Complementarias

Alumnado de 2º ESO asistiu ao obradoiro “Identidade Dixital e Xestión Segura das Redes Sociais”

Xov, 15/02/2024 - 23:36 — IES de Valga

O alumnado de 2º ESO participou no obradoiro “Identidade Dixital e Xestión Segura das Redes Sociais” impartido por Manuel Rivas da Axencia para a Modernización Tecnolóxica de Galicia. Durante hora e media, alumnas e alumnos recibiron, dende unha perspectiva eminentemente práctica, consellos para unha apropiada xestión da súa identidade dixital, ademais de reflexionar sobre a importancia da ciberseguridade e do uso responsable dos dispositivos e as tecnoloxías. Tamén coñeceron como configurar as opcións de seguridade e privacidade das redes sociais para un uso seguro das que utilizan máis habitualmente. A actividade está promovida pola Consellería de Cultura, Educación, Formación Profesional e Universidades en colaboración con AMTEGA.

Celebramos o Entroido 2024 no patio cuberto

Sáb, 10/02/2024 - 20:07 — IES de Valga

Na mañá do venres 9 de febreiro, celebramos o festival de Entroido. O fío condutor foi a recreación de diferentes obras pictóricas da Historia da Arte. O festival foi presentado polo profesor Avel Turnes e nel, actuaron o alumnado dos cursos da ESO xunto co de Bacharelato, Ciclo Básico de Agroxardinaría e do 2º curso do CS de Construcións Metálicas, parodiaron cadros representativos de diferentes épocas como "As Meninas" ou "A última cea". As actuacións acabaron representadas na estrutura realizada para a ocasión polo alumnado dos Ciclos Básicos de Soldadura e de Agroxardinaría. Despois da actuación e, mentres o xurado deliberaba, o alumnado de Música deleitou aos asistentes cunha batucada, no que interpretaron unha mestura de ritmos procedentes de Xamaica e Brasil. Para ela empregaron tambores, que construíron con materiais reciclados. Un xurado formado por seis membros da comunidade educativa, elexido para a ocasión, decidiu os tres premios do concurso, xentileza da ANPA "Bella Otero". O 1º premio consistente nunha xornada de karts no Kartódromo de Casaldeirigo foi para a recreación do cadro "As Meninas" por parte do alumnado de 2º CS de Construcións Metálicas, o 2º premio, unha cea de Entroido para todo o grupo, foi para o alumnado de 2º Bacharelato B pola recreación do cadro "Convergence" de Pollock e o 3º premio, tamén unha xornada nos karts, para o alumnado de 1º Bacharelato A pola súa actuación arredor do cadro "A Gioconda". A Vicedirección coa colaboración da ANPA levaron a organización deste festival.
Noraboa aos premiados e tamén ao alumnado e profesorado participante!!!

MANDADOS ENTROIDO 2024: do 5 ao 8 febreiro

Xov, 01/02/2024 - 21:06 — IES de Valga

Acto na Biblioteca para conmemorar o "Día Escolar da Non Violencia e a Paz" 2024: "Música pola Paz"

Mar, 30/01/2024 - 22:08 — IES de Valga

O martes 30 de xaneiro, durante o segundo recreo conmemoramos o "Día Escolar da Non Violencia e a Paz", fundado en 1964 polo poeta e pacifista mallorquín Llorenç Vidal en homenaxe a Mahatma Gandhi no aniversario da súa morte ocorrida o 30 de xaneiro de 1948. Este curso os departamentos de Filosofía, Relixión e Música co seu alumnado e en colaboración coa Vicedirección realizaron un emotivo acto na Biblioteca: "Música pola Paz".

A actividade comezou coa lectura dun manifesto lido polas alumnas de 1º Bacharelato Ana Sanmiguel e Carla Herrero en prol da Paz. O acto continuou coa lectura de dous poemas a cargo do profesor Avel Turnes, a interpretación de dúas pezas musicais por parte do alumnado de Música de 4º ESO e 1º Bacharelato: "Hey Brother" de Avicii e "La salvación" de Arde Bogotá; finalizando este acto coa proxección dun vídeo elaborado polo alumnado de Filosofía de 1º Bacharelato. Tamén destacamos a pancarta alusiva a esta conmemoración realizada polo alumnado de Relixión e a exposición, que se pode ollar no corredor da planta baixa, de pombiñas-compromisos pola Paz realizadas polo alumnado.

Actividades fin do primeiro trimestre

Sáb, 23/12/2023 - 21:18 — IES de Valga

O xoves 21 de decembro tiveron lugar no noso centro diferentes actividades como limiar das vacacións do Nadal e remate do primeiro trimestre. A mañá comezou cun Torneo de Xadrez na Biblioteca, no que participaron 30 alumnas e alumnos de diferentes niveis. O gañador foi Siro Castro de 3º ESO, seguido de Xián Bouzón de 2º Bacharelato e Jesús M. Lafuente de 4º ESO. Os premios aos gañadores foron entregados polo profesorado Laura Souto e Víctor González.
No patio cuberto tiveron lugar o resto das actividades, comezando coa actuación do alumnado de Música que interpretaron “Músicas do mundo”, dirixidos polo seu profesor Ismael Cabaleiro. Ao final da actuación houbo un momento para a despedida por xubilación do noso compañeiro, profesor de Filosofía e coordinador dos clubs de lectura, Víctor González Zuñiga.
A continuación, repartíronse uvas entre os asistentes para celebrar o “fin de trimestre”, coméndoas a ritmo das tradicionais doce badaladas. Este acto precedeu a un disputado encontro de baloncesto entre o equipo do alumnado e o profesorado, con vitoria do profesorado.
Despois tocou a hora de repoñer forzas cunha chocolatada, xentileza da ANPA. E tras ese paréntese, finalizamos cun karaoke por parte de alumnado de Lingua Galega de 3º e 4º ESO, aínda que o momento máis emotivo foi a despedida ofrecida ao profesor Víctor González por parte do resto do claustro interpretándolle unha versión moi particular da canción de Alaska e Dinarama: “El Rey del Glam”. Foi o colofón para esta maratoniana mañá de actividades. Bo Nadal!!! a toda a comunidade educativa do noso centro.