A NOSA quere verificar a Einstein

EMMA ARAÚJO SANTIAGO/ A VOZ 04/05/2019 00:37 H

A Axencia Espacial Escolar Galega ( NOSA) faise maior, xa que o proxecto que naceu fai tres anos para que estudantes do instituto Maruxa Mallo de Ordes puxesen en práctica parte dos seus coñecementos en materias como matemáticas, física, bioloxía, literatura e comunicación, renovou caras, retos e púxose límites máis ambiciosos. O último, se o tempo acompaña, verá a luz o vindeiro venres, día 10, a iso do mediodía, xa que será nese momento cando lancen á estratosfera a cuarta sonda do seu proxecto MarumaSat, no que tamén participan cinco centros máis: IES Arcebispo Xelmírez II (Santiago), IES Miraflores (Oleiros), IES Marco Camballón (Vila de Cruces), CPI Cruce (Cerceda) e o IES Ferrol Lanuxe.

A data elixida non é casual, xa que se necesitan unhas condicións atmosféricas determinadas e tamén que Aena autorice o lanzamento. Unha das novidades deste ano é o tamaño do globo, que será maior que o de lanzamentos anteriores, polo que é posible que poida verse desde o espazo, xa que outra das razóns para elixir a data está na proximidade dun satélite europeo, que pode facer visible esta aventura.

A elección do globo implicou cambios de provedor, xa que polo seu tamaño e peso optaron por adquirilo en Estados Unidos. A incorporación do novo material está pensada para conseguir un novo récord de altura, 36.000 metros. Se o conseguen, no improvisado cabo Cañaveral de Ordes poderán verse imaxes do planeta tomadas cos sistemas de gravación que tamén levará a cuarta MarumaSat. Outra das melloras da sonda é a incorporación dun novo sistema GPS para que poida estar localizada, non só no momento da súa caída, senón tamén durante a súa viaxe. Con este mecanismo esperan evitar sustos como o do primeiro ano e o do lanzamento do 2018 no que a sonda se perdeu e foi localizada con grandes doses de sorte.

Lanzar a MarumaSat é un éxito por se mesmo, pero os centros que participan no proxecto incluíron máis obxectivos. O que lle dá o nome de Misión Einstein quere demostrar a teoría da relatividade comprobando o movemento de muones, partículas que xorden cando os raios cósmicos tropezan coa atmosfera. Ao viaxar á velocidade da luz, a distancia que percorren é moi distinta á que fixa a teoría, polo que así demostrarán a tese de Einstein.  

Medir a capa de ozono e comprobar a súa evolución é outro proxecto, xunto ao lanzamento ao espazo dos textos gañadores do concurso de poesía estratosférica. Tamén estudarán os campos magnéticos da terra e incluirán unha cápsula de supervivencia para proxectos futuros para enviar seres vivos máis complexos que os fermentos ao espazo e analizar a súa evolución.

Onte, escolares de todos os centros organizaron un simulacro para que dentro dunha semana todo vaia como unha seda. Un primeiro globo de ensaio rompeu, polo que tiveron que preparar outro e cruzar os dedos.

Ler a nova en La Voz de Galicia