A Consellaría de Educación, nunha resolución publicada con data de 9 de abril e anunciada hoxe, seleccionou o IES de Valga para formar parte da Rede galega de dinamización da Formación Profesional Dual. Trátase dunha iniciativa de nova creación que ten a finalidade mellorar as conexións entre os centros de ensino e as empresas colaboradoras en beneficio da formación do alumnado. Cada centro escollido debe designar un profesor, ou profesora que, até final de ano, non terá actividade docente e dedicarase en exclusiva a supervisar a actividade do alumnado nas empresas formadoras e a explorar outras vías de colaboración. O profesor designado polo centro é Francisco Javier Hermida Liñeira.
Para a directora do IES de Valga, Dolores Rego Balsa, “esta selección confirma a presenza do noso centro na vangarda da formación profesional galega, o que vai redundar na melloría das competencias profesionais do noso alumnado”. Para alén disto, engade a directora que se trata “dun grande reto que afrontamos coa confianza que nos dá unha traxectoria exemplar refrendada pola confianza que teñen en nós as empresas colaboradoras”.
A FP Dual
A Formación Profesional Dual é unha modalidade que ten como finalidade a cualificación profesional das persoas nun réxime de alternancia de actividade laboral nunha empresa coa actividade formativa nun centro educativo. Integra os tres piares que sustentan o proceso de formación dun profesional: formación curricular (específica do ciclo formativo), traballo na empresa e formación complementaria (específica para os procesos produtivos da empresa), combinando a asistencia do alumnado no centro educativo coa súa formación e o seu traballo na empresa. Os centros e as empresas comparten as responsabilidades formativas para que as ensinanzas profesionais se adecúen ás necesidades do mercado laboral. O IES de Valga oferta estes estudos para o título de Técnico en Soldadura e Caldeiraría.
