Extraescolares

Claro está que o IES Elviña tamén celebra o Entroido. Non hai peliqueiros nin cigarróns no instituto, of course, iso vai por outras latitudes, pero si que pasou connosco a xornada algún choqueiro de toda a vida e moitos que, sexa por preguiza ou por gañas de durmir, trouxeron posto o pixama. Pero os reis da festa (e as raíñas, que tamén as houbo) foron os profes do grupo de zumba dirixidos por un tal Alfonso Salgado, que botou man do seu apelido para darlle graza ao bailongo no segundo lecer a ritmo de reggaeton. Se cadra isto non é Tenerife, Cádiz ou mesmo Laza, pero, mandatruco!, non lle faltou a festa ao noso centro. Testemuño sexa o vídeo de Carlos.

O IES Elviña de semana branca en Jaca (2018)

    A práctica do esquí é non só unha actividade deportiva de altísima esixencia física e coordinación senon tamén unha amable diversión para o tempo de lecer. Xa sabemos que o estudo, actividade intelectual, esgota tamén o seu. Por iso, está ben que, polo menos unha vez ao ano, que tampouco hai que esaxerar, o alumnado dispoña dunha semana lectiva para pasalo ben e olvidar un pouco os tristes sinsabores da vida académica.

As humildes habitacións do hotel

     Non estrañará que, con estas, o alumnado de 3º, 4º de ESO e 1º de Bacharelato fixese, por iniciativa do Departamento de Educación Física, unha viaxe ao Pirineo aragonés para a práctica do esquí entre o 4 e o 11 de febreiro. Os rapaces e rapazas do noso instituto pasaron nesas datas unha divertida semana en Jaca en compaña de Paula Iglesia e Francisco Pérez, ousados deportistas e benqueridos compañeiros de fatigas, cos que nenos e nenas desfrutaron baixando as costas nevadas da empinada montaña, compartindo cómodo hotel e mesa de comida, e acudindo con gozosa premura á enfermería para tratar as abondosas torceduras de nocello, as lesións cervicais e os afociñamentos varios.

Na neve ben abrigadiños, en compaña dos profes de educación física

     Por fortuna, a cousa non foi a máis e todo o mundo tornou sano e salvo (uns máis ca outros, claro). Pero, iso si, todos ben dispostos para continuar, entusiastas, co estudo e o traballo, que xa vai devalando a segunda avaliación e os parciais veñen de camiño...