Novas da Biblioteca de Secundaria
O Gran Reto da Biblioteca de Secundaria
16/11/2015
Presentamos o terceiro reto deste curso na Biblioteca de Secundaria. Os que estades participando na serie, tedes ata o 25 de novembro para entregar as vosas respostas.
Necesitamos voluntari@s para a Biblioteca de Secundaria
13/10/2015
Colabora na Biblioteca de Secundaria. Só tes que anotarte na lista da mesa do profesor na Biblioteca. E lembra que todas as boas obras teñen a súa recompensa…
Carlos Negro: poesía para nós
25/05/2015
Este luns pola tarde foi un pouco especial. Recibimos na nosa biblioteca ao poeta Carlos Negro, autor de Makinaria e Penúltimas tendencias. Para moitos foi seguramente o primeiro achegamento a un libro enteiro de poesía; aínda que como el mesmo bromeaba, ben se poden ler calquera deles en pouco máis de media hora! Fixo unha presentación moi interesante e dinámica, sorprendéndonos cos seus recitados emocionantes ou cheos de humor e forza.
Ben seguro que moitos dos asistentes lle seguiremos a pista a partir de agora a este profesor metido a escritor. Moitas grazas pola visita, Carlos Negro!
A biblioteca sae ao recreo
27/05/2015
Hoxe pola mañá, aínda que o vento non quixo faltar un ano máis, puidemos sacar a nosa biblioteca ao recreo como vén sendo tradición no Feal.
Estade atent@s nos próximos días porque publicaremos o nome dos acertantes do cuestionario. Moita sorte a tod@s!
Gañador no concurso da Biblioteca sae ao recreo
17/06/2014
Aquí temos por fin o gañador do cuestionario que fixemos cando sacamos a biblioteca ao patio: Gabriel Pardo Buján, de 1ºB de ESO.
En realidade, foi o único que completou correctamente todas as respostas... e iso que había un lote de participantes!
Merece a nosa noraboa de maneira moi especial, e tamén volvemos a agradecervos o entusiasmo e a participación nesta actividade un ano máis.
A Biblioteca sae ao recreo
03/06/2014
Por fin puidemos sacar a Biblioteca ao recreo! Este ano o tempo estivo mareándonos e xa non o tiñamos nada claro.
Hoxe non nos puidemos queixar e case todos vos achegastes ás nosas mesas cheas de libros, mentres dabades boa conta das mazás... e tamén das lambetadas con que agasallamos a aqueles que se animaron co cuestionario que propuxemos.
Estade atentos, porque nestes días comunicaremos o gañador entre os acertantes! Escollerao unha man inocente durante un dos próximos recreos.
Moita sorte e grazas pola colaboración de todos, en especial aos axudantes de Biblioteca!
Antonio Seijas na nosa Biblioteca
02/06/2014
Esta semana tivemos na nosa biblioteca a visita de Antonio Seijas, ilustrador e autor de banda deseñada. Falounos entre outras cousas do seu libro Cartas de inverno, que partiu da novela de Agustín Fernández Paz.
As rapazas e rapaces de Primeiro de ESO participaron nesta actividade: coñeceron a súa obra, fixéronlle algunhas preguntiñas... e levaron unha dedicatoria moi especial (con debuxo incluído!) todos aqueles que se achegaron co seu exemplar.
Foi un pracer, Toni!
23 de abril
23/04/2014
Neste día tan especial para todos os que gozamos coa lectura, celébrase a o Día do Libro. Coincidindo con esta festa, no noso centro recibimos a visita dun escritor, Marcos Calveiro, que conversou cos alumnos de 5º e 6º de Primaria sobre o seu libro Palabras de auga, premio Merlín no ano 2012; e cos de 3º e 4º de ESO sobre O pintor do sombreiro de malvas, premio Lazarillo no 2009.
Contounos un montón de cousas sobre a creación destas dúas novelas e acompañou cada ponencia cunha presentación de imaxes relativas aos escenarios de cada historia. Explicounos que se sentía atraído por ambientes afastados e exóticos e de aí que non acostume a situar aos seus personaxes en Galicia. Comentounos como fora en cada caso a documentación previa á escrita; no caso de Palabras de auga, procurou datos sobre o suahili, para espallar esas palabriñas polos capítulos que nos achegan á historia dun neno dunha tribo africana. A inspiración na novela sobre os últimos meses de Van Gogh en Auvers naceu do catálogo dunha exposición sobre esta derradeira parte da vida do pintor; cada capítulo parte dun dos máis de 70 cadros que pintou nesa vila, e Marcos Calveiro foinos contando como lle foron servindo para a elaboración do fío argumental e a composición das distintas personaxes, reais ou ficticias.
Como sempre, unha boa experiencia a de compartir a visión que temos como lectores dunha obra co autor da mesma. Puidemos consultarlle as nosas dúbidas e tamén achegarnos a el para que nos asinase cada un dos nosos exemplares.
IV Concurso de declaracións de amor
11/03/2014
Por fin temos os resultados do concurso! A gañadora é unha carta que escribiu Ainhoa Lechuga, de 3º B de ESO. Proximamente entregarémoslle un agasalliño como premio polo seu traballo.
Podedes ver o seu texto exposto no taboleiro da Biblioteca de Secundaria. Noraboa á gañadora!
Festa X Aniversario d'A Tribo
21/10/2013
A Tribo vén de cumprir o pasado curso 10 anos de existencia! E a algúns pareceralles mentira...pero si, xa van alá dez anos desde que comezara -aínda sen bautizar- a súa andaina.
Na Biblioteca de Secundaria, organizouse un concursiño para achegar aos rapaces todos os números que van publicados... e logo houbo festa!
De maneira simbólica festexamos o aniversario con todos aqueles que participaron na idea e agasallamos aos que resolveron todo correctamente.
- « primeira
- ‹ anterior
- 1
- 2
- 3
- 4
- 5
- 6
- 7
- 8
- 9
- seguinte ›
- última »
Enderezos electrónicos
- Equipo directivo: cpi.feal@edu.xunta.gal
- ANPA: o.buxato.anpa.o.feal@gmail.com
- Coordinación da web: web.feal@gmail.com