Enlace ao plan dixital

Que é a Hora de ler?

A Hora de ler é o programa específico de fomento da lectura organizado polo Equipo da Biblioteca deste instituto. Leva funcionando xa varios cursos, desde a incorporación do noso centro ao PLAMBE (Plan de Melloras de Bibliotecas Escolares).

Na Hora de ler dedícanse durante todo o curso unha serie de sesións de clase á lectura libre. No programa participa todo o alumnado de ESO.

Calendario da Hora de ler

Nas aulas do alumnado da ESO, así como na sala de profesores, estará visible o calendario da Hora de Ler para este curso 2022-2023. Este curso haberá 25 sesións de lectura. O día que corresponde á Hora de ler aparece marcado cun icono. Máis abaixo especifícase a sesión concreta que corresponde a cada día.

Enlace ao Calendario

Que se pode ler?

A Hora de ler é un programa de lectura libre, non dirixida.

O alumnado ten que traer da súa casa ou pedir en préstamo na Biblioteca do instituto calquera tipo de material de lectura (libros, cómics), en función dos seus gustos. Vale tanto o soporte tradicional en papel como o libro electrónico (ebook).

O alumnado pode tamén aproveitar a Hora de ler para ler aqueles libros de lectura obrigatorios ou recomendados polos diferentes departamentos.

Importante:

Na Hora de ler non se admiten como materiais de lectura xornais ou revistas, así como non se permite o móbil como soporte da lectura.

A Hora de ler, como programa de lectura libre, non pode ser utilizada polo alumnado nin para estudar, traballar co libro de texto ou facer tarefas escolares.

Cando ocasionalmente un alumno/a non traia o material de lectura, o profesorado deberá indicarlle qué actividades debe facer. Se algún alumno ou grupo de alumnos non trouxesen material de lectura de modo frecuente tede en conta que se trata dunha actividade de carácter obrigatorio. Poñédevos nese caso en contacto coa responsable do Equipo da Biblioteca.

O profesorado durante a Hora de ler

A mellor promoción da lectura é o exemplo: pedímoslle ao profesorado que durante a Hora de ler dea exemplo ao alumnado traendo tamén o correspondente material de lectura.

Avaliación da Hora de ler

A Hora de ler nin é unha actividade académica nin é avaliable. Nada impide, porén, que cada profesor/a poida dentro das posibilidades que lle permitan os criterios de avaliación do seu departamento didáctico, ter en conta as lecturas feitas, o Caderno de Viaxe e a actitude ante a Hora de ler á hora de dar a cualificación final do seu alumnado.

O Equipo da Biblioteca realiza sempre a final de curso unha enquisa entre o alumnado da Hora de Ler para avaliar a actividade e incorporar estes resultados á Memoria final do PLAMBE.

O Proxecto 365 días de respecto e igualdade foi un proxecto con altibaixos, con moitas reflexións por parte do alumnado e do profesorado, con actitudes negativas e positivas durante todo o período que nos fixeron medrar a nivel grupo e como comunidade educativa.

O plan de igualdade precisa Proxectos coma este mais tamén necesitaría o apoio de dúas Equipas de Igualdade (unha de profesorado e outra de alumnado) que traballen plenamente contidos, proxectos e que apoien e colaboren cos titores, con orientación e co profesorado.

Como coordinadora considero que son primordiais estas equipas para chegar de maneira rápida a todos e cada un dos alumnos e alumnas e para centralizar moitas das actividades. É imprescindible que un centro como IES A. Xelmírez II conte con grupos de traballo que apoien os proxectos porque podemos sementar con charlas, reflexións ou foros pero precisamos persoas que recollan ese froito e que continúen co labor xerado durante estes cursos.

Xaneiro chegou cargado de oportunidades, un novo obradoiro para 1.º da ESO  impartido por “Pantallas amigas” sobre “Violencia de xénero e o novo contexto dixital” centrado no coñecemento e na prevención das novas formas de violencia que xorden nese eido. Estiveron moi atentos ao que a ponente comentaba e xeráronse moitas preguntas.

Debido ao calendario escolar, o mes de febreiro, é un mes con moitas actividades polo que decidimos que só terían a visita dun Policía Nacional que impartiría obradoiros en 1.º, 2.º e 3.º da ESO para tratar o uso das novas tecnoloxías e a exposición constante que se fai da imaxe nelas. É relevante que sexan críticos consigo mesmos e fagan un uso responsable de Internet xa que ao seren nativos dixitais moitas veces non se percatan do tempo que invirten nas redes e de como o fan.

En marzo, creáronse unha serie de recomendacións literarias, de música, etc. E comentáronse por niveis/cursos con eles tanto nos recreos como no Club de Lectura.

Dadas as circunstancias da COVID e a separación dos patios, o profesorado e os titores e titoras tiveron que buscar a forma axeitada para difundir estas suxestións. É probable que esta actividade se repita no vindeiro curso xa que deu bos froitos e o alumnado demandaba máis libros recomendados, cancións, etc.  Houbo difusión por medio de podcast e de lecturas de grandes mulleres da historia en todos os ámbitos.

Desde marzo a maio, alén das actividades propiamente de titoría, tamén se creou un podcast de “Memoria histórica sobre as mulleres” coa colaboración de Agareso. Foi xestionado na materia de Lingua Galega e Literatura en colaboración coas titorías de 1.º ESO C e coa aula de 1.º ESO Desdobre AB coa participación activa da súa titora, Beatriz Busto.

Podcast1

Podcast2