Skip to Content

Extraescolares e complementarias

Torneo de Badminton. Programa Xogade

O luns 20 de decembro un grupo de alumnos e alumnas de 1º e 2º de ESO desplazáronse a Serra de Outes para participar na fase comarcal do torneo de bádminton organizado polo Programa Xogade. 

Pasaron unha mañán estupenda e algúns deles conseguiron clasificarse para a seguinte fase. Parabéns!

Día Internacional da Discapacidade: Festiritititi.

 

O pasado 3 de decembro o alumnado da Aula de Educación Especial acudiu ao Polideportivo Barraña convidado pola Asociación Amicos, con outros centros do concello de Boiro, para participar no Festiritititi, unha gran festa da inclusión onde o pasaron en grande. Participaron de multitude de xogos, obradoiros e animacións durante a mañán e volveron ao instituto encantados coa experiencia. Moitas grazas polo convite, Asociación Amicos, e por moitos anos máis de Festiritititi!

25N. Día Internacional da Eliminación da Violencia contra as Mulleres

 

 

Como cada ano este 25 de novembro conmemorouse o Día internacional da eliminación da violencia contra as mulleres. A cifra oficial de mulleres asasinadas no noso país neste ano é de 37, pero non podemos olvidar que esta cifra só reflicte as mulleres asasinadas polas súas parellas e exparellas, non aos nenos e nenas vítimas da violencia vicaria, prostitutas, mulleres asasinadas por outros familiares ou descoñecidos polo feito de consideralas vítimas "fáciles" ou máis vulnerables... Nós quixemos darlle presencia a todas elas no noso muro das vítimas, no corredor da planta baixa, onde ademais o alumnado deixou as súas frases en contra da violencia machista. 

Comezamos a semana colocando na entrada do centro unha impresión da Eva de Durero rodeada de mazás, o símbolo da culpa e o pecado que arrastran as mulleres dende a orixe dos tempos. O xoves 25 a entrada do IES rendiu homenaxe á obra da artista mexicana Elina Chauvet "Zapatos rojos", que ela creou no ano 2009, inspirada polo asasinato da súa irmá a mans do seu home e polos múltiples feminicidios perpetrados en Ciudad Juárez. A propia Elina dixo nunha entrevista sobre a súa obra, que se convertiu cos anos nunha forma de denuncia da violencia contra a muller en cidades de todo o mundo: Zapatos vermellos é unha instalación colectiva de Arte Pública, Unha chamada á conciencia, a solidarizarnos ante unha situación de violencia cara as mulleres do mundo, unha preocupación pola morte de mulleres, nenas e novas que continúan desaparecendo e sendo asasinadas ante a mirada indiferente das autoridades. Esta peza ten os seus inicios en Ciudad Juárez, (Chihuahua México) o 22 de agosto do 2009 Como unha marcha de 33 mulleres ausentes, ao seu camiñar fóronse sumando cada vez máis pasos solidarios que visibilizan a ausencia e a dor que isto provoca nas nosas sociedades. «Zapatos vermellos” é unha memoria colectiva, unha evocación, un vacío, unha marcha silenciosa, é un anhelo, o regreso a casa dos nosos seres queridos."

Ao entrar no centro a primeira hora da mañá alumnado e profesorado atoparon en corredores e escaleiras unha morea de mulleres vestidas de negro cunha mazá vermella na man, inmóbiles, silenciosas, testigos mudas e recordo das mulleres que xa non están con nós co único motivo desa culpa/pecado coa que cargamos dende o berce.

Para rematar, no segundo recreo reunímonos no patio para sacar unha foto coa pancarta realizada polas alumnas colaboradoras do Equipo de Barraña Enreda, Belén e Miryam, que plasmaron o lema elixido neste ano polo equipo: Vivas, libres, iguais.

Moitas grazas a todas e todos os que colaboraron na posta en marcha destes pequenos xestos, sobre todo aos membros do equipo de Barraña Enreda, incluidas as nosas alumnas colaboradoras Belén e Miryam, ás profesoras e alumnas que adiantaron os seus espertadores para a intervención da mañán, e todos e todas as que seguimos pensando que a violencia contra as mulleres segue a ser un dos principais problemas da nosa sociedade e que a educación é clave para erradicalo.

 

Programa Xogade. Carreira de Orientación.

O mércores 24 de novembro un grupo de alumnos e alumnas achegáronse coas profesoras Pilar Barros e Carolina Fernández a Porto do Son, para participar nunha carreira de orientación organizada polo Programa Xogade. A carreira desenvolveuse no Campamento Virxe de Loreto, cunha organización que merece os nosos parabéns e nunha paraxe do máis axeitada. O noso alumnado puxo en práctica as súas habilidades e todos e todas foron quen de completar a proba. Pasaron unha mañán estupenda ao aire libre e activándose. Agardamos a seguinte convocatoria do programa con moitas ganas.

Día Internacional para a Tolerancia. Conversas con Mans Unidas.

 

O martes 16 de novembro, con motivo do Día Internacional para a Tolerancia, e dentro do marco do noso Proxecto Integrado “Cidadáns do mundo” recibimos a visita de dous voluntarios de Mans Unidas e Ecos do Sur, Mabel Mougán e Djibril Faye. Mabel e Djibril conversaron co alumnado de 4º e 3º da ESO, respectivamente, sobre os campos de refuxiados e sobre a experiencia da emigración.

Djibril Faye, voluntario da ONGD Ecos do Sur, veu nesta ocasión coma colaborador da ONGD Mans Unidas da  Delegación  de Santiago. Mans Unidas  leva  62  anos  loitando contra  a  fame  e a  desigualdade  nos  países do cono sur apoiando á  poboación  no  seu desenvolvemento  con  distintos  proxectos (educativos,  sanitarios , agrícolas ...) .   Djibril  traballa  na  ONG Ecos do  Sur como  mediador  intercultural  e  como  responsable  do  programa de acompañamento  sanitario. Actualmente residente en A  Coruña,  Djibril  é de  orixe  Senegalés, e compartiu coa  rapazada de 3º ESO  a  súa  experiencia como  migrante chegado  a  Canarias e  o  seu  periplo por España.

Djibril é quen de  falar 6  linguas además do  castelán  e  leva  traballando  en  Ecos do  Sur  dende o  ano  2008.  O alumnado tivo  unha  actitude  exemplar durante  toda  a  charla.  Agardamos que  compartan  a  experiencia  coas  súas  familias. 

Pola súa parte, Mabel Mougán, voluntaria da ONGD Mas Unidas, relatou a súa visita a ONGD Kuchinate en Israel, colectivo de mulleres africanas, ao alumnado de 4º ESO. A organización Kuchinate ten como obxectivo dar acubillo a mulleres africanas, sobre todo de Eritrea e Sudán, que foxen dos seus países en busca dun futuro mellor, pero moitas delas acaban sendo vítimas da trata de persoas, encarceradas e violadas. Finalmente as que conseguen chegar a Israel son acollidas por esta ONGD que lles proporciona un fogar, axuda psicolóxica e un medio de vida coa elaboración de artesanía de crochet. Unha realidade, a destas mulleres, moi dura, xa que ademais de todo o dito hai que sumarlle o feito de que en Israel non teñen o recoñecemento de refuxiadas, o que fai que “non existan” legalmente, de aí a importancia desta entidade que lles proporciona a axuda necesaria para sobrevivir.

Grazas a Mans Unidas por prestarse desinteresadamente a aproximar estas realidades ao noso alumnado, e á nosa xefa do Departamento de Inglés, Pury Vez, por xestionalo. Agardamos seguir aprendendo e enriquecéndonos con outras experiencias neste curso, da man do noso proxecto "Cidadáns do mundo".

Saída didáctica a Ourense

 

O mércores 17 de novembro un grupo de alumnas e alumnos de 3º ESO visitaron a cidade de Ourense da man do Dpto. de Relixión. Na cidade realizaron o roteiro literario vencellado ao autor Carlos Casares e á obra A Esmorga, de Eduardo Blanco Amor, e pasearon  polas rúas localizando as casas natais de Ramón Otero Pedrayo, Vicente Risco, Florentino López Cuevillas e Xocas.

A continuación fixeron unha visita á Catedral de Ourense, e despois do xantar gozaron das Termas.

Unha xornada completa de educación e lecer fóra das aulas, acompañados polas profesoras Isabel Ventoso e Marieta Picón.

Equipo de Dinamización Artística e Cultural do IES Praia Barraña: BARRAÑA ENREDA

 

Neste curso 2021/22 bota a andar o Equipo de Dinamización Artística e Cultural do IES Praia Barraña co nome de BARRAÑA ENREDA. Este equipo, formado pola Biblioteca Escolar, o Equipo de Normalización e Dinamización da Lingua, o Equipo de Artes e a Vicedirección do centro non ten outro obxectivo que fomentar a participación da comunidade educativa en actividades e proxectos que nos leven máis alá da aula e nos vinculen á nosa contorna.

Para conseguilo, durante cada curso traballaremos na medida do posible sobre un eixo temático vertebrador, tanto nas festividades e conmemoracións educativas, coma nos diversos proxectos e programas que desenvolva o centro, sen olvidar o noso traballo diario dentro das aulas. Neste curso 2021/22 o noso Proxecto Documental Integrado chámase “Cidadáns do mundo”. Achegarémonos aos movementos migratorios, ás diferentes tipoloxías, causas, consecuencias, actitudes que espertan…. tratando de traballar a solidariedade, a empatía, o respecto aos dereitos humanos fundamentais e loitando contra condutas e actitudes xenófobas, racistas e/ou insolidarias. Nos próximos meses achegarémonos a estas realidades a través de charlas e traballo colaborativo con persoas que traballan ou que viviron en primeira persoa as realidades da migración, dos refuxiados, desplazados, exiliados, xornalistas que nos falarán do discurso de odio ou das fake news na prensa, investigaremos sobre outras culturas ou realidades que nos enriquecerán e nos axudarán a seguir crecendo, a través da literatura, a arte, a música, a historia, a ciencia… 

No final do curso, dedicaremos a Semana Temática a compartir as aprendizaxes e experiencias con toda a comunidade educativa. Agardamos que este sexa o comezo dunha andaina colaborativa, de traballo en equipo e acercamento do centro educativo á comunidade e á realidade da que forma parte.

Grazas adiantadas a todos e todas os que van compartir con nós esta aprendizaxe e van colaborar na súa construción.

Sigue ao IES Praia Barraña en Instagram: @barranaenreda, @boiroteca, @endl.ies.praiabarranha, @barranadeportiva.

Venres de Samaín e Día das Bibliotecas

O venres 29 de outubro o IES Praia Barraña estivo de celebración. O Equipo de Dinamización Artística e Cultural do noso centro (Barraña Enreda), formado pola Biblioteca escolar, o Equipo de Normalizacíon e Dinamización da Lingua Galega, o Equipo de Artes e a Vicedirección, organizou varios concursos para festexar o Samaín: relatos de terror, cabazas, e o X Certame de Fotos de Medo. Entregamos os premios no 2º recreo, e o xurado enfrentouse a escollas moi complicadas. Fixemos un pequeno recuncho do Samaín na planta baixa, que decoramos coa axuda do alumnado. Agradecemos a todo o alumnado e profesorado que participou e colaborou nesta celebración. Esperamos seguir contando coa vosa complicidade en vindeiras actividades!

Con motivo do Día das Bibliotecas, celebrado o pasado domingo 24 de outubro, tamén aproveitamos esta xornada festiva para inaugurar oficialmente o novo espazo da nosa Boiroteca, moito máis amplo e luminoso. Para esta inauguración contamos coa axuda da nosa profesora de Música, Mónica, e da alumna de 2º de Bacharelato Sandra Folgar, á que agradecemos que nos agasallase coa súa voz nun pequeno concerto celebrado no 1º recreo. Moitas grazas ás dúas!!

Proxexto EpDLab

Neste curso 2021/2022 o IES Praia Barraña vai ser un dos centros participantes no proxecto EpDLab (Educación para o Desenvolvemento. Laboratorio). O grupo de 1º ESO A, en relación coa materia de Investigación e Tratamento da Información, recibirá cada avaliación a visita de traballadores de Agareso (Asociación Galega de Comunicación para o Cambio Social) para traballar contidos como igualdade de xénero, racismo, xenofobia, bulos e fake news nos medios de comunicación e redes sociais, consumo responsable, sustentabilidade, cooperación… sempre a través das novas tecnoloxías e das narrativas dixitais. Segundo as súas propias palabras: “Queremos apropiarnos dos medios que temos nas nosas mans para participar en accións innovadoras cara á comunicación inclusiva, ao desenvolvemento social e á denuncia da desigualdade”.

Neste proxecto, coordinado por Agareso e coa financiación  da  Dirección Xeral de Relacións Exteriores e UE, na súa convocatoria pública de axudas para proxectos de Educación para o Desenvolvemento, participarán neste curso o IES de Brión, o IES Pintor Colmeiro (Silleda), o IES Illa de Ons (Bueu), o IES Carlos Casares (Viana do Bolo), o noso centro e un centro educativo de El Salvador.

Este venres 22 de outubro comezaron cunha primeira toma de contacto a través dunha enquisa. Sabemos que vai ser un proxecto moi enriquecedor para o alumnado e agardamos que a final de curso nos fagan partícipes a todos e todas do traballado e aprendido. Mentres tanto, podemos seguir o desenvolvemento do proxecto na web oficial do mesmo: EpDLab.

Obradoiro "Marisqueo a pé"

Este xoves 21 de outubro un grupo de alumnado de 3º de ESO participou no obradoiro "Marisqueo a pé" da man das traballadoras da Asociación de Mariscadoras Mar da Pobra, da Pobra do Caramiñal. Acompañados de profesorado do Departamento de Xeografía e Historia coñeceron de primeira man o duro traballo destas mulleres e o seu respecto e amor polo mar; tamén gozaron dunhas horas de educación fóra das aulas. Profesorado e alumnado coincidiron en que foi unha experiencia estupenda, de aprendizaxe e diversión. Grazas ás anfitroas por recibirnos!

Distribuir contido


by Dr. Radut