Celebramos o Día do Libro

Con motivo da celebración do Día do Libro o 23 de abril, imos ter estes días unha serie de actividades promovidas desde a Biblioteca e o EDLG. Desde o xoves 20 e ata o mércores 26 o patio central do instituto acollerá nos recreos lecturas de fragmentos de libros en diferentes linguas a cargo de alumnado de 1ºESO, 3ºESO e 1ºBach.

Comezamos o día 20 coa lectura dun conto en portugués, ao que seguirán lecturas en distintos idiomas que reflicten a diversidade lingüística e cultural do noso alumnado. Ademais, tamén teremos no patio central recantos de lectura cunha selección de obras da biblioteca relacionadas coas áreas de coñecemento dos distintos departamentos didácticos. Por último, desde o 21 de abril e ata o 12 de maio estará aberto o prazo para presentar propostas no concurso de fotografía Intégrate nos libros, un certame no que se convida a toda a comunidade educativa a facer fotos con composicións nas que se integre a portada dun libro nalgunha parte do noso corpo.