Por 365 días de respecto e igualdade

O Proxecto 365 días de respecto e igualdade foi un proxecto con altibaixos, con moitas reflexións por parte do alumnado e do profesorado, con actitudes negativas e positivas durante todo o período que nos fixeron medrar a nivel grupo e como comunidade educativa.

O plan de igualdade precisa Proxectos coma este mais tamén necesitaría o apoio de dúas Equipas de Igualdade (unha de profesorado e outra de alumnado) que traballen plenamente contidos, proxectos e que apoien e colaboren cos titores, con orientación e co profesorado.

Como coordinadora considero que son primordiais estas equipas para chegar de maneira rápida a todos e cada un dos alumnos e alumnas e para centralizar moitas das actividades. É imprescindible que un centro como IES A. Xelmírez II conte con grupos de traballo que apoien os proxectos porque podemos sementar con charlas, reflexións ou foros pero precisamos persoas que recollan ese froito e que continúen co labor xerado durante estes cursos.

Xaneiro chegou cargado de oportunidades, un novo obradoiro para 1.º da ESO  impartido por “Pantallas amigas” sobre “Violencia de xénero e o novo contexto dixital” centrado no coñecemento e na prevención das novas formas de violencia que xorden nese eido. Estiveron moi atentos ao que a ponente comentaba e xeráronse moitas preguntas.

Debido ao calendario escolar, o mes de febreiro, é un mes con moitas actividades polo que decidimos que só terían a visita dun Policía Nacional que impartiría obradoiros en 1.º, 2.º e 3.º da ESO para tratar o uso das novas tecnoloxías e a exposición constante que se fai da imaxe nelas. É relevante que sexan críticos consigo mesmos e fagan un uso responsable de Internet xa que ao seren nativos dixitais moitas veces non se percatan do tempo que invirten nas redes e de como o fan.

En marzo, creáronse unha serie de recomendacións literarias, de música, etc. E comentáronse por niveis/cursos con eles tanto nos recreos como no Club de Lectura.

Dadas as circunstancias da COVID e a separación dos patios, o profesorado e os titores e titoras tiveron que buscar a forma axeitada para difundir estas suxestións. É probable que esta actividade se repita no vindeiro curso xa que deu bos froitos e o alumnado demandaba máis libros recomendados, cancións, etc.  Houbo difusión por medio de podcast e de lecturas de grandes mulleres da historia en todos os ámbitos.

Desde marzo a maio, alén das actividades propiamente de titoría, tamén se creou un podcast de “Memoria histórica sobre as mulleres” coa colaboración de Agareso. Foi xestionado na materia de Lingua Galega e Literatura en colaboración coas titorías de 1.º ESO C e coa aula de 1.º ESO Desdobre AB coa participación activa da súa titora, Beatriz Busto.

Podcast1

Podcast2

Tendo en consideración que a “carta” forma parte do currículo de 1.º da ESO en Lingua Galega e Lingua Castelá, o alumnado escribiu unha serie de cartas á persoas que perderon a seres queridos pola violencia de xénero ou que simplemente alzaron a voz no pasado para defender os nosos dereitos.

Contamos nos corredores coa exposición: “Cartas de Amor” cedida pola Consellería; exposición gráfica de ilustracións de diversos artistas sobre a violencia de xénero e mocidade. Esta exposición colocouse nos corredores e os rapaces puideron traballar contidos a partir delas nas materias de Lingua e nas titorías.

Ver fotos

Nos departamentos de Linguas tamén se traballou en 2.º da ESO o tema da violencia de xénero por medio da banda deseñada.  Analizaron viñetas presentes en Internet sobre as desigualdades. En Lingua Galega, os docentes amosaronlles estratexias e instrumentos de como podían realizar a actividade e en Lingua Castelá puxeron en práctica eses coñecementos e engadiron a súa creatividade para xerar como produto final o cómic.

Ver fotos

Despois de analizar o Plan de Igualdade e que os titores realizasen unha serie de preguntas, exposición de temas, etc. viron a importancia de crear conciencia entre parte do alumnado antes de crear propiamente unha equipa de igualdade con eles e tamén outra co profesorado. Foi necesario descubrir a que nivel de profundidade tiñan coñecemento para evitar prexuízos e estereotipos e tamén para determinar en que curso era primordial unha maior fincapé coas charlas, foros ou conversas sobre o tema.

Usamos algúns recreos para conversar de maneira distendida cos rapazada, propoñer lecturas e ver as súas reaccións con respecto ao machismo, as desigualdades sociais...

Nese momento coa  axuda da responsable da biblioteca, Ana Belén Blanco Varela revisamos o fondo bibliográfico existente en Iguadade e xurdiu a creación do “Recuncho Lila”, un pequeno expositor con libros sobre igualdade para que fose moi visible. Observamos que había exemplares acordes a un nivel de 1.º e 2.º de BACH pero que non había moitos libros a niveis baixos. Ese tamén foi un dos motivos polos que pensamos que era esencial traballar máis con eses cursos.

Desta forma a rapazada podería curiosear e levalos para ler na casa. Así non só contribuímos ao Plan Lector, senón que tamén activamos as súas ganas de saber.

Tamén foi decisivo ver cales eran as disciplinas onde a desvantaxe ou o nesgo de xénero era máis evidente; e o Deporte e a Economía foron dúas temáticas nas que centramos moitos dos debates. As materias de Lingua Galega e de Lingua Castelán foron esenciais para a realización tarefas de investigación sobre mulleres na ciencia, na literatura, na música... e por suposto, no deporte e na economía.

Ver fotos