Skip to Content

Clube de Ciencias Gabita

Gabita Barraña, a páxina web do club de ciencia


As alumnas da materia de TICs de 2º de Bacharelato A, crearon esta páxina web que recolle as actividades do club de ciencia.

 

Páxina web do clube de ciencias

 Grazas polo voso excelente traballo ao longo deste curso, tanto dentro do club de ciencia, como na materia de Bioloxía. Moita sorte na nova etapa que estades a piques de comezar.

Ana Urbieta

O club de ciencia xa ten logo

Logo_Gabita negro

Logo Gabita transparente

Unha alegre gabita, debuxada por África Brión Pérez, alumna de 4º de ESO, envolta por unha onda azul, este é o logo do noso club de ciencias. Pódese utilizar con fondo negro ou transparente.

Ana Urbieta Balado

20 de marzo, inicio da primavera e día do pardal

Femia de pardal

Femia de pardal

Femia de pardal

Femia de pardal

Macho reprodutor

Macho de pardal co seu babeiro característico

Hoxe, 20 de marzo, ás 16:35 hora local, comezou a primavera. Tamén é o día mundial do pardal (Passer domesticus). O seu nome científico significa paxaro doméstico, porque esta pequena ave sempre conviviu cos humanos en harmonía, comendo algo do gran das galiñas e outras aves de curral, pero prestando un valioso servizo que era pouco coñecido.

Foi en 1958, cando o dirixente chino, Mao Zedong, descubríu da peor maneira posible a utilidade destes paxariños. Ao ver que os pardais comían parte dos cereais que se cultivaban nos campos, considerounos unha praga e deu a orde de exterminalos. Só en Shanghai sacrificáronse perto dun millón e medio de pardais.

O que os chineses non sabían era que a dieta do pardal inclúe cereais, pero está baseada no consumo de insectos, o que fai deles un insecticida natural, eficiente e seguro. O resultado deste descoñecemento, foi unha praga de lagosta que arrasou os cultivos e provocou a coñecida como "Gran fame chinesa" que causou a morte de entre 15 e 45 millóns de persoas. 

Anos despois, as autoridades chinesas recoñeceron o seu erro e comezaron a costosa tarefa de recuperar as poboacións desta ave que presta un servizo esencial nos ecosistemas agrícolas.

Hoxe foi difícil fotografalos en Boiro, houbo que buscalos no seu hábitat favorito: convivindo cos humanos, preferentemente nas casas de campo.

Este fiel compañeiro, está desaparecendo en todo o mundo. Por iso hoxe celebramos o seu día. Se queredes saber máis sobre o pardal, gorrión en castelán, premede nesta ligazón.

Ana Urbieta Balado

 

Chegaron os bisbitas a pasar o inverno

 

As primeiras aves migratorias do outono van chegando a Boiro. Este  bisbita pratense, pica dos prados (Anthus pratensis) achegouse a espreitar o que pasaba nas pistas do IES Praia Barraña.

Esperabámolos dende outubro e hoxe, por fin, xa mediado novembro, deixáronse ver. Como cada ano, despois de criar no norte de Europa, volven á Praia de Barraña e ás marismas do río Coroño para pasar o inverno. Insectos, vermes, caracois e sementes non lles han faltar. Estarán con nós ata marzo, así que teremos moitas oportunidades de observalos. Pero non pensedes que vai ser fácil. Os fermosos debuxos das súas plumas permítenlles mimetizarse co chan e pasar desapercibidos tanto nos campos como nas praias.

Ana Urbieta

 

Gabita, o club de ciencia do IES Praia Barraña

 

Gabitas mariscando na Praia de Barraña

 

Comezamos este curso estreando un club de ciencia dedicado á observación e investigación das aves. Un club que ten nome propio, Gabita. As gabitas (Haematopus ostralegus) son esas aves que aparecen na imaxe mariscando na Praia de Barraña. Escollemos as aves como centro de interese porque son moitas as que podemos observar na contorna do centro. Algunhas son residentes, outras visítannos cada ano. Unhas poucas chegan até as nosas costas, empuxadas fóra das súas rutas migratorias por fortes ventos. As menos, son especies exóticas, escapadas de parques ou de gaiolas de particulares. Todas nos interesan e o noso obxectivo é ir coñecéndoas e colaborar na súa conservación.

Dentro das actividades do club de ciencia imos levar a cabo observacións e fotografía de aves; construción de comedeiros e caixas niño; experimentos de física que nos permitirán comprender como voan  e como se orientan nas súas migracións; papiroflexia; estatística; análise de augas e estudo das rochas.  Iremos publicando os resultados do noso traballo.

Nesta aventura vainos acompañar, Gabi, unha gabita ruidosa e inconfundible, co seu longo peteiro vermello e as súas patas rosas. Vive na Praia de Barraña e vai estar encantada de axudarnos a descubrir os segredos dos seus colegas, eses pequenos dinosauros emplumados, supervivintes da última gran extinción, que seguen entre nós e teñen moito que aprendernos.Se sentides curiosidade pola ornitoloxía,  invítamosvos a unirvos ao club.

Ana Urbieta

 

 

Distribuir contido


Educación Boiro

by Dr. Radut