Nova sesión do Club da Igualdade
O vindeiro luns 21 de febreiro terá lugar unha nova sesión do Club da Igualdade. Desta volta vannos acompañar Priscila Retamozo Ramos, coordinadora do Comando Igualdade, e Blanca Fernández Ochoa, ex alumna do IES Alexandre Bóveda.
O Comando Igualdade xurdiu hai xa once anos no IES Alexandre Bóveda de Vigo. Daquela Priscila era alumna do centro e de Chis Oliveira, catedrática de Filosofía e creadora desta iniciativa. Agora Priscila tomou o relevo do comando para continúar a súa andaina.
Priscila é politóloga e ten un mestrado en igualdade de xénero. Está especializada en coeducación, violencia contra as mulleres e políticas públicas con perspectiva de xénero. Traballou como asistente técnica na ONU Mulleres Ecuador en prol da igualdade de xénero e o empoderamento das mulleres. Actualmente combina a coordinación do Comando Igualdade co labor de relatora e formadora para a sensibilización e prevención da violencia de xénero, o fomento do bo trato e a coeducación.
O Comando Igualdade é un grupo de alumnas e alumnos formados en igualdade, e que levan a cabo acción directa a través das súas actividades e intervencións nos propios centros, durante o horario lectivo. O obxectivo do Comando é concienciar, informar, transmitir valores e ferramentas para que a mocidade do século XXI poda enfrontar un novo horizonte de conviviencia en igualdade. Para iso abordan temas como a diversidade afectivo sexual, os modelos de masculinidade e feminidade, a violencia de xénero, a identidade... Serven de referente e apoio para o alumnado acollendo a calquera persoa que o precise, e tamén imparten charlas a través das titorías ou obradoiros específicos.
O ano pasado Chis Oliveira e Priscila Retamozo publicaron un libro ca historia do Comando, no que podemos atopar o relato da súa evolución así como ligazóns mediante códigos QR aos seus eventos e intervencións. Deixovos a ligazón da referencia do libro aquí mesmo. Aí poderedes atopar informacion sobre as súas autoras.
https://catroventos.gal/product/comando-igualdade/
A partires de hoxe veredes polos corredores o cartel que anuncia a sesión do Club, que foi elaborado a man por Andrea Expósito Álvarez, de 3º A ESO.
