O alumnado de Latín de Bacharelato de Elviña recreou a antiga receita de moretum, unha mestura de queixo, allo, herbas e aceite. Contribuimos gustosamente ó festival de comidas de outono do Instituto organizado polo departamento de Dinamización de Linguas.
No proxecto participaron activamente tamén compoñentes do departamento de Ciencias e TIC.
Como xa ven sendo tradición do noso centro, no mes de Novembro o Departamento de dinamización de lingua galega dirixido pola nosa compañeira Pilar López organizou o seu Concurso de comidas de outono, de participación aberta a toda a comunidade educativa do instituto de Elviña. Boa parte dos alumnos e alumnas (e con eles, a bon seguro, as familias) quixeron participar cociñando para todos unha chea de pratos ben apetecibles. Houbo tamén este ano contribucións do profesorado, que, ademais de darlle a números e letras, tamén teñen o seu aquel entre os pucheiros, segundo parece. E tampouco faltou á cita o noso bedel Carlos Silva, que preparou un caldo de cocido que fixo relamberse ao máis pintado.
Entre os pratos víronse sobre todo doces e larpeiradas de todas as formas e tamaños: magdalenas, bombóns, tartaletas, biscoitos, galletiñas, pasteis, pastas, boliños, pastas de milfollas, mazapáns, tartas de améndoa, de piña, de limón, de chocolate, de queixo, de cabaza, de manteiga, de crema de leite, de doce de leite, de noces, de mazá, de viño tinto, e mellor non seguimos, que será a historia de nunca acabar. Abofé que temos no instituto bos reposteiros! Tamén se viron pratos salgados, entre eles dúas deliciosas tortillas con pataca galega de outono, e unha venerable receita extraída da De re coquinaria do escritor romano Apicio que prepararon os alumnos e alumnas de latín e cultura clásica, para amosar que isto da cociña non ten idade, pero si moita historia...
Unha folla de chocolate
Tres membros do xurado
No segundo lecer, ás 12:10, todos puideron desfrutar das comidas e votar polas súas receitas favoritas. O gañador foi o noso alumno de 1º de ESO C, Josué Rey Morón. Parabéns! Pilar López asegurou que, en datas próximas, publicará na web de normalización o libro das receitas do concurso.
Estade atentos os gulosos! (e as gulosas!)
O noso compañeiro Carlos, editou este vídeo que podedes ver na súa canle de YouTube.
Os rapaces e rapazas de 3º de ESO estiveron este xoves 9 de Novembro no Palacio da Ópera da cidade para acudir a un ensaio didáctico da Orquestra Sinfónica de Galicia. Alí puideron escoitar a Sinfonía nº 9 "From the new world" do compositor checo Antonin Dvorak. A obra estivo dirixida polo prestixioso director israelí Eliahu Inbal. Foron acompañados polas nosas compañeiras Gemma López e Isabel Carballada.
O 25 de Novembro foi o día internacional da eliminación da violencia contra a muller. Toda violencia é, por si mesma, espantosa, aborrecible. A violencia machista, ademais, é na nosa actualidade lacra insoportable e dolorosa realidade coa que temos que enfrontarnos día a día, con ese goteiro de miserable horror que representa a morte das mulleres pola man das súas parellas e exparellas. A morte, coa súa dimensión definitiva, total, é a realidade visible que esperta a indignación de toda a sociedade comprometida, pero esa indignación é igualmente necesaria cando falamos das mulleres que, aínda vivas, sofren esta violencia en todo o mundo. Esa sociedade, á que queremos pertencer, demanda o noso compromiso na loita polo dereito de todas as mulleres ao respecto e a igualdade no mundo enteiro.
O IES Elviña, no día 24 de Novembro, véspera da conmemoración internacional, quixo adicar un recordo ás mulleres falecidas en casos de violencia machista no noso país durante este ano facendo un mural no que figurasen os seus nomes e casos, brevemente descritos. Ademais disto, o alumnado de 2º de Bacharelato do IES Elviña, en compaña do alumnado de 6º de Primaria do CEIP Alborada participou nun acto sinxelo de homaxe no que se selou simbolicamente o recinto dos dous centros co lema "Espazo libre de violencia machista". Para rematar, unha alumna leu o poema de Gioconda Belli "Y dios me hizo mujer". Sirvan estes actos como mostra do compromiso de toda a comunidade educativa de Elviña con esta loita.
O noso compañeiro Carlos Silva editou o vídeo da xornada. Velaquí o tedes na ligazón á súa canle de YouTube.
A poeta Dores Tembrás pasou polo noso centro para facernos reflexionar sobre a poesía. Co alumnado de 4º ESO, a temática do obradoiro foi a figura de Penélope desde o punto de vista dos poetas galegos. En 1º ESO definiuse a poesía. Saíron nomes de autores literarios como J. K. Rowling, Tolkien, Stephen King, Dickens, Gallego, Ibáñez, Francisco Castro, Xabier Docampo. Porén, soamente foi mencionada unha poeta, Rosalía. Toda a actividade estivo sufragada polo Programa Ao meu xeito! ofrecido aos centros de ensino da cidade polo Concello da Coruña.
Cavilamos xuntos arredor das diferenzas e semellanzas entre o graffitti e a poesía; a recepción dunha novela con respecto a un poemario. Deixounos algunhas citas:
“A poesía é como unha cápsula, necesita repousar”
Finalizou o obradoiro coas constelacións poéticas realizadas polo alumnado de 1º ESO e cunha última recomendación:
“Somos as nosas palabras”
Todo o alumnado participante fixo as súas composicións, estimulados coas reflexións da autora, amosando a súa creatividade de moi diferentes maneiras, as veces cunha notable capacidade crítica coa visión tradicional dos mitos e temas tratados, como a versión gráfica do tema clásico de Penélope que podemos ver a carón destas liñas, obra dunha rapaza de 4º de ESO: seica a moderna Penélope non estea xa tan disposta a soportar tan longa a espera do seu esposo e as queixas dos pretendentes.
A nosa compañeira Patricia Varela compuxo o vídeo da actividade, que podedes ver aquí, vía YouTube.
As imaxes e vídeos contidos nesta páxina web corresponden ás actividades desenvolvidas dentro da Programación anual de actividades do noso centro polo noso alumnado. Todas as familias e responsables legais do alumnado que aparece nelas asinaron coa matrícula un permiso específico para permitir a difusión destas imaxes a través da web do instituto ou a través das contas en espazos web e en redes sociais que son de titularidade do IES Plurilingüe Elviña. Asimesmo, familias e responsables están tamén informados do seu dereito de revogar esa autorización de uso de imaxe. Lémbrase que a descarga destes materiais visuais e o seu uso por terceiros fóra do estrito marco dos espazos e funcións permitidos pola autorización citada (isto é, a difusión meramente informativa das nosas actividades complementarias e extraescolares a través da páxina web oficial do centro e a través das contas das que o centro é titular) son ilegais, poden e deben ser denunciados. O IES Plurilingüe Elviña non se fai responsable do uso que se poida facer destas imaxes por terceiros fóra do ámbito dos espazos web que son da súa titularidade.