An English Week
Dentro do Plan galego de potenciación das linguas, que pretende desenvolver actividades para o perfeccionamento nas competencias comunicativas en lingua inglesa, o noso centro ven de ser seleccionado na convocatoria de axudas do presente curso académico para participar na English Week.
A English Week é un campamento de inmersión lingüística en inglés que se desenvolve anualmente en distintos emprazamentos da xeografía galega. O alumnado escollido nos centros de ensino secundario seleccionados en cadansúa convocatoria participa en actividades lúdicas e interdisciplinares dirixidas por monitores especializados co factor común da práctica cotiá da lingua inglesa. Non é necesario destacar a importancia fundamental que, para a aprendizaxe dunha lingua estranxeira, ten a práctica e a interacción comunicativa. Por iso, cómpre alegrarnos de que o IES Plurilingüe Elviña fose seleccionado entre outros centros autonómicos e que os nosos alumnos poidan participar, con todos os gastos pagos, desta enriquecedora experiencia.
En concreto, serán 25 alumnos de 1º de ESO os que desfrutarán das actividades propostas, que este ano se desenvolverán na localidade de Os Peares, no municipio lucense de Carballedo, unha das paraxes naturais máis espectaculares e fermosas de Galicia. As actividades levaránse a cabo entre o día 29 de Outubro e o 4 de Novembro.
