bruxelas, a crise dos refuxiados, o papel da monarquía na actualidade, os resultados das eleccións do 20-D e o novo escenario para as eleccións do 26-J.

Andaina e visita guiada pola paisaxe cultural d'A Abrañeira

Os alumnos e alumnas de 3º de ESO realizaron unha ruta pola paisaxe cultural d'A Abrañeira, no municipio de Boiro, para poñer o ramo ao traballo de investigación sobre paisaxes culturais sustentables que realizaron durante este curso na materia de Xeografía e Historia no marco da III Semana Temática do centro e do Proxecto Terra

Esta ruta foi seleccionada polos propios alumnos e alumnas entre un total de catorce interesantísimas propostas dentro da comarca preparadas en grupos polo alumnado. 

A andaina foi agarimosamente guiada polos autores da ruta, Jorge Hermo, Sabela Martínez, Pablo Piñeiro e Antía Ramallo, que compartiron con compañeiros e profesoras os lugares que tanto eles como os habitantes da zona máis valoran.

O día estivo cheo de aventuras. Á mañá vimos aldeas, muíños, hórreos, cruceiros, carballeiras e labradíos; paseamos por corredoiras e camiños de pedra unidos por fermosos pasares a través do río Coroño; fomos recibidos pola Señora Magdalena na súa casa; e tivemos a compañía do can Bora, a vaca Xovenca, trece ovellas sen nome e un poldro rebuldeiro.

A tarde transcorreu no Campo de Ordenario, onde, tras xantar, realizamos varias actividades axudados pola Asociación de Malladores da Abrañeira que nos adicou xenerosamente o seu tempo: Primeiro, divertímonos con diferentes xogos tradicionais, como a chave, o pano, a pita cega ou os zancos; mais tarde, disfrutamos dunha demostración da malla e aprendemos a usar os manlles; e para rematar a xornada, fixemos unha foliada con gaitas e cantigas tradicionais. 

 

A volta ao instituto refrescámola cun baño no río Coroño que nos axudou a aturar a temperatura case que estival, e comezamos xa a cavilar en novas rutas para o vindeiro curso. 

 

 

Almorzo co escritor Antón Riveiro Coello

O escritor e membro da comunidade educativa do centro, Antón Riveiro Coello, compartiu un almorzo cos alumnos e alumnas de 1º de bacharelato da materia de Historia do Mundo Contemporáneo, sección bilingüe, e falounos da relación entre historia e literatura.

O escritor repasou os fitos máis salientables da súa traxectoria profesional entretecendo historias reais e ficticias que cativaron aos presentes.  

A seguir, reflexionou sobre os ollares diferentes pero complementarios á realidade desde a historia e a literatura, abriunos unha xanela ao seu proceso creativo, no que destacou o importante papel da súa familia, o seu contorno máis próximo, as historias cotiás e os pequenos detalles como cerna da súa obra, e sinalou o compromiso coa memoria histórica como unha constante na súa produción literaria. 

Aos alumnos e alumnas sóubolles a pouco o tempo co escritor e quedaron con vontade dunha nova xuntanza. 

Distribuir contido


Educación Boiro

by Dr. Radut