Skip to Content

Animación á lectura

(clica sobre a imaxe para ver a información)

Falando en verso

Dom, 2010-03-21 22:02 — Anónimo

  Un ano máis chegou a primavera e con ela a festa da poesía. Hoxe, día 21 de marzo, hai dúas celebracións: Día Mundial da Poesía e o Día Mundial da Árbore.

  No noso colexio dende hai uns anos adicamos o mes de marzo á poesía. Os libros de poesía da nosa biblioteca saen dos seus estantes e amosan ao noso alumnado o seu fermoso contido, poemas para copiar, ler, recitar, ilustrar e inspirar as creacións da rapazada do cole.

  Este curso escollemos un tema que non parece poético: os seres inanimados, as cousas grandes ou miúdas, que ás veces están aí, a cotío, e son compañeiros mudos pero fieis: xoguetes, libros, obxectos do cole ou da casa; que nos traen fermosas lembranzas ou nos dan seguridade.

  A esas cousas imos adicarlle os nosos versos; e para inspiración contamos cun fermoso libro dun grande poeta galego, Manuel María. O seu libro "Os soños na gaiola" recolle poemas a esas cousas que a el lle fixeron xurdir un sentimento poético. Le este adicado a un barco de xoguete.

Semanario de literatura infantil e xuvenil en versión dixital

Sáb, 2010-03-20 22:37 — Anónimo

Este semanario  é o suplemento infantil dunha web para adult@s chamada "Libro de Notas". A idea para a súa publicación xurdiu trala desaparición del Pequeño País que se publicaba co xornal El País os domingos. Os seus autores pensaron que era unha mágoa que desaparecera aquel semanario, que a tantos rapaces e rapazas gustaba recibir cada semana, e decidiron engadir esta publicación á súa web.

Este sitio contén historietas de banda deseñada (cómics), textos e outros contidos relacionados coa lectura, axeitados para xoves e cativ@s dende os 5 anos ata os 120...(polo menos). Non contén publicidade e ademais podédesvos suscribir para que vos envíen por mail o aviso das novidades. 

Botádelle unha ollada, paga a pena!!(preme)

 

Mochila viaxeiras

Xov, 2010-02-25 22:03 — Anónimo

Este curso comezan de novo a súa andaina as nosas mochilas viaxeiras, co seu agasallo de información  e divertimento saído da nosa biblioteca.

Despois da primeira experiencia do curso pasado, onde só os cursos  2º e 4º de primaria puideron "saborealas" (pois tiñamos poucas); este curso, tras conseguir un número maior, rodarán dezaseis mochilas, ampliándose a oferta a 6º.

Cada mochila transporta un " tesouro", unha pequena mostra do que contén a nosa biblioteca: poesía, informativo, narrativa, cómic, revista, dvd,... e visitará a casa de cada alumn@ durante unha semana, tempo durante o cal toda familia poderá disfrutala. Coa mochila vai un caderno viaxeiro onde tódolos membros da familia poden facernos chegar a súa experiencia: comentarios, debuxos, fotos, propostas...

O próximo curso esperamos comenzar dende o principio coas mochilas rodando por tódolos cursos.
Boa viaxe!!!

 

Libros recomendados

Mar, 2009-12-29 20:52 — ramallosa
Ola, colegas! ¿Como vai o Nadal?
Vacacións, agasallos, turrón e mazapán; en fin, xenial! A min o que máis me gusta é o turrón de chocolate con froitos secos; se ademais estou lendo un bo libro, acabo coa tableta sen darme conta, e logo xa imaxinades o empacho!!
  Se aínda tendes tempo de mandar a carta aos Reis, vos lembro as recomendacións de libros que vos fixemos, por se alguén a extraviou e quere darlle algunha idea.
 
Espero que vos traian moitas cousas os Reis, aínda que co frío que vai, tamén poderían deixar o carbón.
Ata a volta!!
 
 

Nova colección de Kika Superbruja

Mér, 2009-12-09 20:42 — Anónimo

 

Knister, o autor "pai" deste personaxe tan querido por vós, continúa escribindo as súas aventuras; e agora publica na editorial Bruño unha nova minicolección de libros para coñecer todo o que hai que saber sobre os piratas, os dinosaurios, os cabaleiros medievais e os antiguos exipcios.

Da man de Kika lerás textos informativos, curiosidades contadas por ela e tamén farás divertidos pasatempos.

 

Saberás tamén, que xa se estreou a película baseada no libro "Kika Superbruxa e o libro dos feitizos ". Se aínda non liches o libro , vén á nosa biblio, debes lelo para logo comparar coa película. A "peli" ten tódolos ingredientes para ser un éxito: humor, fantasía, aventuras e MAXIA!!!

Podes ver un adianto aquí.

Nuestro cuerpo

Lun, 2009-12-07 15:30 — Anónimo

Sabes por que podemos movernos? Sabes por que temos fame; ou como pensa o noso cerebro?

Chega ata a nosa biblioteca unha pequena colección de libros para o coñecemento do noso corpo, presentados por Anita Ganeri na Editorial Everest. É axeitada para pequen@s curio@s de 2º e 3º cursos, que lles interesa saber como funciona este corpo que levamos posto.

 Con estes libros poderás satisfacer a túa curiosidade con informacións sinxelas, anécdotas soprendentes e divertidas actividades; acompañadas ademais, de ilustracións e fotografías moi claras.

Son seis títulos e cada libro trata un tema diferente relacionado co funcionamento do corpo humano (o sangue, o cerebro, os sentidos...) 

Non tardes en vir a botarlles un ollo!! 

COÑECE O UNIVERSO

Xov, 2009-10-15 20:58 — Anónimo

…5, 4, 3, 2, 1, 0,…DESPEGAMOS!!!. ALÁ IMOS,  UNIVERSO!!!

 

Ola, colegas. Alédome de estar de novo con vós. Xa vos botaba de menos.

Este trimestre dende a biblioteca ímos desenrolar un proxecto  xunto co departamento de actividades extraescolares para coñecer o UNIVERSO, xa que este ano celébrase o ano internacional da Astronomía.

A proposta consiste en que cada grupo aula elaborara un traballo onde ten cabida a información, a beleza plástica, contos, poesías, adiviñas,…sobre un tema relacionado co Universo (porque é moi grande).

Tamén as familias, poden colaborar, como xa fixeron outros anos. Despois expoñerémolos para que todos e todas poidamos coñecer moitas cousas sobre eso tan grandísimo e inabarcable que é o Universo.

 

Por certo, sabedes como chegou a lúa ao ceo? Pois lede esta lenda

Libros, libros en abril

Lun, 2009-05-04 19:43 — Anónimo
Como cada ano chegou abril coas súas conmemoracións do libro.
No noso cole fixemos un montón de actividades para celebrar estas conmemoracións.
 
O día 2 de abril, día do Libro Infantil, acudimos a unha maratón de lectura de contos de Andersen na fundación Eugenio Granell.
 
Na semana do 23 de abril, Día do Libro, fixemos outras moitas actividades:
 
Agasallo – préstamo dun libro: Por segundo ano consecutivo recollemos esta tradición de certos lugares para conmemorar o día do Libro. Cada alumn@ escolleu un libro da súa propia biblioteca e , ben envoltiño, trouxo para agasallar a outro compañeir@ da súa aula. Realmente trátase dun préstamo que será devolto en cando remate a lectura. Estes días na hora de ler, o noso alumnado “devora” estes ibros de agasallo!
 
Marcapáxinas solidarios: ilustramos marcapáxinas para colaborar coa campaña da organización Save the children  de recollida de donativos para ofrecer unha educación á infancia de países en conflicto.
 
Historia dun libro: estes carteis informativos ensinan o camiño do libro dende que nace a historia na mente do autor/a ata que chega ás mans do lector/a.
 
Historia do libro: Esta presentación dá información sobre a historia da escritura e os seus soportes ao longo da historia. Ademais dos paneis informativos está aloxada nesta páxina para realizar actividades de formación documental.
 
“Nós tamén facemos libros”: Trátase dunha exposición de libros artesanais elaborados durante estes últimos anos, recollendo diversos traballos das actividades programadas na nosa biblioteca.

Recomendamos o noso libro preferido: Enchemos algúns taboleiros da nosas biblio con estas recomendacións, incluso os de infantil fixeron a recomendación do seu libro favorito!! Sempre é interesante coñecer a opinión de outros cando vas ler un libro.
 
 
Algunhas desta exposicións estarán presentes nos tabloleiros durante unhas semanas.

Lemos en Pascua?

Mér, 2009-04-01 20:56 — Anónimo

Se nestes días de vacacións te aburres sen cole, sen colegas, sen profes, sen libros, ... e te atopas cansado de descansar ¡Colle un libro! ¡Non de "mates" ou de "coñe"; senón... de aventuras, de humor, de misterio, de medo, de animais, de exipcios, do universo! Hai todo un mundo gardado esperando que o descubras!!!

Aquí tes algunha boa idea.

Os Megatoxos

Xov, 2009-02-26 20:28 — Anónimo
Chegan Os Megatoxos á nosa biblioteca. Da man de Anxo Fariña, da súa imaxinación máis ben, e como xa nos anunciara cando nos visitou hai dous anos, esta "panda" con poderes extraordinarios chega con dúas aventuras: Os Megatoxos e o aprendiz de druída e Os Megatoxos e a espada esmeralda.
Despois de ser coñecido e apreciado, sobre todo como ilustrador, na serie Antón e Pompón para os prelectores; Anxo presentou unha colección para primeiros lectores en torno aos personaxes de O Quixote, que tamén tivo moi boa acollida e permitiu achegar algunhas historias do famoso libro aos máis cativos.
Agora, o autor quere achegarse aos lectores expertos e faino creando uns personaxes que, grazas aos poderes extraordinarios que adquiren de maneira casual, viven aventuras inverosímiles. Trátase de dous rapaces e dúas rapazas con personalidades diferentes, e ás veces moi discrepantes, que ademais posúen poderes diversos e complementarios, o que lles permitirá colaborar para resolver os conflitos nos que se ven envoltos nas súas andainas.
ACHÉGATE Á BIBLIO PARA COÑECELOS E DISFRUTALOS!!
Distribuir contido


by Dr. Radut