IES Pazo da Mercé

Esta 1ª Avaliación remata o próximo venres 20 de Decembro, ese venres o horario do centro será o habitual (entrada ás 9:00 e saída ás 14:40) e ese día as/os titoras/es darán ó seu alumnado as notas da 1ª Avaliación que levarán para casa.

Voltaremos ás clases o mércores 8 de Xaneiro de 2020 en horario habiltual.

Desexamos profundamente que todas as familias pasen un Bo Nadal e teñan un Próspero 2020!!

O pasado luns 16 de decembro , alumnado de 3º ESO e do club de lectura, participamos nunha charla de escritora María Solar, autora do libro “Os nenos da varíola”.

Tivo lugar no IES Luís Seoane de Pontevedra e acudimos 5 centros de ensino.

Esta actividade foi organizada polas Escolas UNESCO, O club de lectura e o departamento de Lingua galega para homenaxear a figura de Isabel Zendal considerada a primeira enfermeira da historia en misión internacional.

As Escolas UNESCO de Galicia imos adicarlle o día da Paz o próximo 30 de xaneiro.

Continuando co traballo de IES de concienciar ao alumnado da importancia de coidar o monte  esta semana saímos a plantar bidueiros. A tarefa non só nos serve para traballar a concienciación medioambiental senón tamén para ir coñecendo a flora da nosa contorna.

A bidueira, bidueiro ou bido (Betula pubescens) é unha árbore da familia das betuláceas que medra nas zonas húmidas.

ACTIVIDADES DE CONCIENCIACIÓN CONTRA A VIOLENCIA DE XÉNERO

As inquietantes cifras de asasinatos de mulleres son o dato máis visible dunha lacra social que cómpre erradicar. Non obstante, amais das mortes hai tamén outras violencias, máis ou menos visibles, que 

debemos aprender a identificar para podelas afastar das nosas vidas. Por iso, este ano decidimos  dedicar unha semana a concienciar á rapazada no rexeitamento de calquera conduta de maltrato, entendendo por isto o oposto ao “bo trato”, ao trato igualitario entre mulleres e homes. 

O lema arredor do que pivotou a semana e que nos serviu de marco para o Manifesto así como para os autocolantes que repartimos por todo o instituto foi: Sobran mortes e faltan condenas!

Este mes de novembro o alumnado de 1º ESO tivo a ocasión de participar nunha actividade ben estimulante: a visita ao Porto de Vigo. A actividade arrincou cunha ruta en  autobús por todo o porto para lle amosar ao alumnado todos os recunchos que este agocha. Cómpre lembrar que Vigo é a capital española da pesca e en Europa é líder da pesca fresca para consumo humano. De feito, só dentro do porto hai máis de 350 empresas que xeran unha facturación superior aos 3000 millóns de euros ao ano. Ese grandísimo volume de traballo resultoulle impresionante á rapazada.