Clubes de lectura

O Club de lectura de adultos "Veigas de Campaña" tivo, na tarde do venres 17 de novembro, unha nova xuntanza coa presenza da escritora Inma López Silva.

En palabras do responsable deste club de lectura, o profesor Víctor González Zúñiga: "O club de lectura de IES Plurilíngüe de Valga "Veigas de Campaña" tivo hoxe a honra de recibir a Inma López Silva coa súa obra "Escola de Mulleres"; igual non se percibe ben aí na foto, é a da pantalla. Ben, iso da o mesmo, non estaba físicamente con nós, mais estaba a súa voz, unha presencia viva e intelixente. E unha obra complexa na que vértense varias historias, mais todas teñen unha mesma substancia, a rebeldía, é dicir, a liberdade. Son historias de mulleres, mulleres libres, e todas encaixan ben porque interpélanse unhas con outras. É complexo, si, o que nos conta Inma, pero, que non o é? é a vida mesma vertebrada na historia dunha muller que racha coas convencións porque quere vivir, e vive como quere, por iso cóstalle chegar ao mar, e digo esto con toda a intención, porque así comeza o libro, "o mar comeza nun sumidoiro", porque a liberdade que o mar representa, non se regala, é unha conquista que nace da indignación e da fartura, e da dor; de feito, unha das notas que tiña lendo esa frase, levoume a unha canción de Pablo Guerrero, un cantor-poeta extremeño. A canción é coñecida, e adquiriu fama durante a transición en España dos anos setenta, nunha estrofa di "... hai que doler de la vida hasta creer que tiene que llover..., a cántaros". A liberdade, ningunha liberdade, se regala, e sí, as veces hai que "sufrila". ten que doer. Pensaredes que me estou saído do tema da xuntanza, e un pouco sí, pero o amor (e a amizade), o amor de verdade, non o amor ñoño e romanticón, o amor arrimado a amizade ten moito tamén de rebeldía política, e diso tamén fala o libro de Inma.
Non vos daredes conta pero estou facendo esforzos para intentar manterme ao marxe da historia que se conta, intentar contar de que vai, pero sen estropearvos a lectura cando a emprendades, porque pensamos que paga a pena facelo, e recoñezo que cando rematei a lectura e escoitando a Inma falar da súa obra e o debate que xurdiu na xuntanza, un chega a pensar se realmente non estamos todos un pouco tolos, porque unha das cuestións que o libro manexa con soltura, pensamos, e preguntarnos, e así o fixemos, que é o normal, que é a normalidade; home, normal, normal, mellor un gramo de tolería, "soltar a corda", que dicía o outro. Grazas a todas. Saúde"

O Club de lectura de adultos do noso centro, "Veigas de Campaña", clausurou as actividades do curso 2022-2023 na tarde do martes 27 de xuño, cunha sesión arredor do libro de Óscar Reboiras Loureiro : "A agonía das folerpas". En palabras do profesor Víctor González, responsable do club de lectura: "O 27 de xuño as compañeiras do club de lectura "Veigas de Campaña" tivemos a derradeira xuntanza do curso. Convócanos o pracer da lectura, da fala, do encontro, en fin da amizade, si, das amigas, aquelas ás que contas cousas que a outros ou outras lles negas, ocultas, non por nada, senón porque non é o momento, non se crea o momento e acontece que nas tertulias que imos artellando no club de lectura, créase ese momento, de xeito inesperado, espontáneo, e iso é o que fai fermosa a xuntanza, amigas que falan, quero dicir que se nos convoca o libro, neste caso foi "A agonía das folerpas" de Óscar Reboiras Loureiro, o faladoiro, se ben a tertulia empeza xirando arredor do libro, sobre aquilo que o libro nos suxire, a partir de aí xa calquera cousa é posible. É a maxia da palabra que nos léva sen querer dun tema a outro, como fíos dunha trama que imos urdindo, un tecido multicolor; lembro, por exemplo, diálogos filosóficos sobre a tema da morte -coa excusa dun libro de ciencia ficción (non lembro agora o título) dun autor xaponés- que non desmerecen dos que Sócrates mantiña na ágora cos sofistas gregos, e un libro que parecera mediocre, de pronto faise sublime, e así acabamos falando sobre a beleza da poesía, e a dificultade que entraña descifrala, que foi un dos temas que abordamos onte, e non porque a obra de Óscar Reboiras o pedira, senón porque xurdiu; esa é a maxia. Que non decaiga. En fin, bo verán a todas e todas, Un pracer. Saúde."

Na tarde do xoves 25 de maio, tivo lugar unha nova sesión do Club de lectura de adultos do noso centro, para conversar sobre o libro "No y yo", da escritora francesa Delphine de Vigan. En palabras do coordinador do club de lectura, o profesor Víctor González: "Xa estamos de volta, as do club de lectura. Hoxe acompañounos Delphine de Vigan, escritora francesa, e a súa obra "No y yo". "No" representa a unha rapaza indixente; no é, pois, algo máis cun nome, é un símbolo que recolle o que "non é", o que convén ocultar, agachar, a indixencia, a pobreza, que non -"NO"- se vexa, é aquelo que metemos debaixo dunha alfombra ou, aínda peor, abandonamos no medio do mar. É unha novela dura en certos aspectos, e tamén tenra, fala da amizade, da soidade, en fin, de nós. É unha obra cercana e viva, que se deixa ler, que te leva por diante porque te podes poñer facilmente no lugar da protagonista, unha rapaza superdotada que percibe o mundo cunha madurez que para si querrían moitos adultos, un "bicho raro", fráxil, única, ben, un pouco como todos, que todos somos un pouco "bicho raros". Saúde".