IES Pazo da Mercé |

Acto contra a violencia de xénero

Actividades no centro

O venres 24 de novembro celebrouse un acto en Usos Múltiples contra a violencia de xénero. Protagonizado polo alumnado, o grupo de pandereteiras interpretaron un par de pezas musicais: "Muiñeira loitadora" e "Muiñeira reivindicativa", compostas para a ocasión polo profesor de Música Anxo Abalde. A alumnas e profesor lles agradecemos o magnífico traballo. É fundamental que desde o ensino público, e desde o conxunto da sociedade, tomemos conciencia e asumemos un rol de denuncia e combate contra a violencia machista. E tamén que rexeitemos na teoría e na práctica as dinámicas patriarcais que queren facer da muller unha persoa submisa. Debemos perseguir unha sociedade máis xusta e igualitaria.

EDLG

Sementeiro de árbores autóctonas

O EDLG quere animar a toda a comunidade educativa, nomeadamente ao alumnado da ESO a realizar un Sementeiro de árbores autóctonas coas que poder repoboar o noso monte. Dentro duns días subiremos un video realizado polo alumnado do EDLG mostrando como se realiza un Sementeiro.

É moi fácil, xa o veredes!

Ademais, cando as plantemos no monte ídeslles poñer o voso nome ou alcume e tamén faremos unha exposición de cartas vosas á vosa árbore do futuro. AAAh.....e quen queira participar no equipo de dinamización lingüística, sabede que nos xuntamos todos os xoves en Usos Múltiples no recreo.

Participa!!!! Lumes Nunca Máis!!!!!

Ler máis

CONVOCATORIA DE FOLGA DE ALUMNADO O 16 DE NOVEMBRO DE 2017

A Xunta de Delegados e Delegadas do IES Pazo da Mercé informou á Dirección de que decidiu secundar a folga convocada pola organización estudantil ERGUER para reclamar unha Lei galega de educación como alternativa real á LOMCE, ao Plan Boloña e ao Decreto do 3+2.

Desde a Dirección será enviada ás familias esta información e mais o formulario que deben cubrir con fin de que a aqueles alumnos e alumnas que se unan á folga se lles xustifique a falta de asistencia. Este formulario será entregado ao alumnado o día 14 de novembro e debe ser devolto o día 15. De faltar ás aulas máis do 50% do alumnado, non se avanzará na explicación de materia, mais o profesorado custodiará a aquelas persoas que non secunden a folga e reforzará os contidos xa explicados ata o momento.

Un saúdo

Visita do Alcalde das Neves

A pasada semana tivemos a visita do Alcalde das Neves. Era perfectamente coñecedor da situación no Instituto causada polos lumes. Durante estes terribles días, está a haber un contacto directo entre o Concello e o noso centro, que amosa a responsabilidade, sensibilidade e compromiso do goberno local por todo o vivido por mor da catástrofe incendiaria. O Alcalde comprobou in situ as consecuencias do lume e das partes e estruturas afectadas. Fíxose un percorrido polas zonas que sufriron o impacto deste terror. Aínda que non é unha competencia municipal, comunicou a disposición a colaborar en distintas actuacións e liñas de traballo, na medida das posibilidades existentes. Agradecemos esta actitude de comprensión e colaboración do Alcalde, que noutros momentos xa se ten dado, mais que nuns intres tan complexos coma estes é especialmente merecente para recoñecer e valorar.

O alcalde e mais o director do centro visitando a parte do monte

Ler máis

Concentración no Concello

O pasado venres día 20 o alumnado e profesorado do noso centro participaron nunha concentración no Concello xunto co alumnado e profesorado do CEIP. Alí, diante do edificio consistorial e en compañía do alcalde, unha alumna e un alumno do Colexio leron un emocionante comunicado no que deixaron moi claro a cor que desexaban recuperar para toda a comarca. Logo o alcalde dirixiunos unhas palabras esperanzadoras. Foi un momento especialmente intenso.

Debuxo feito por Davila para os alumnos e profes do IES Pazo da Mercé

Entre as mostras de apoio e interese solidario recibidas no noso instituto (administracións como a Deputación ou Concello das Neves, outros centros de ensino, exprofes do instituto, etc), damos a coñecer o debuxo feito por Davila. Agradecemos a todas e todos a preocupación amosada.