No curso 2021-2021 poderase cursar no IES de Valga o Ciclo Medio de Mecanizado en modalidade dual. Trátase duns estudos que habilitan para profesións, entre outras, como torneiro/a, fresador/a, mandrinador/a, modelista matriceiro ou operadora/a de robots industriais. A inclusión deste ciclo débese á grande demanda de profesionais por parte das empresas da contorna.
A modalidade dual caracterízase por ter unha formación compartida entre as empresas (onde o alumno/a estaría durante as mañás) e o instituto (onde asistiría ás tardes). Polo traballo nas empresas recíbese un salario en función do número de horas do contrato. Neste primeiro ano, as firmas onde se desenvolvería esta formación serían Extrugasa, Exlabesa, Aluminios Cortizo, STAC, Gama e Hijos, Thune Eurelka, Maimbar, Soluciones Metálicas Jamardo e Mecanizados Oliveira.
Pode realizar a solicitude de admisión calquera graduado/en ESO ou que teña unha titulación de rango similar ou superior a partir do día 25 de xuño.
CM Soldadura e caldeiraría
Para o próximo curso mantense a oferta de estudos para esta titulación na modalidade ordinaria, dual e de adultos. A respecto da segunda delas, ten as mesmas características que as explicadas a respecto do CM Mecanizado e conta coa colaboración das empresas Gama e Hijos, Thune Eurelka, Maimbar, STAC, Ingeniería y montajes Rías Baixas, Rotogal, Extrugasa, Exlabesa e Eiras e Iglesias. Son centos os alumnos titulados nestes estudos no IES de Valga que están a traballar en múltiples empresas do sector.
CS Construcións metálicas
Esta titulación xa leva tempo no catálogo do IES de Valga e cóntase con que o próximo curso poida ser ofertada como ciclo plurilingüe. Isto permitiría que o alumnado conte cun módulo en cada curso onde se introducen contidos en inglés e cunha formación, de carácter voluntario, de cincuenta e tres horas de Inglés técnico. A intención disto é facilitar que o alumno/a poida mellorar a súa cualificación profesional e a súa formación continua, pois boa parte das innovacións neste sector aparecen en congresos e en publicacións nesta lingua. Para o acceso a este ciclo é necesario, no mínimo, o título de bacharel. Esta titulación permite a validacións de materias en estudos de enxeñaría, nalgún caso alcanzando case un curso completo.
Pleno emprego
É importante salientar que a práctica totalidade do alumnado titulado nestes ciclos pode acceder a un contrato laboral unha vez acabada a súa formación, pois é constante a demanda de profesionais do sector por parte das empresas da comarca, que están en continuo contacto co centro demandando persoal cualificado.
